Nehemia 4

Nehemia ye he nyɛli ɔmɛ a nɔ

1 Benɛ Sanbalat nu kaa wɔ Yuda bi ɔmɛ, wa bɔni gbogbo ɔmɛ fiami ɔ, e mi mi fu wawɛɛ nitsɛ, nɛ e ye wa he fɛu.

2 E de ngɛ e nyɛmimɛ, ɔmɛ kɛ Samaria ta buli ɔmɛ a hɛ mi ke, “Mɛni Yuda bi wudɔwudɔ nɛ ɔmɛ ngɛ pee nɛ ɔ? Ma a gbogbo ɔmɛ nɛ a to a yi mi kaa a maa fia ekohu lo? Anɛ a susu kaa bɔ ɔmɛ nɛ a ngɛ sãe ɔ ma ha a maa ngɔ ligbi kake pɛ kɛ gbe ní tsumi ɔ nya lo? Anɛ a ma nyɛ ma ha gli kokoehi nɛ sã pueɔ si nɛ ɔ ma plɛ pee tsu mami tɛhi lo?”

3 Amon no ɔ nɛ a tsɛɛ Tobia, nɛ daa si ngɛ e ngɔ ɔ hu bi ke, “Mɛni gbogbo a ma nyɛ maa fia?” E ya nɔ nɛ e de ke, “Tsia, kɔkɔbo tete po ma nyɛ ma tsitsɛɛ a gbogbo ɔ ngɔ ko si!”

4 I sɔle ke, “Wa Mawu lee, moo bu bɔ nɛ a ngɛ wa he fɛu yee ɔ tue. Ha nɛ zo nɛ gbe mɛ ngɛ nɔ́ nɛ a pee ɔ he. Ha nɛ a kpɔ a nɔ́ tsuaa nɔ́ ngɛ a dɛ; nɛ a nuu mɛ nyɔguɛ kɛ ya ma se.

5 Koo ngɔ yayami nɛ a pee nɛ ɔ ngɔ pa mɛ, nɛ o hɛ ko je a tɔmi ɔmɛ a nɔ; ejakaa be mi nɛ wa hɛ dɔ kɛ ngɛ gbogbo ɔ fiae ɔ, mɛɛ lɛɛ a ngɛ wɔ ahlua bɔe.”

6 Wa ya nɔ wa fia gbogbo ɔ ekohu. E kɛ we kulaa nɛ wa fia kɛ ta gbogbo ɔ kpɛti; ejakaa ma a hɛ dɔ kɛ wo ní tsumi ɔ he.

7 Sanbalat, Tobia, Arabia bi ɔmɛ, Amon bi ɔmɛ, kɛ Ashdod bi ɔmɛ nu kaa wa ngɛ Yerusalem gbogbo ɔ fiae mlamlaamla, nɛ wa ngɛ puɔ ɔmɛ tsie. Kɛkɛ nɛ a mi mi fu wawɛɛ nitsɛ.

8 Lɔ ɔ he ɔ, mɛ tsuo a so kaa a kɛ Yerusalem maa hwu ta nɛ a gudu lejɛ ɔ.

9 Se wɔɔ lɛɛ wa sɔle nɛ wa tsɛ wa Mawu ɔ, nɛ wa ha nihi bu nyɔ kɛ pia kɛ huɔ mɛ.

10 Yuda bi ɔmɛ a nya nygɛ nɔ ngɛ dee ke, “Pɔ tɔ wɔ kɛ nɔ́ tloomi. Ní kokoe ɔmɛ nɛ wa ma je ɔ hiɛ tsɔ. Kɛ wa ma pee kɛ fia gbogbo ɔ kɛɛ?”

11 Wa he nyɛli ɔmɛ susu kaa wa be mɛ nae, loo wa be nɔ́ nɛ ngɛ nɔ yae ngɛ a kpɛti ɔ lee kɛ yaa si be nɛ a ma ba tua wɔ tlukaa, nɛ a maa gbe wɔ, konɛ ní tsumi ɔ se nɛ po.

12 Se be tsuaa be ɔ, Yuda bi nɛ kɛ wa he nyɛli ɔmɛ ngɛ he kake ɔ ba woɔ wa tue nɔ ngɛ gahi nɛ he nyɛli ɔmɛ ngɛ toe ɔ a he.

