Mose II, 23

Dami sane yemi kɛ nɔ́ nɛ da peemi

1 ⓖ “Nɔ́ nɛ o nɛ, loo o nui ɔ, ko de. Koo piɛ dikalɔ he kɛ ye lakpa odase.

2 Koo nyɛɛ nihi fuu a se kɛ pee nɔ́ yaya; nɛ koo piɛ a he kɛ ye lakpa odase kɛ plɛ dami sane hɛ mi kɛ bu si.

3 ⓗ Ko dla ohiatsɛ sane he ha lɛ ngɛ kojomi he.

4 ⓘ “Ke o na o he nyɛlɔ e na, loo e teji nɛ laa blɔ ɔ, mo kpaka lohwe ɔ kɛ ya ha lɛ.

5 Ke o na o futsɛ teji nɛ tlɔ zugba kɛ e se mi tlomi nɛ jiɔ pe lɛ ɔ, koo be e he nɛ o je; mohu wa o futsɛ ɔ, konɛ lohwe ɔ nɛ te nɛ e da e nane nɔ ekohu.

6 ⓙ “Ko plɛ ohiatsɛ sane hɛ mi ngɔ bu si ngɛ kojomi he.

7 Koo po sane ngɔ fɔ nɔ nɔ, nɛ nɔ nɛ pee we nɔ́ yaya ko ɔ, koo gbe lɛ; ejakaa nɔ nɛ peeɔ yayami kaa kikɛ nɛ ɔ, i kɛ e he be lɛ kee.

8 Ko he nyɔ mi ní; ejakaa nyɔ mi ní hemi yuɔ tsɔli a hɛngmɛ, nɛ a plɛɔ dali a sane hɛ mi ngɔ buɔ si.

9 ⓚ “Koo wa nubwɔ yi mi; nyɛ le bɔ nɛ nubwɔ si himi ngɛ ha, ejakaa nyɛ ya hi si kaa nibwɔhi ngɛ Egipt.

Jeha kpaagone ɔ kɛ ligbi kpaagone ɔ

10 ⓛ “Du ní ngɛ o ngmɔ ɔ mi nɛ o kpa jeha ekpa.

11 Se jeha nɛ ji kpaago ɔ lɛɛ ngmɛɛ ngmɔ ɔ he nɛ e fɔ si gu nɛ e jɔɔ e he, nɛ o ko ya kpa e nɔ ní, bɔ nɛ pee nɛ o ma a mi ohiatsɛmɛ ɔmɛ nɛ a ye e nɔ ní, konɛ nɔ́ nɛ maa piɛ ɔ, pu mi lohwehi hu nɛ a ye. O wai ngmɔ ɔmɛ kɛ oliv abɔɔ ɔmɛ hu, mo tsu a mi ní jã kɛ̃.

12 ⓜ “Ligbi ekpa o kɛ tsu ní ngɛ otsi mi, se ligbi nɛ ji kpaago ɔ lɛɛ mo ko tsu nɔ́ ko, bɔ nɛ pee nɛ o na amɛ, o teji ɔmɛ, o nyɔguɛ ɔmɛ, kɛ o nibwɔ ɔmɛ nɛ tsuɔ ní ha mo ɔ nɛ a jɔɔ a he.

13 “Nyɛɛ bu níhi tsuo nɛ imi Yawɛ, i de nyɛ ɔ tue saminya nɛ nyɛɛ ye nɔ. Nyɛ ko fa kue ha mawu kpa komɛ, nɛ a ko nu a biɛhi tete po ngɛ nyɛ nya.

Nyami ligbi ngua etɛ

(<x>20 34:18-26</x>; <x>50 16:1-17</x>)

14 “Moo ye nyami be slɔɔto etɛ ha mi ngɛ jeha mi.

15 ⓝ Kekleekle nɔ́ ji Abolokplolo nyami be. Kaa bɔ nɛ i fa mo ɔ, o maa ye nyami be nɛ ɔ daa jeha ngɛ kekleekle nyɔhiɔ nɛ a tsɛɛ Abib ɔ mi; ejakaa jamɛ a be ɔ mi nɛ o je Egipt ɔ nɛ. O maa ye abolo kplolo ligbi kpaago, nɛ nɔ ko kó ba ye hɛ mi kɛ e dɛ gu.

16 ⓞ “Nyami be enyɔne ɔ ji Ngmakpami nyami be. Ngɔɔ níhi nɛ o du ngɛ o ngmɔ mi ɔ kekleekle yiblii kɛ ba sã bɔ kɛ ye Ngmakpami nyami be. “Nyami be etɛne nɛ ɔ ji Gbasisihimi nyami be. O maa ye nyami be nɛ ɔ jeha a nyagbe, benɛ o ngɛ o ngmɔ nɔ ní ɔmɛ a nya buae.

