Ester 8

A de Yuda bi ɔmɛ ke a fa a he

1 Jamɛ a ligbi ɔ nɔuu ɔ, Matsɛ Ahasuerus ngɔ Yuda bi ɔmɛ a he nyɛlɔ, Haman weto ní tsuo ngɔ ha Manyɛ Ester. Akɛnɛ Ester de matsɛ ɔ ke e weku no ji Mordekai he je ɔ, kɛ je jamɛ a be ɔ kɛ yaa a, a ngmɛɔ Mordekai blɔ nɛ e baa matsɛ ɔ ngɔ.

2 Matsɛ ɔ ngɔ e nine nguɛ ga nɛ womi nya sɔumi nɔ́ ngɛ nɔ ɔ ngɔ ha Mordekai, (Jinɛ Haman nɛ hyɛɛ nɔ). Ester ngɔ Mordekai ngɔ to Haman ní ɔmɛ a nya.

3 Ester kɛ matsɛ ɔ tu munyu. E kpla si kɛ e hɛ mi vo nyu ngɛ matsɛ ɔ nane nya, nɛ e kpa lɛ pɛɛ ke e pee nɔ́ ko kɛ tsi yi mi tomi yaya nɛ Agag nina Haman to ngɛ Yuda bi ɔmɛ a he ɔ nya.

4 Matsɛ ɔ kɛ matsɛ tso nɛ a kɛ sika tsu pee ɔ tsɔɔ manyɛ ɔ, kɛkɛ nɛ e te da si, nɛ e de lɛ ke,

5 “Ke nɛnɛ suɔ ye sane, nɛ e sa nɛnɛ hɛ mi, nɛ e da ha lɛ ɔ, lɛɛ i kpa nɛnɛ pɛɛ, nɛ e ha nɛ a fiɛ kɛ tsi mlaa yaya nɛ Agag nina, Hamedata bi Haman wo ɔ nya. Mlaa a ke a kpata Yuda bi tsuo a hɛ mi ngɛ nɛnɛ nɔ yemi he ɔmɛ tsuo.

6 Ke amanehlu nɛ ɔ ba ma a nɔ, nɛ́ a ma kpata imi nitsɛ ye nyɛmimɛ a hɛ mi ɔ, kɛ ma pee kɛɛ?”

7 Kɛkɛ nɛ Matsɛ Ahasuerus de Manyɛ Ester kɛ Mordekai, Yuda no ɔ ke, “Nyɛɛ hyɛ, i ha a sɛu Haman ngɛ yi mi yaya nɛ e to ngɔ wo Yuda bi ɔmɛ a he ɔ he, nɛ i ngɔ e weto ní ngɔ ha Manyɛ Ester.

8 Se ke a ngma fiɛmi ko ngɛ matsɛ ɔ biɛ mi, nɛ a sɔu nya kɛ matsɛ ɔ womi nya sɔumi nɔ́ ɔ, a kpale we se, ja a ye nɔ. Lɔ ɔ he ɔ, ke nyɛ suɔ ɔ, nyɛ nitsɛmɛ nyɛɛ ngma Yuda bi ɔmɛ womi ngɛ ye biɛ mi, nɛ nyɛ de nɔ́ tsuaa nɔ́, konɛ nyɛɛ ngɔ ye womi nya sɔumi nɔ́ ɔ kɛ sɔu nya.”

9 Nyɔhiɔ nɛ a tsɛɛ Sivan, nɛ ji nyɔhiɔ etɛne ɔ we ligbi nɛ ji nyingmi enyɔ kɛ etɛ ɔ nɔ sane nɛ ɔ ba a nɛ. Mordekai tsɛ matsɛ womi ngmali ɔmɛ, nɛ e tsɔɔ mɛ nɔ́ nɛ a ngma; nɛ a ngma ja pɛpɛɛpɛ. A ngma womi ɔ kɛ ya ha Yuda bi ɔmɛ, amlaalo ɔmɛ, ma nɔ hyɛli ɔmɛ, kɛ ganɔ ɔmɛ tsuo nɛ ngɛ e nɔ yemi he lafa kɛ nyingmi enyɔ kɛ kpaago ɔmɛ, kɛ je India kɛ ya su Sudan ɔ. A ngma womi ɔmɛ ngɛ zugba tsuaa zugba e gbi, kɛ e ningma mi.

