Nehemia 11

Nihi nɛ hi Yerusalem ɔ

1 Ma nimeli ɔmɛ hi Yerusalem ma klɔuklɔu ɔ mi, nɛ ma a mi bi ɔmɛ nɛ piɛ ɔ fɔ sɔ kɛ hla nɔ kake ngɛ ni nyɔngma a kpɛti kɛ piɛ ma nimeli ɔmɛ a he; se nihi nɛ piɛ ɔ lɛɛ a ya hi ma kpa amɛ kɛ kɔpe ɔmɛ a mi.

2 Ni kpahi nɛ a si a gugue ke a maa hi Yerusalem ɔ, Israel ma a je a yi saminya.

3 ⓘ Israel ma a, osɔfo ɔmɛ, Levi bi ɔmɛ, sɔlemi we ɔ ní tsuli ɔmɛ, kɛ Salomo tsɔli ɔmɛ a nina amɛ lɛɛ a hi mɛ nitsɛmɛ a zugba nɔ, ngɛ a ma amɛ kɛ kɔpe ɔmɛ a mi. Yuda zugba a nɔ ma nimeli nɛ hi Yerusalem ji nɛ ɔmɛ nɛ.

4 Yuda wɛtso ɔ mi bimɛ: Uzia bi Ataya, Zakaria bibi ɔ. E nɛmɛ kpahi ji Amaria, Shefatia, kɛ Mahalalel. Yuda bi Perez nina ji mɛ tsuo.

5 Baruk bi Maaseya, Kolhoze bibi ɔ. E nɛmɛ kpahi ji Hazaya, Adaya, Yoyarib, kɛ Zakaria. Yuda bi Shela nina ji mɛ tsuo.

6 Perez nina nɛ hi Yerusalem a yibɔ ji 468. Katsɛmɛ ji mɛ tsuo.

7 Benyamin wɛtso ɔ mi bimɛ: Meshulam bi Salu, Yoed bibi ɔ. E nɛmɛ kpahi ji Pedaya, Kolaya, Maaseya, Itiel, kɛ Yeshaya.

8 Gabai kɛ Salai; a weku no pɔtɛɛ ji Salu. Benyamin bi tsuo nɛ hi Yerusalem ɔ a hiɛmi ji 928.

9 A nyatsɛ ji Zikri bi Yoel; nɛ Hasenua bi Yuda ji ma a nɔ hyɛlɔ ɔ setsɔ.

10 Osɔfo ɔmɛ: Yoyarib bi Yedaya kɛ Yakin.

11 Hilkia bi Seraya, Meshulam bibi ɔ. E nɛmɛ ji Zadok, Merayot, kɛ osɔfo nɔkɔtɔma pe kulaa Ahitub.

12 Nihi tsuo nɛ je we puɔ nya nɛ ɔ nɛ a sɔmɔɔ ngɛ sɔlemi ɔ we ɔ, a hiɛmi ji 822. Yeroham bi Adaya, Pelalia bibi ɔ. E nɛmɛ ji Amzi, Zakaria, Pashur, kɛ Malkiya.

13 Nihi nɛ je we puɔ nya nɛ ɔ ji 242, nɛ mɛ tsuo we puɔ nyatsɛmɛ ji mɛ. Azarel bi Amashsai, Azai bibi ɔ. E nɛmɛ ji Meshilemot, kɛ Imer.

14 Nihi 128 je we puɔ nya nɛ ɔ, nɛ ta hwuli kpanakpanaa ji mɛ. A nyatsɛ ji Hagedolim bi Zabdiel.

15 Levi bi ɔmɛ: Hashub bi Shemaya, Azrikam bibi ɔ. E nɛmɛ ji Hashabia kɛ Buni.

16 Shabetai kɛ Yozabad ji Levi bi nɛ hyɛɛ Mawu we ɔ kpo nɔ je ní tsumi ɔ nɔ.

17 Mika bi Matania, Asaf nina ko nɛ a tsɛɛ Zabdi ɔ bibi ɔ. Lɛ ji nɔ nɛ jeɔ la nɛ a kɛ jeɔ si nami sɔlemi sisi. Bakbukia, Matania setsɔ ɔ, kɛ Shamua bi Abda, Yedutun nina Galal bibi ɔ.