17 Daa jeha a, o ma a mi nyumu ɔmɛ tsuo nɛ a ba bua si etɛ ngɛ imi Yawɛ, o Mawu ɔ, ye hɛ mi.

18 “Koo ngɔ masa nɔ́ ko kɛ piɛ bɔ sami muɔ ko he kɛ ba ye hɛ mi; lohwe zɔ nɛ a kɛ sã bɔ ha mi nyami be ɔ, ko ha je nɛ na yi.

19 ⓟ “Daa jeha a, ngɔɔ o zugba a nɔ kekleekle yiblii kɛ ba imi Yawɛ, o Mawu ɔ, ye we ɔ. “Koo hoo apletsi bi ngɛ e nyɛ nyɔ nyu mi.

Siwohi kɛ slɔmihi

20 “Hyɛ, i ngɛ bɔfo ko tsɔe kɛ nyɛɛ o hɛ mi, nɛ e bu o he ngɛ blɔ ɔ nɔ hluu kɛ yaa si he nɛ i dla ngɔ to mo ɔ.

21 Moo bu lɛ, nɛ o nu e gbi, nɛ o ko tsɔ e hɛ mi atuã; ejakaa imi nɛ i tsɔ lɛ, nɛ e kɛ nyɛ tɔmi ɔmɛ be nyɛ pae.

22 Se ke o bu lɛ tue kɛ pi si, nɛ o pee nɔ́ tsuaa nɔ́ nɛ i fa mo ke o pee ɔ, lɛɛ i kɛ o he nyɛli ɔmɛ, kɛ o futsɛmɛ ɔmɛ tsuo maa to ní.

23 Ye bɔfo ɔ maa nyɛɛ o hɛ mi kɛ yaa su Amor bi, Hit bi, Periz bi, Kanaan bi, Hiv bi, kɛ Yebus bi ɔmɛ tsuo a zugba a nɔ; nɛ ma kpata a hɛ mi.

24 Ko kpla si ha a mawu ɔmɛ; ko ja mɛ, nɛ a jami kusumi ní ɔmɛ hu koo pee. Se mohu, o ywia a mawu ɔmɛ, nɛ o ku a wɔ titima amɛ dukuduku kɛ pue si.

25 O ma ja imi Yawɛ, o Mawu ɔ, nɛ ma gbaa mo kɛ nya mi ngma, kɛ nyu, nɛ o be hiɔ nue.

26 Yo ko mi be sanee, nɛ yo ko hu be yosa pee ngɛ zugba a nɔ. Ma ha o wami se maa kɛ.

27 “Ma tsuaa ma nɛ o ma pã nɔ ɔ, ma ha sawale maa nu ma mi bi ɔmɛ tsuo. Ni nɛmɛ nɛ maa te si kɛ wo mo ɔ, ma ha a kpɛti maa pee basabasa; nɛ ma ha o he nyɛli ɔmɛ tsuo maa tu o nya fo.

28 Ma ha nɛ adodongmatsihi maa nyɛɛ o hɛ mi, nɛ a maa fie Hiv bi, Kanaan bi, kɛ Hit bi ɔmɛ kɛ je o blɔ ɔ nɔ.

29 I be mɛ fiee kɛ je zugba a nɔ ngɛ jeha kake mi, bɔ nɛ pee nɛ zugba a nɛ ko fɔ si gu, nɛ nga mi lohwehi ko ba hiɛ tsɔ ha mo.

30 I ma hi mɛ fie bɔɔ bɔɔ bɔɔ kɛ je o blɔ nɔ kɛ yaa si be nɛ nyɛ he maa hiɛ, nɛ nyɛ nine maa su zugba a nɔ.

31 Ma bli o huzu ɔmɛ a mi kɛ je Wo Tsu ɔ nya kɛ ya su Mediterenia wo ɔ nya; jehanɛ hu, kɛ je nga a nɔ kɛ ya pi Yufrate pa a. Ma ngɔ zugba a nɔ bi ɔmɛ kɛ wo o dɛ mi, nɛ o maa fie mɛ kɛ je o blɔ nɔ.

32 O kɛ mɛ, loo a mawu ɔmɛ ko so somi ko.

33 Ko ha nɛ a hi o zugba a nɔ; ke o pee ja a, a ma ha nɛ o maa pee yayami kɛ si mi; ejakaa ke o ya sɔmɔ a mawu ɔmɛ pɛ kɛkɛ lɔ ɔ plɛ pee klama nɛ a tsɔ mo.”