Ezra 1

Sirus fa Yuda bi ɔmɛ ke a kpale kɛ ho a je ya

1 ⓐ Benɛ Persia matsɛ, Sirus[1] ba ye tsɛ ɔ, kekleekle jeha a mi ɔ, Yawɛ ha nɛ nɔ́ nɛ lɛ, Yawɛ ɔ de kɛ gu gbalɔ Yeremia nɔ ɔ ba mi. Yawɛ ngɔ juɛmi ko kɛ wo Matsɛ Sirus yi mi kaa e fa nɛ a ngma munyu nɛ ɔ, konɛ a kane nɛ a fiɛ ngɛ e nɔ yemi he ɔ he tsuaa he.

2 ⓑ “Bɔ nɛ Persia matsɛ, Sirus de ji nɛ ɔ nɛ: Yawɛ, Mawu nɛ ngɛ hiɔwe ɔ wo mi nɔ yelɔ ngɛ je ɔ tsuo nɔ, nɛ e ngɔ tsumi nɛ he hia nɛ ɔ ngɔ ha mi. E ke ma ma we ha lɛ ngɛ Yerusalem ngɛ Yuda zugba a nɔ.

3 Mawu ma, nyɛ ti nihi nɛ nyɛ suɔ kaa nyɛ maa kpale ɔ, Mawu nɛ piɛ nyɛ he! Nyɛɛ ya Yerusalem ngɛ Yuda zugba a nɔ. Nyɛ ya ma Yawɛ, Israel Mawu ɔ we ɔ ekohu. Lɛ ji Mawu nɛ ngɛ Yerusalem ɔ nɛ.

4 Mawu ma mi bi ɔmɛ nɛ a nuu kɛ ho ma se ya a, he tsuaa he nɛ a ngɛ ɔ, nihi nɛ kɛ mɛ ngɛ lejɛ ɔ nɛ a ha mɛ yemi kɛ buami nɛ a ngɛ hlae. A ha mɛ sika hiɔ, sika tsu, tlomi, lohwe, kɛ jehanɛ níhi nɛ a je tsui mi faa ba ke kɛ ha Mawu we ɔ ngɛ Yerusalem.”

5 Kɛkɛ nɛ wɛtsoyi ɔmɛ ngɛ Yuda kɛ Benyamin, osɔfo ɔmɛ, Levi bi ɔmɛ, kɛ nihi tsuo nɛ Mawu mumi ɔ ta a he ɔ dla a he, konɛ a ya Yerusalem nɛ a ya ma Yawɛ we ɔ ekohu.

6 Nihi tsuo nɛ a kɛ mɛ ngɛ ɔ tsuo wo mɛ blɔ kɛ níhi babauu; sika hiɔ ní, sika tsu, tlomi, lohwehi, nike ní kpahi nɛ a he jua wa, kɛ nike níhi nɛ je tsui mi faa kɛ ba Mawu we ɔ.

7 Kãhi kɛ kpluhi nɛ Matsɛ Nebukadnezer ya muɔ kɛ je Mawu we ɔ ngɛ Yerusalem, nɛ e kɛ ya wo e mawu ɔmɛ a we ɔ mi ɔ, Matsɛ Sirus kpale mɛ tsuo ngɔ ha.

8 E ngɔ ní nɛ ɔmɛ ngɔ ha Mitredat, matsɛ we ɔ sika tolɔ ɔ. Nɛ lɛ hu e kane lɛ tsuo nɛ e tu ngɔ wo Sheshbazar, ganɔ nɛ yeɔ Yuda zugba a nɔ ɔ dɛ.

9 Ní ɔmɛ ji: Sika tsu kãhi nɛ a kɛ sãã bɔ — 30 Sika hiɔ kãhi nɛ a kɛ sãã bɔ — 1,000 Kã kpahi — 29 Sika tsu kã tsɔwihi — 30 Sika hiɔ kã tsɔwihi — 410 Kã kɛ kplu kpa komɛ — 1,000

10

11 Sika tsu kɛ sika hiɔ kã, kɛ kplu nɛ ɔmɛ tsuo a yibɔ ji 5,400. Benɛ Sheshbazar kɛ nihi nɛ a nuu kɛ ho Babilonia ya a kpale kɛ ma Yerusalem ɔ, e ngɔ ní nɛ ɔmɛ tsuo kɛ ba.