18 Levi bi tsuo nɛ hi Yerusalem ma klɔuklɔu ɔ mi ɔ, a yibɔ ji 284.

Agbo nya buli:

19 Akub, kɛ Talmon, kɛ a weku li. Mɛ tsuo a yibɔ ji 172.

20 Israel ma nɛ piɛ ɔ, a kɛ osɔfo ɔmɛ, kɛ Levi bi nɛ piɛ ɔ hi mɛ nitsɛmɛ a zugba nɔ ngɛ Yuda ma kpa amɛ a mi.

21 Sɔlemi we ɔ he ní tsuli ɔmɛ hi Yerusalem he ko nɛ a tsɛɛ Ofel ɔ, nɛ a nyatsɛmɛ ji Ziha kɛ Gishpa.

22 Nɔ nɛ hyɛɛ Levi bi nɛ ngɛ Yerusalem ɔ a nɔ ji Bani bi Uzi, Hashabia bibi ɔ. E nɛmɛ ji Matania kɛ Mika. E je Asaf we puɔ nya. We puɔ nya nɛ ɔ blɔ nya ji kaa e hyɛ la nɛ a laa kɛ sɔmɔɔ ngɛ Mawu we ɔ nɔ saminya.

23 Matsɛ David wo mlaa nɛ tsɔɔ bɔ nɛ lali ɔmɛ maa hi a sibi tsakee kɛ lami, kɛ hiɔwo nɛ sa nɛ a haa mɛ daa ligbi.

24 Meshezabel bi Petahia nɛ je Zera we puɔ nya, kɛ Yuda we puɔ nya a, daa Israel ma a nya ngɛ ma a sane yemihi a mi.

Nihi nɛ hi ma kpa amɛ a mi

25 Israel bi ɔmɛ babauu hi a kɔpe ɔmɛ a mi ngɛ ngmɔ si. Yuda wɛtso ɔ mi bi ɔmɛ hi Kiriat Arba, Dibon, Yekabzeel, kɛ a he kɔpe ɔmɛ a mi.

26 Ni ɔmɛ ekomɛ hi Yeshua, Molada, Betpelet,

27 Hazarshual, Beersheba, kɛ a he kɔpe ɔmɛ a mi.

28 A hi Ziklag, Mekona, kɛ a he kɔpe ɔmɛ,

29 kɛ Enrimon, Zora, Yarmut,

30 Zanoa Adulam, kɛ a he kɔpe ɔmɛ a mi. A hi Lakish kɛ ngmɔ ɔmɛ nɛ ngɛ e kasa nya a a nɔ, kɛ Azeka, kɛ e he kɔpe ɔmɛ a mi. E nya tsɔɔmi ji Yuda bi ɔmɛ hi zugba nɛ ngɛ kɛ je Beersheba ngɛ leneyi je kɛ ya si Hinon kɔ̃ ɔ mi ngɛ omleyi je ɔ nɔ.

31 Benyamin wɛtso ɔ mi bi ɔmɛ hi Geba, Mikmash, Ai, Betel, kɛ a he kɔpe ɔmɛ a mi.

32 Ma kpahi a mi nɛ a hi ji Anatot, Nob, Anania,

33 Hazor, Rama, Gitaim,

34 Hadid, Zeboyim, Nebalat,

35 Lod, Ono, kɛ ga ní tsuli a kɔ̃ ɔ mi.

36 Levi bi ɔmɛ ekomɛ nɛ hi Yuda zugba a nɔ ɔ kɛ Benyamin bi ɔmɛ ya hi si.