13 Lɔ ɔ he ɔ, i ngɔ nihi nɛ hɛɛ klaatehi, akplɔhi, kɛ kɛ̃ɛ̃hi ngɔ to gbogbo ɔmɛ a se hehi nɛ a gbi a fiami nya lolo ɔ. I ha buli nɛ ɔmɛ ya da si weku nya weku nya.

14 Jehanɛ, i na kaa ni ɔmɛ hao; lɔ ɔ he ɔ, i de ma nimeli ɔmɛ, ma ní tsuli ɔmɛ, kɛ ma a tsuo ke, “Nyɛ ko ye wa he nyɛli ɔmɛ gbeye. Nyɛ kai kaa Nyɔmtsɛ ɔ kle, nɛ e he ngɛ gbeye, konɛ nyɛɛ hwu ha nyɛ nyɛmimɛ ɔmɛ, nyɛ bimɛ ɔmɛ, nyɛ yi ɔmɛ, kɛ nyɛ we ɔmɛ.”

15 Wa he nyɛli ɔmɛ ba na kaa wa le nɔ́ nɛ a ngɛ susue kaa a maa pee ɔ; a kpá si kaa Mawu puɛ a yi mi tomi ɔmɛ. Kɛkɛ nɛ wɔ tsuo wa kpale kɛ ya tsa gbogbo ɔ fiami ɔ nɔ.

16 Kɛ je jamɛ a ligbi ɔ kɛ yaa a, i dla ye we bi ɔmɛ a mi enyɔ; be nɛ ni fa ngɛ gbogbo ɔ fiae ɔ, ni fa hu mia kɛ gbaja, nɛ a hɛɛ akplɔhi, tsɛ̃ihi, kɛ kɛ̃ɛ̃hi kɛ daa si, ngɛ bue. Wa ma nimeli ɔmɛ tsuo fí Yuda ma a se kpɛii.

17 Nihi nɛ ngɛ gbogbo ɔ fiae, kɛ nihi nɛ ngɛ tɛhi kɛ níhi tlooe ɔ, nɔ tsuaa nɔ kɛ e nine kake ngɛ ní ɔ tsue, nɛ e kɛ e nine kake hu hɛɛ ta hwumi níhi.

18 Ní tsuli ɔmɛ tsuo nɛ ngɛ gbogbo ɔ he ní tsue ɔ fi klaate ngɛ a mlɛ mi. Titimati kpalɔ ɔ ngɛ ye kasa nya.

19 I de ni ɔmɛ, ma nimeli ɔmɛ, kɛ ma ní tsuli ɔmɛ ke, “Ní tsumi ɔ yi bli kɛ ya se lokoo, nɛ e ha waa kɛ wa sibi wa kpɛti kɛ tsɔ ngɛ gbogbo ɔ nɔ.

20 Ke nyɛ nu titimati ɔ pɛmi pɛ, nyɛ bua nyɛ he nya kɛ ba wa ngɔ ngɛ lejɛ ɔ. Wa Mawu ɔ maa hwu ha wɔ.”

21 Lɔ ɔ he ɔ, bɔ nɛ wa tsu ní ɔ ji nɛ ɔ nɛ. Daa ligbi ɔ, kɛ je makɛ futɛfutɛ kɛ ya si gbɔkuɛ be nɛ dodoe ɔmɛ maa je kpo ɔ, wa ti ni fa hii gbogbo ɔ fiae, nɛ ni fa hu hɛɛ akplɔhi kɛ daa si kɛ ngɛ bue.

22 Jamɛ a be ɔ, i de ní tsumi ɔ nɔ hyɛli ɔmɛ ke a kɛ ní tsuli ɔmɛ tsuo nɛ a ba hi Yerusalem, bɔ nɛ pee nɛ waa bu ma a he nyɔ mi, nɛ ke je na a, wa tsu ní.

23 Enɛ ɔ he ɔ, i kɛ ye nyɛmimɛ ɔmɛ, ye we bi ɔmɛ, kɛ ye he buli ɔmɛ nɛ ngɛ ye se ɔ, wa je we wa tade ɔmɛ ngɛ wa he; mohu nɔ tsuaa nɔ hɛɛ e tahwu ní ngɛ e dɛ.