Nehemia 6

A so ngɔ wo Nehemia he

1 Sanbalat, kɛ Tobia, kɛ Geshem, Arabia no ɔ, kɛ wa he nyɛli ɔmɛ nɛ piɛ a he ɔ nu kaa wa gbe gbogbo ɔ fiami nya, nɛ wa tsi hehi nɛ ku ɔ tsuo; pohu jamɛ a be ɔ mi ɔ, wa mɛ sinya amɛ ngɛ agbo ɔmɛ a nya lolo.

2 Kɛkɛ nɛ Sanbalat kɛ Geshem tsɔ kɛ ba ye ngɔ ke i kɛ mɛ ba kpe ngɛ kɔpe ko mi ngɛ Ono nga a nɔ. A yi mi tomi ji a nine maa su ye nɔ, konɛ a ye mi awi.

3 I tsɔ ya de mɛ ke, I ngɛ ní tsumi nɛ he hia tsue, nɛ i be nyɛe ma ba. “I be ní tsumi kaa kikɛ nɛ ɔ he ngmɛɛe kɛ fɔ si, nɛ ma ba na nyɛ!”

4 A tsɔ kɛ sɛ gbi nɛ ɔ nɔuu kɛ ba si eywiɛ, nɛ imi hu i ha mɛ heto nɛ ɔ nɔuu si eywiɛ ɔmɛ tsuo.

5 Jehanɛ, Sanbalat tsɔ kɛ ba si enuɔne. Tsɔlɔ ɔ hɛɛ sɛ gbi nɛ a ngma ngɛ womi nɛ a sɔu we nya mi kɛ ba.

6 Bɔ nɛ a ngma ji nɛ ɔ nɛ: “Geshem ba de ke huitihuiti ngɛ pɛe ngɛ je ma amɛ a mi kaa o kɛ Yuda bi ɔmɛ to nɛ nyɛ ma tsɔ atuã, nɛ enɛ ɔ he je nɛ o ngɛ gbogbo ɔ fiae ɔ nɛ. E de hu ke o to o yi mi kaa o maa wo o he matsɛ,

7 nɛ jehanɛ, o hla gbali komɛ ngɔ to nɛ a fiɛ ngɛ Yerusalem ke mo ji matsɛ ngɛ Yuda zugba a nɔ. Akɛnɛ bɔ tsuaa bɔ matsɛ ɔ nitsɛ maa nu munyu nɛ ɔ he je ɔ, i suɔ kaa o kɛ mi ba kpe, konɛ wa susu he.”

8 I ha heto kɛ mane lɛ ke, “Nɔ́ nɛ o ngɛ dee ekoeko be mi. Mo nitsɛ lɛ o po de.”

9 Mɛ tsuo a susu kaa a maa wo wa he gbeye, konɛ wa nine mi nɛ jɔ̃, nɛ wa kpa ní ɔ tsumi. Lɔ ɔ he ɔ, i sɔle ke, “Jehanɛ Mawu, moo wo mi he wami koo!”

10 Jamɛ a be ɔ mi nɔuu nɛ i ya slaa Delaya binyumu Shemaya, Mehetabel bibi ɔ nɛ lɛɛ e tlɔ we mi ɔ. E de mi ke, “I kɛ mo wa ya laa ngɛ sɔlemi we ɔ he klɔuklɔu ɔ, nɛ waa ngmɛ sinya amɛ ngɔ wo wa yi, ejakaa a ma nɛ a ba gbe mo. Nyɔ nɛ ɔ mi nɛ a ma ba gbe mo ɔ nɛ.”

11 I he nɔ ke, “Nɔmlɔ nɛ tuu fo ya laa e he ji mi lo? Imi nɛ ɔ, ma ya laa ye he ngɛ sɔlemi we ɔ kɛ he ye yi wami lo? Dɛbi, i be yae.”

12 Benɛ i susu he bɔɔ ɔ, i na kaa Mawu tsɔ we Shemaya ke e ba de mi nɔ́ ko, se mohu Tobia kɛ Sanbalat nɛ a bɔ lɛ apaa ke e ba wo ye he gbeye ja.

13 A bɔ lɛ apaa ke e wo ye he gbeye, konɛ ma pee nɔ́ ko nɛ dɛ, bɔ nɛ pee nɛ a puɛ ye biɛ, nɛ a bɔ mi ahlua.

14 I sɔle ke, “Mawu, i kpa mo pɛɛ nɛ o kai nɔ́ nɛ Tobia kɛ Sanbalat pee ɔ, nɛ o gbla a tue. Mo kai jamɛ a gbalɔyo Nodia, kɛ gbali kpa amɛ nɛ a ka kaa a maa wo ye he gbeye ɔ.”

A gbe ní tsumi ɔ nya

15 Ligbi nyingmi enuɔ kɛ enyɔ se ɔ, a gbe gbogbo ɔ tsuo fiami nya. A gbe nya ngɛ nyɔhiɔ nɛ a tsɛɛ Elul ɔ ligbi nyingmi enyɔ kɛ enuɔne ɔ nɔ.

16 Benɛ wa he nyɛli nɛ ngɛ je mahi nɛ bɔle wɔ kɛ kpe ɔ a mi ɔ nu enɛ ɔ, a ye gbeye, nɛ a nini je a nɔ; ejakaa mɛ tsuo a le kaa wa Mawu ɔ piɛ wa he kɛ tsu ní ɔ.

17 Jamɛ a be ɔ mi tsuo ɔ, Yuda nikɔtɔma amɛ kɛ Tobia hii a sibi womi ngmae.

18 Yuda bi ɔmɛ babauu ngɛ Tobia se, ejakaa Ara binyumu Shekania ngatsɛ ji lɛ. Tsa pi lɔ ɔ he kɛkɛ, se e binyumu Yehohanan hu ngɔ Berekia binyumu Meshulam biyo.

19 Ni komɛ hu ba sɛɛɔ Tobia he ní kpakpa kɛ haa mi, nɛ a ya deɔ lɛ níhi nɛ i deɔ ɔ. Lɔ ɔ he e ngmaa mi womi, konɛ e kɛ wo ye he gbeye.