10 Mordekai hyɛ nɛ a ngma womi ɔmɛ ngɛ Matsɛ Ahasuerus biɛ mi, nɛ a sɔu nya kɛ matsɛ ɔ womi nya sɔumi ga a. Tsɔli nɛ hi okpɔngɔhi nɛ le fo tumi saminya a nɔ ya dla womi ɔmɛ kɛ fo. A hla okpɔngɔ ɔmɛ kɛ je matsɛ ɔ nitsɛ we okpɔngɔ tsu ɔmɛ a mi.

11 A ngma ngɛ womi nɛ ɔmɛ a mi ke matsɛ ɔ ngmɛ Yuda bi ɔmɛ blɔ ngɛ ma tsuaa ma mi kaa á to blɔ nya kɛ plee a wami he. Ke ta buli ba tua mɛ ɔ, á da si nɛ a kɛ he nyɛli ɔmɛ nɛ hwu, nɛ́ a kpata a hɛ mi. Á kpata a yi ɔmɛ, kɛ a bimɛ ɔmɛ hu a hɛ mi, nɛ́ e ko piɛ nɔ kake po; nɛ́ a ha a níhi.

12 Ligbi ɔ nɛ a to nɛ a kpata Yuda bi ɔmɛ a hɛ mi ngɛ Matsɛ Ahasuerus nɔ yemi he ɔmɛ tsuo ɔ, jamɛ a ligbi ɔ nɔuu mlaa nɛ ɔ ma bɔni ní tsumi. Ligbi nɛ ɔ ji nyɔhiɔ nyɔngma kɛ enyɔne ɔ nɛ a tsɛɛ Adar a we ligbi nɛ ji nyɔngma kɛ etɛ ɔ.

13 Mlaa a tsɔɔ kaa á fiɛ blɔ nya tomi nɛ ɔ ngɛ nɔ yemi he ɔmɛ, bɔ nɛ pee nɛ Yuda bi ɔmɛ tsuo nɛ a dla a he kɛ to, konɛ ke be ɔ su ɔ, a kɛ a he nyɛli ɔmɛ nɛ hwu, nɛ a kɛ ye a he lue.

14 Kaa bɔ nɛ matsɛ ɔ fa a, tsɔli nɛ a he sɔɔ kuɔ okpɔngɔhi esɔesɔ kɛ ho ma amɛ a nɔ ya. A fiɛ mlaa nɛ ɔ ngɛ matsɛ ma Susa a hulɔ.

15 Benɛ Mordekai je matsɛ we ɔ kɛ ma a, e wo ablade tade bluu kɛ futaa, nɛ sika tsu jlasi ngɛ e yi. E wo ablade tade wuyaa nɛ a kɛ kɔbɛi kpa kpakpa lo hulɔ. Kɛkɛ nɛ a he ose ngɛ Susa ma a mi; nɛ blɔ ɔmɛ tsuo a nɔ pee hoo kɛ bua jɔmi.

16 Yuda bi ɔmɛ a bua jɔ kaa a je haomi mi, nɛ a nya ejakaa a hɛ mi ba nyami.

17 Ma tsuaa ma mi, ngɛ nɔ yemi he ɔmɛ tsuo, he nɛ a maa kane matsɛ ɔ fiɛmi ɔ ngɛ ɔ, Yuda bi ɔmɛ tsuo a bua jɔɔ a he, nɛ a yeɔ nyami ligbi; a tsɛɔ ní yemi, nɛ a nyaa wawɛɛ. Anɔkuale mi ɔ, ni kpahi babauu ba pee a he Yuda bi, ejakaa jehanɛ lɛɛ, a ngɛ Yuda bi ɔmɛ gbeye yee.