Ester 2

Ester ba ye manyɛ

1 Pee se, benɛ matsɛ ɔ tsui jɔ ɔ, e kai nɔ́ nɛ Vashti pee ɔ, kɛ mlaa nɛ e wo ngɛ e he ɔ.

2 Kɛkɛ nɛ e ga woli kpakpa amɛ a ti ni komɛ de lɛ ke, “Nɛnɛ, ha nɛ a hla yihewi komɛ nɛ a he ngɛ fɛu ba ha mo.

3 Ha nɛ a to nihi ngɛ o nɔ yemi he ɔmɛ tsuo, nɛ a bua yihewi nɛ a he ngɛ fɛu nɛ ɔ a nya kɛ ba matsɛ yi ɔmɛ a hi he ɔ, ngɛ matsɛ we ɔ ngɛ Susa. Ha nɛ Hegai, nyumu nɛ a puɛ lɛ, nɛ hyɛɛ o yi ɔmɛ a nɔ ɔ nɛ hyɛ a nɔ. Ha nɛ a pɔ mɛ nu kɛ dla mɛ saminya.

4 Lɔ ɔ se ɔ, ngɔɔ yiheyo nɛ o suɔ pe kulaa ngɛ a kpɛti, nɛ o wo lɛ manyɛ ngɛ Vashti nane mi.” Ga nɛ a wo nɛ ɔ sa matsɛ ɔ hɛ mi, nɛ e pee ja.

5 Yuda no ko hi Susa ma a mi nɛ a tsɛɛ lɛ Mordekai. E je Benyamin wɛtso ɔ mi. E tsɛ biɛ ji Yair, e nɛ̃ ji Simei, nɛ e nɛnɛkasowa ji Kish.

6 ⓑ Benɛ Babilon matsɛ, Nebukadnezar ba nuu Yuda matsɛ, Yehoyakin, kɛ ni komɛ ngɛ Yerusalem kɛ ho ɔ, Mordekai hu piɛ he.

7 Mordekai tsɛ nyɛminyumu ngɛ bi yiheyo ko nɛ a tsɛɛ lɛ Ester; e Hebri biɛ ji Hadasa. E ji yiheyo nɛ he ngɛ fɛu, nɛ zangma pue e nɔ. Benɛ e tsɛ kɛ e nyɛ gbo ɔ, Mordekai ngɔ lɛ kaa lɛ nitsɛ e bi nɛ e hyɛ lɛ.

8 Benɛ matsɛ ɔ mlaa a je kpo ɔ, a ngɔ yihewi babauu kɛ ba Susa; nɛ Ester hu piɛ a he kɛ ba matsɛ we ɔ. A kɛ lɛ wo Hegai nɛ hyɛɛ matsɛ yi ɔmɛ a nɔ ɔ dɛ, nɛ́ e hyɛ e nɔ.

9 Hegai suɔ Ester sane, nɛ e na e he bua jɔmi. E yi be ko nɛ e ha a bɔni lɛ nu pɔmi nɛ a kɛ dla lɛ; a ha lɛ niye ní kpakpa hulɔ. Hegai ngɔ Ester ya to he ko nɛ hi pe kulaa ngɛ matsɛ yi ɔmɛ a hi he ɔ, nɛ e je blɔ hla yihewi kpaago kɛ je matsɛ we ɔ, nɛ́ a sɔmɔ lɛ.

10 Be nɛ ɔ mi tsuo ɔ, kaa bɔ nɛ Mordekai wo lɛ ga a, Ester ha we nɛ a le kaa Yuda no ji lɛ.

11 Daa ligbi ɔ, Mordekai ya slaa si ngɛ kue ɔ nɛ ngɛ matsɛ yi ɔmɛ a hi he ɔ hɛ mi, nɛ e kɛ hyɛɔ kaa Ester ngɛ saminya, aloo sane ko ba e nɔ lo.

12 Bɔ nɛ a peeɔ kɛ dlaa yi ɔmɛ a he nɛ a he peeɔ fɛu ji nɛ ɔ nɛ: a pɔɔ mɛ nu, nɛ a kpaa mɛ mimɛ nyɔhiɔ ekpa; nɛ a pɔɔ mɛ nu kɛ e he via nyɔhiɔ ekpa ekohu; lɛ tsuo peeɔ jeha kake. Lɔ ɔ se ɔ, a toɔ be ha yihewi ɔmɛ, nɛ a kɛ mɛ yaa Matsɛ Ahasuerus ngɔ kakaaka.

