Nehemia 1

1 Nɔ́ nɛ Hakalia bi Nehemia tsu he sane ji nɛ ɔ nɛ. Benɛ Artaherhes ngɛ matsɛ yee ngɛ Persia a, jeha nyingmi enyɔne ɔ we nyɔhiɔ nɛ a tsɛɛ Kislev ɔ mi ɔ, imi Nehemia, i ngɛ matsɛ ma nɛ a tsɛɛ Susa a.

Yerusalem he sane ha Nehemia hɛ dɔ

2 Hanani nɛ ji ye nyɛmimɛ ɔmɛ a kpɛti nɔ kake, kɛ ni komɛ nɛ je Yuda zugba a nɔ ba hiɛmɛ nɛ ɔ. I bi mɛ Yerusalem he sane, kɛ bɔ nɛ wa nyɛmimɛ Yuda bi nɛ a nuu we mɛ kɛ yɛ nyɔguɛ yemi mi ɔ ngɛ ha.

3 A de mi ke nihi nɛ piɛ ngɛ zugba a nɔ, nɛ mɛɛ lɛɛ a nuu we mɛ nyɔguɛ ɔ, a ngɛ nɔ́ nami, kɛ ahlua bɔmi nguaa mi. A de hu ke Yerusalem gbogbo ɔmɛ nɛ a hule pue si ɔ, kɛ agbo ɔmɛ nɛ a sã a tsuo ngɛ ja.

4 Benɛ i nu amaniɛ nɛ ɔ, i hi si nɛ i fo ya. I ye kɔmɔ ligbi babauu, nɛ i ha hwɔ. I sɔle nɛ i tsɛ Mawu ke,

5 “Yawɛ Mawu nɛ ngɛ hiɔwe lee! O kle, nɛ o he ngɛ gbeye. O yeɔ anɔkuale, nɛ o yeɔ o siwo nɔ. Nihi nɛ suɔ mo, nɛ a peeɔ níhi nɛ o fa ke a pee ɔ, o naa mɛ mɔbɔ.

6 Yawɛ, moo hyɛ mi, nɛ o ba o tue si ha mi. Kue nɛ i ngɛ fae ha mo nyɔ kɛ pia kɛ ha o tsɔli ɔmɛ nɛ ji Israel bi ɔmɛ ɔ, moo bu tue. I ngɛ jajee ke wɔ Israel ma a, wa pee yayami. I kɛ ye nɛmɛ ɔmɛ tsuo wa pee yayami.

7 Wa pee yi kpɛti wami níhi kɛ si mo, nɛ wa yi o mlaa amɛ a nɔ. Mlaahi, kɛ blɔ nya tomihi nɛ o kɛ ha wɔ kɛ gu o tsɔlɔ Mose nɔ ɔ, wa yi nɔ.

8 ⓐ I kpa mo pɛɛ nɛ o kai nɔ́ nɛ o de Mose ke, ‘Ke nyɛ, Israel ma a, nyɛ yi mi anɔkuale ɔ, ma gbɛ nyɛ ngɔ fĩa je ma kpa amɛ a mi.

9 ⓑ Se ke nyɛ kpale kɛ ba ye ngɔ, nɛ nyɛ ye ye mlaa amɛ a nɔ ɔ, ke je ɔ nyagbe he nɛ a gbɛ nyɛ ngɔ fĩa po, ma kpaka nyɛ kɛ ba he nɛ i to nɛ a ja mi ngɛ ɔ.’

10 “Nyɔmtsɛ, o tsɔli ji nɛ ɔmɛ nɛ, nɛ mo nitsɛ o ma ji nɛ ɔ nɛ. O kɛ o he wami nguaa kɛ nyɛmi kpɔ mɛ.

11 I kpa mo pɛɛ Nyɔmtsɛ, moo ba o tue si nɛ o nu ye kue fami, kɛ tsɔli ɔmɛ tsuo nɛ suɔ kaa a maa wo o biɛ ɔ hɛ mi nyami ɔ a kue fami ɔmɛ. Ha ma ye manye mwɔnɛ ɔ, nɛ o ha matsɛ ɔ nɛ na mi mɔbɔ.” Jamɛ a be ɔ mi ɔ, imi ji matsɛ ɔ dã wolɔ.