Mose II, 1

A wa Israel bi ɔmɛ yi mi ngɛ Egipt

1 ⓐ Yakob, nɛ a tsɛɛ lɛ Israel ɔ binyumuhi nɛ e kɛ ba Egipt ɔ, a biɛhi ji nɛ ɔmɛ nɛ: Ruben, Simeon, Levi, Yuda, Isakar, Zebulun, Benyamin, Dan, Naftali, Gad, kɛ Asher. A ti nɔ tsuaa nɔ kɛ e yo kɛ e bimɛ ba.

2

3

4

5 Yakob nina tsuo a yibɔ ji nyingmi kpaago; Yosef lɛɛ e ngɛ Egipt momo.

6 Be ko se ɔ, Yosef kɛ e nyɛmimɛ ɔmɛ, kɛ jamɛ a yi nɔ bi ɔmɛ tsuo ba gbo.

7 ⓑ Se a nina nɛ ji Israel bi ɔmɛ ɔ, bi ngɛ a he; a fɔ babauu nɛ a he hiɛ, nɛ a hyi zugba a nɔ tɔ. A he hu wa saminya.

8 ⓒ Jehanɛ ɔ, matsɛ he ko ba bɔni tsɛ yemi ngɛ Egipt, nɛ lɛɛ e li Yosef.

9 E de e ma mi bi ɔmɛ ke, “Tse nyɛ na kaa Israel bi ɔmɛ hiɛ tsɔ, nɛ a he hu wa saminya.

10 ⓓ Nyɛ ha waa to a he ga, ke pi ja a, a ma ba hiɛ tsɔ pe nine, nɛ ke ta ko ba a, a ma ya piɛ wa he nyɛli ɔmɛ a he, nɛ a kɛ wɔ maa hwu, nɛ a maa tu fo kɛ je.”

11 Lɔ ɔ he ɔ, Egipt bi ɔmɛ ngɔ nyɔguɛhi a nɔ yeli ngɔ to Israel bi ɔmɛ a nya, konɛ a wa mɛ yi mi kɛ ní tsumihi nɛ he wa. Israel bi ɔmɛ ma Pitom kɛ Rameses, nɛ ji mahi nɛ a toɔ ní ngɛ a mi kɛ ha Farao ɔ.

12 Se si abɔ nɛ a ngɛ mɛ yi mi wae ɔ, si abɔ nɛ a ngɛ hiɛe nɛ a ngɛ gbɛe kɛ ngɛ zugba a nɔ hae. Egipt bi ɔmɛ ye Israel bi ɔmɛ gbeye.

13 A ha nɛ Israel bi ɔmɛ tsu ní kaa nyɔguɛhi.

14 A hɛɛ zu, a peeɔ bliikisi, nɛ a tsuɔ ngmɔ ní tsumi slɔɔtohi; nɛ ní tsumi ɔ eko tsuaa eko mi ɔ, a waa mɛ yi mi wawɛɛ.

15 Kɛkɛ nɛ Egipt matsɛ ɔ kɛ Hebri fɔliyi ɔmɛ tu, nɛ e de mɛ ke, “Ke nyɛ ngɛ Hebri yi ɔmɛ fɔe ɔ, nyɛɛ to bi ɔ he hɛ. Ke nyumu ɔ, nyɛɛ gbe lɛ, se ke yo ɔ, lɛɛ e hi je mi.” Hebri fɔliyi ɔmɛ a ti nɔ kake biɛ ji Shifra, nɛ nɔ kake hu biɛ ji Pua.

16

17 Se fɔliyi ɔmɛ yee Mawu gbeye; a gbi binyumuwi ɔmɛ kaa bɔ nɛ Egipt matsɛ ɔ fa mɛ ɔ; mohu ɔ, a baa a yi.

18 Lɔ ɔ he ɔ, Egipt matsɛ ɔ tsɛ fɔliyi ɔmɛ nɛ e bi mɛ ke, “Mɛni he je nɛ nyɛ ha nɛ jokuɛwi nyumuwi ɔmɛ tlɔ je mi, nɛ nyɛ gbi mɛ ɔ?”

19 Fɔliyi ɔmɛ de Farao ɔ ke, “Hebri yi ɔmɛ be kaa Egipt yi ɔmɛ; mɛɛ lɛɛ a he wa saminya, nɛ a fɔmi ɔ sɔɔ. Loko fɔlɔyo ko ke e suu a ngɔ ɔ, a fɔ momo.”

20 Akɛnɛ fɔliyi ɔmɛ yee Mawu gbeye he je ɔ, Mawu gbaa mɛ, nɛ e ha mɛ nitsɛmɛ bimɛ. Israel bi ɔmɛ hu fɔ babauu, nɛ a he wa.

21

22 ⓔ Kɛkɛ nɛ Farao ɔ wo e ma mi bi ɔmɛ tsuo mlaa ke, “Binyumu tsuaa binyumu nɛ Hebri no ko ma fɔ ɔ, nyɛ ya sake lɛ ngɔ fɔ Nilo pa a mi; se biyo tsuaa biyo lɛɛ nyɛ ha nɛ e yi nɛ na wami.”