13 Ke e su be nɛ yiheyo ko maa je yi ɔmɛ a hi he ɔ kɛ ya matsɛ we ɔ, a ma ha lɛ nɔ́ tsuaa nɔ́ nɛ e suɔ nɛ e kɛ dla e he.

14 E maa ya matsɛ we ɔ gbɔkuɛ, nɛ ke je na mɔtu ɔ, a kɛ lɛ maa ya matsɛ yi ɔmɛ a hi he kpa, ya ha Shaashgaz. Shaashgaz nɛ ɔ ji nyumu nɛ a puɛ lɛ nɛ hyɛɛ matsɛ plã amɛ a nɔ. Yiheyo nɛ ɔ be matsɛ ɔ ngɔ yae hu, ja matsɛ ɔ ná e he bua jɔmi, nɛ e wo e biɛ ta, nɛ e tsɔ ke a ya ngɔ lɛ kɛ ba ekohu.

15 E ba su Ester nɔ kaa e ya matsɛ ɔ ngɔ. Mordekai tsɛ nyɛminyumu Abihail biyo ji Ester. Mordekai nɛ hyɛ Ester nɔ kaa lɛ nitsɛ e biyo. Nɔ tsuaa nɔ nɛ maa na Ester a suɔ e sane. Benɛ e maa ya matsɛ ɔ ngɔ ɔ, Ester dla e he kɛ nɔ́ nɛ Hegai wo lɛ ga ke e kɛ dla e he ɔ pɛ; e bi we nɔ́ ko kɛ piɛ we he. Hegai nɛ ɔ ji nyumu nɛ a puɛ lɛ nɛ hyɛɛ matsɛ yi ɔmɛ a nɔ.

16 Benɛ Matsɛ Ahasuerus ngɛ tsɛ yee ɔ we jeha kpaagone ɔ we nyɔhiɔ nyɔngmane ɔ nɛ a kɛ Ester ba e ngɔ ngɛ matsɛ we ɔ nɛ. Nyɔhiɔ nɛ ɔ biɛ ji Tebet.

17 Matsɛ ɔ suɔ Ester pe yihewi kpa amɛ tsuo, nɛ e bua jɔ Ester he pe mɛ tsuo. Matsɛ Ahasuerus ngɔ jlasi ɔ ngɔ bu Ester, nɛ e wo lɛ manyɛ ngɛ Vashti nane mi.

18 Lɔ ɔ se ɔ, matsɛ ɔ tsɛ e ganɔ ɔmɛ, kɛ e tsɔli ɔmɛ ní yemi ko nɛ sɔ saminya, nɛ e kɛ wo Manyɛ Ester hɛ mi nyami. E ha a fiɛ ngɛ e nɔ yemi he ɔmɛ tsuo ke a jɔɔ a he; nɛ e dla nike ní bɔ nɛ sa matsɛ ngɔ ha mɛ.

Mordekai he matsɛ ɔ yi wami

19 Benɛ a ma bua yihewi ɔmɛ a nya si enyɔne ɔ, jamɛ a be ɔ, matsɛ ɔ ha Mordekai ba pee tsɔlɔ nɔkɔtɔma.

20 Mordekai wo Ester ga ke e ko ha nɛ nɔ ko nɛ le kaa Yuda no ji lɛ. Ester hu bu lɛ tue kaa bɔ nɛ e peeɔ benɛ e ji jokuɛyo nɛ Mordekai ngɛ e nɔ hyɛe ɔ. Lɔ ɔ he ɔ, kɛ ba su be nɛ ɔ mi tsuo ɔ, nɔ ko nɔ ko li kaa Yuda no ji lɛ.

21 Benɛ Mordekai ba pee nɔkɔtɔma ngɛ matsɛ we ɔ, ligbi ko ɔ, matsɛ we ɔ agbo nya buli enyɔ komɛ a mi mi fu matsɛ ɔ, nɛ a so ke a maa gbe lɛ. Nimli nɛ ɔmɛ ji nyumuhi nɛ a puɛ, nɛ a tsuɔ ní ngɛ matsɛ we ɔ. Nɔ kake biɛ ji Bigtana, nɛ nɔ kake hu biɛ ji Teresh.

22 Mordekai nu nɔ́ nɛ ɔ he, nɛ e ya sɛɛ ha Manyɛ Ester, nɛ lɛ hu e ya de matsɛ ɔ nɔ́ nɛ Mordekai ba de lɛ ɔ.

23 Benɛ a hla sane ɔ mi ɔ, a na kaa sane ɔ ngɛ mi niinɛ. Lɔ ɔ he ɔ, a sɛu ni enyɔ nɛ ɔmɛ. Matsɛ Ahasuerus fa nɛ a ngma sane nɛ ɔ ngɔ wo e yi nɔ sanehi womi ɔ mi.