Mose II, 13

A ngɔ kekleekle bimɛ ngɔ to ha Yawɛ

1 Yawɛ de Mose ke,

2 ⓗ “Moo ngɔ kekleekle binyumu ɔmɛ tsuo ngɔ to ha mi. Binyumu tsuaa binyumu nɛ bliɔ fɔmi nya ngɛ Israel bi ɔmɛ a kpɛti ɔ, nɔmlɔ bi jio, lohwe bi jio, ye nɔ ji lɛ.”

Abolokplolo nyami be

3 Mose de ma a ke, “Nyɛ kai kikɛmɛ a ligbi nɛ ɔ nɛ nyɛ hia kɛ je Egipt, kɛ je nyɔguɛ yemi sisi ɔ. Ligbi nɛ ɔ nɛ Yawɛ kɛ he wami kpetekpleenyɛ je nyɛ kɛ je lejɛ ɔ nɛ. Nyɛ ko ye masa ní ngɛ ligbi nɛ ɔ nɔ.

4 Mwɔnɛ ligbi nɛ ɔ, nyɛ ngɛ hiae kɛ ngɛ Egipt jee ngɛ kekleekle nyɔhiɔ, Abib ɔ mi.

5 Ke Yawɛ kɛ nyɛ ya su zugba kpakpa, zugba nɛ kle nɛ baa ní ɔ nɔ ɔ, nyɛɛ ye nyami be nɛ ɔ ngɛ nyɔhiɔ nɛ ɔ mi daa jeha. Kanaan bi, Hit bi, Amor bi, Hiv bi, kɛ Yebus bi a zugba a nɛ Yawɛ ka nyɛ nɛmɛ kita ke e ma ha nyɛ ɔ nɛ i ngɛ tsɔɔe ɔ nɛ.

6 Nyɛɛ ye abolo kplolo ligbi kpaago, se ligbi nɛ ji kpaago ɔ lɛɛ nyɛ nya kɛ wo Yawɛ hɛ mi nyami.

7 Á ye abolo kplolo ligbi kpaago ɔmɛ tsuo. A ko na masa abolo ko ngɛ nyɛ dɛ mi, nɛ a ko na masa ko ngɛ nyɛ huza a nɔ he ko he ko.

8 Jamɛ a ligbi ɔ, nyɛ ma de nyɛ bimɛ ɔmɛ ke nɔ́ nɛ Yawɛ pee ha wɔ be nɛ wa hia kɛ je Egipt zugba a nɔ ɔ he je nɛ wa ngɛ nɔ́ nɛ ɔ pee ɔ nɛ.

9 Nɛ enɛ ɔ maa pee kaa okadi ngɛ nyɛ nine he, kɛ nyɛ hɛ nya, konɛ Yawɛ mlaa a nɛ hi nyɛ nya daa; ejakaa he wami kpetekpleenyɛ nɛ Yawɛ kɛ je nyɛ kɛ je Egipt.

10 Lɔ ɔ he ɔ, nyɛɛ pee kusumi nɛ ɔ daa jeha be nɛ a to ɔ.

Bitɛte

11 “Ke Yawɛ kɛ nyɛ ba Kanaan zugba a nɔ kaa bɔ nɛ e ka nyɛɛ kɛ nyɛ nɛmɛ ɔmɛ kita ke e maa pee ɔ,

12 ⓘ nyɛɛ gbaa bitɛte tsuaa bitɛte nɛ bliɔ fɔmi nya a nɔ kɛ ha Yawɛ.

13 Nyɛ teji kekleekle bi ku lɛɛ nyɛ maa ngɔ jijɔ kɛ dani lɛ. Nɛ ke nyɛ be suɔe nɛ nyɛ dani lɛ ɔ, lɛɛ nyɛ maa ku e kuɛ. Bitɛte tsuaa bitɛte ngɛ nyɛ binyumu ɔmɛ a kpɛti ɔ, nyɛ dani lɛ.

14 Hwɔɔ se ke nɔ ko binyumu bi lɛ ke mɛni ji kusumi nɛ ɔ sisi ɔ, e de lɛ ke, ‘Yawɛ kɛ he wami kpetekpleenyɛ je wɔ kɛ je nyɔguɛ yemi sisi ngɛ Egipt.

15 Benɛ Farao ɔ kplii e tsui nɛ e kplɛɛ we kaa waa ho ɔ, Yawɛ gbe Egipt kekleekle bimɛ tsuo; nimli a bitɛtehi, kɛ lohwehi a kekleekle bihi. Enɛ ɔ he ɔ, lohwe ku tsuaa lohwe ku nɛ bliɔ fɔmi nya a, i kɛ sãã bɔ ngɔ haa Yawɛ; se ye bitɛte ɔmɛ lɛɛ i danii mɛ.

16 Kusumi nɛ ɔ maa pee okadi ngɛ o nine he, kɛ o hɛ nya, ejakaa he wami kpetekpleenyɛ nɛ Yawɛ kɛ je wɔ kɛ je Egipt.’ ”

Yawɛ nyɛɛ Israel bi ɔmɛ a hɛ mi

17 Benɛ Farao ɔ ha nɛ Israel bi ɔmɛ je ɔ, Mawu kpakaa we mɛ kɛ gu blɔ kpiti ɔ nɛ gu Filisti bi ɔmɛ a zugba a mi ɔ. Mawu de ke, “Ke ta ba na ma nɛ ɔ pɛ, ke o li peemi ɔ, a yi mi ma plɛ, nɛ a maa kpale kɛ ho Egipt ya.”

18 Lɔ ɔ he ɔ, Mawu kpaka mɛ kɛ ya lɔgɔ si kɛ gu nga nɔ blɔ ɔ ngɛ Wo Tsu ɔ he. Israel bi ɔmɛ dla a he kɛ ha ta, benɛ a hia kɛ je Egipt zugba a nɔ ɔ.

19 ⓙ Mose ngɔ Yosef wuhi kɛ ho; ejakaa Yosef ka Israel bi ɔmɛ kita, nɛ e de mɛ ke, “Bɔ tsuaa bɔ nɛ pee ɔ, Mawu ma ba je nyɛ. Ke jamɛ a be ɔ su ɔ, nyɛɛ ngɔ ye wuhi kɛ je hiɛ ɔ kɛ to dɛ kɛ ho.”

20 Nɛ a hia kɛ je Sukot, nɛ a ya to si ngɛ Etam ngɛ nga a nya.

21 Piani ɔ, Yawɛ nyɛɛɔ a hɛ mi ngɛ bɔku titima mi nɛ e kɛ tsɔɔ mɛ blɔ. Nyɔ mi lɛɛ e nyɛɛɔ a hɛ mi ngɛ la titima mi nɛ e kɛ haa a hyɛɛ nɔ́, konɛ a nyɛ nɛ a nyɛɛ nyɔ kɛ pia.

22 Piani ɔ, bɔku titima a ngɛ ma a hɛ mi, nɛ nyɔ mi ɔ, la titima a ngɛ ma a hɛ mi.