Nehemia 8

Ezra kane mlaa a ha ma a

1 Nyɔhiɔ kpaago ɔ mi ɔ, Israel bi ɔmɛ ba he si ngɛ a ma amɛ a mi. Jamɛ a nyɔhiɔ ɔ kekleekle ligbi ɔ, ma a tsuo ba bua a he nya ngɛ Yerusalem, ngɛ ma kpe he ɔ, ngɛ Nyu Agbo ɔ nya. A de osɔfo Ezra, mlaa tsɔɔlɔ ɔ ke e ngɔ womi ɔ nɛ mlaa a nɛ Yawɛ ha Israel kɛ gu Mose nɔ ɔ ngɛ mi ɔ kɛ ba.

2 Kɛkɛ nɛ Ezra ya ngɔ mlaa womi ɔ kɛ ba he nɛ ma a kpe ngɛ ɔ. Nihi babauu nitsɛ nɛ ba kpe: nyumuhi, yihi, kɛ jokuɛwi nɛ hɛ mi fa bɔ nɛ a maa nu nɔ́ sisi.

3 Ezra kane mlaa a kɛ ha mɛ ngɛ ma kpe he ɔ, ngɛ Nyu Agbo ɔ nya kɛ je mɔtu ma kɛ ya si piani. Ma a tsuo bu tue saminya.

4 Mlaa tsɔɔlɔ Ezra ya da si ngɛ kpoku ko nɔ. Kpoku nɛ ɔ, a je blɔ nɛ a kɛ tso pee kɛ ha kpe ɔ peemi. Jamɛ a be ɔ mi ɔ, Matitia, Shema, Anaya, Uria, Hilkia, kɛ Maaseya hiɔ daa si ngɛ e hiɔ nɔ, nɛ Pedaya, Mishael, Malkiya, Hashum, Hashbadana, Zekaria kɛ Meshulam daa si ngɛ e muɔ nɔ.

5 Benɛ Ezra ya daa si ngɛ kpoku ɔ nɔ ɔ, e ya hiɔwe pe ma a tsuo nɛ pueɔ si ɔ. Kɛkɛ nɛ e bli womi ɔ nya, nɛ ma a tsuo te da si.

6 Jehanɛ Ezra de ke, “Nyɛ je Yawɛ Mawu kpetekpleenyɛ ɔ yi!” Ma a tsuo wo a nine nɔ nɛ a he nɔ ke, “Amen! Amen”. Kɛkɛ nɛ a kpla si nɛ a kɛ a hɛ mi bu si nɛ a ja Yawɛ.

7 Jehanɛ, a te da si ngɛ he nɛ a ngɛ ɔ, nɛ Levi bi nɛ ɔmɛ tsɔɔ mɛ mlaa a sisi fitsofitso. Mɛ ji Yeshua, Bani, Sherebia, Yamin, Akub, Shabetai, Hodia, Maaseya, Kelita, Azaria, Yozabad, Hanan, kɛ Peleya.

8 A je blɔ kane Mawu mlaa a, nɛ a tsɔɔ sisi fitsofitso, bɔ nɛ pee nɛ ma a tsuo nɛ nu sisi.

9 Benɛ ma a tsuo nu mlaa a mi munyu ɔmɛ ɔ, a wo yana. Se Nehemia, amlaalo ɔ, kɛ osɔfo Ezra, mlaa tsɔɔlɔ ɔ, kɛ Levi bi ɔmɛ nɛ ngɛ mlaa a sisi tsɔɔe ɔ de ma a tsuo ke, “Mwɔnɛ ligbi nɛ ɔ ji ligbi klɔuklɔu ha Yawɛ, nyɛ Mawu ɔ. Lɔ ɔ he ɔ, nyɛ ko ye kɔmɔ, nɛ nyɛ ko wo yana.

10 Mohu nyɛɛ ya nyɛ we ɔmɛ a mi, nɛ nyɛ ya ye ní kpakpa, nɛ nyɛɛ nu wai ngɔngɔɛ. Nyɛ nyɛmimɛ ɔmɛ nɛ a be eko ɔ, nyɛ ha mɛ eko. Mwɔnɛ ligbi nɛ ɔ ji ligbi klɔuklɔu ha Yawɛ nyɛ Mawu ɔ, lɔ ɔ he ɔ, nyɛ ko pee mɔbɔmɔbɔ. Bua jɔmi nɛ Yawɛ ngɛ nyɛ hae ɔ ma ha nɛ nyɛ ma na he wami.”

11 Levi bi ɔmɛ kpa ní ɔmɛ tsuo a nɔ kɛ wo mɛ bua, nɛ a de mɛ ke a ko pee a ní mɔbɔmɔbɔ ngɛ ligbi klɔuklɔu kaa kikɛ nɛ ɔ nɔ.

12 Kɛkɛ nɛ ma a tsuo ho a we ɔmɛ a mi ya. A ya ngmɛ okplɔɔ nɛ a kɛ a sibi ye ní kɛ bua jɔmi, ejakaa a nu nɔ́ nɛ a kane ha mɛ ɔ sisi saminya.

Gbasisihimi nyami be ɔ

13 E nɔ jena a, we puɔ nyatsɛmɛ ɔmɛ, osɔfo ɔmɛ kɛ Levi bi ɔmɛ ba bua a he nya ngɛ Ezra, mlaa tsɔɔlɔ ɔ ngɔ, nɛ a kase mlaa a.

14 ⓖ A na kaa mlaa a nɛ Yawɛ wo kɛ gu Mose nɔ kɛ ha Israel bi ɔmɛ ɔ tsɔɔ kaa a hi gbahi a sisi kɛ ye nyami be nɛ ɔ.

15 Lɔ ɔ he ɔ, a fa nɛ a tsɔ kɛ ya Yerusalem, kɛ ma kpa amɛ a mi, nɛ a ya de nɔ tsuaa nɔ ke, “Nyɛɛ je kpo kɛ ya yoku ɔmɛ a nɔ, nɛ nyɛ ya poo oliv tso, ayɔ nu tso, mɔmɔ tso, tã, kɛ tso kpahi nɛ bɔ kusuu a kɔnihi, nɛ nyɛ kɛ ba ma gbahi kaa bɔ nɛ mlaa a tsɔɔ ɔ.”

16 Lɔ ɔ he ɔ, ni ɔmɛ ya poo tso, nɛ a ba ma gbahi ngɛ a tsu ɔmɛ a yi mi, kɛ a we ɔmɛ a mi, kɛ Mawu we ɔ kpo ɔ nɔ, kɛ ma kpe he ɔmɛ nɛ ngɛ Nyu Agbo ɔ kɛ Efraim Agbo ɔ, nya a.

17 Ni ɔmɛ nɛ kpale kɛ je ma se kɛ ba a tsuo ma gbahi nɛ a hi a sisi. Kɛ je Nun bi Yoshua yi nɔ kɛ ba su jamɛ a be ɔ, a pee we nɔ́ nɛ ɔ eko hyɛ; enɛ ɔ ji kekleekle gbahi, nɛ a ma. Lɔ ɔ he ɔ, mɛ tsuo a nɔ gbagba te, nɛ a bua jɔ wawɛɛ.

18 Kɛ je kekleekle ligbi ɔ nɔ kɛ ya si be nɛ a gbe nyami be ɔ nya a, a kaneɔ Mawu mlaa a fa ko daa ligbi. A ye Gbasisihimi nyami be nɛ ɔ ligbi kpaago, nɛ ligbi kpaanyɔne ɔ, a pee nyagbe kpe kaa bɔ nɛ mlaa a tsɔɔ ɔ.