Kronika II, 7

Yawɛ we ɔ nya blimi

(<x>110 8:62-66</x>)

1 ⓨ Benɛ Matsɛ Salomo gbe e kue fami ɔ nya a, la je hiɔwe ba sã sami bɔ ɔ, kɛ bɔ kpa amɛ, nɛ Yawɛ hɛ mi nyami ɔ ba hyi we ɔ tɔ.

2 Akɛnɛ Yawɛ hɛ mi nyami ɔ ba hyi we ɔ mi tɔ he je ɔ, osɔfo ɔmɛ nyɛ we nɛ a sɛ mi.

3 ⓩ Benɛ Israel bi ɔmɛ tsuo na la nɛ je hiɔwe ɔ, kɛ Yawɛ hɛ mi nyami ɔ nɛ ba hyi we ɔ tɔ ɔ, a kɛ a hɛ mi bu si ngɛ he nɛ a ka tɛ ngɛ ɔ. A ja Yawɛ, nɛ a na lɛ si, nɛ a de ke, “A je Yawɛ yi! Ejakaa e hi, Ejakaa e mɔbɔ nami ɔ ngɛ kɛ yaa neneene.”

4 Enɛ ɔ se ɔ, Matsɛ Salomo, kɛ Israel ma a tsuo sã bɔ kɛ ha Yawɛ.

5 Salomo ngɔ ní nɛ ɔmɛ kɛ sã bɔ: na akpe nyingmi enyɔ kɛ enyɔ, kɛ to akpe lafa kɛ nyingmi enyɔ. Kusumi nɛ matsɛ ɔ, kɛ ma a tsuo pee kɛ bli Mawu we ɔ nya ji nɛ ɔ nɛ.

6 Osɔfo ɔmɛ ya da a blɔ he ɔmɛ, nɛ Levi bi ɔmɛ ya da si nɛ a plɛ a hɛ mi kɛ kpee osɔfo ɔmɛ. A fia sakuhi nɛ Matsɛ David kpɛ ɔ kɛ je Yawɛ yi, nɛ a la ke, “Yawɛ suɔmi ɔ ngɛ daa kɛ daa!” Blɔ nya nɛ David to kɛ ha Levi bi ɔmɛ ji nɛ ɔ nɛ. Benɛ Israel ma a tsuo daa si ɔ, osɔfo ɔmɛ kpa titimatihi.

7 Salomo tsukɔ kue ɔ kpɛti je ɔ nɛ ngɛ Yawɛ we ɔ hɛ mi ɔ he. Lejɛ ɔ lɛ e sã sami bɔ ɔmɛ, niye ní bɔ ɔmɛ, kɛ tue mi jɔmi bɔ ɔ e zɔ ɔ ngɛ; ejakaa akɔblee bɔ sami la tɛ ɔ klee we nɛ a maa sã bɔ nɛ ɔmɛ tsuo ngɛ nɔ.

8 Salomo kɛ Israel ma kpekpemi ɔ tsuo ngɔ otsi kɛ ye Gbasisihimi nyami be ɔ ngɛ Yawɛ we ɔ. Nimli babauu nitsɛ ba nyami be nɛ ɔ; a je tsitsaa Hamat yo kpɛ blɔ ɔ ngɛ omleyi je, kɛ ya si Egipt huzu ɔ he ngɛ leneyi je.

9 A ye ligbi kpaago kɛ tsukɔ bɔ sami la tɛ ɔ he, nɛ Gbasisihimi nyami be ɔ hu a ye ligbi kpaago. Nyagbe ligbi ɔ, a bɔ gua klɛdɛɛ ko, nɛ a kɛ mu nyami be ɔ nya.

10 E nɔ jena nɛ ji nyɔhiɔ kpaagone ɔ we ligbi nɛ ji nyingmi enyɔ kɛ etɛ ɔ, Salomo wo ma a blɔ, nɛ a je kɛ ho a wehi a mi ya. A bua jɔ a he, ejakaa Yawɛ gbaa e ma Israel, kɛ David, kɛ Salomo tsuo.

Mawu je e he kpo ngɔ tsɔɔ Salomo ekohu

(<x>110 9:1-9</x>)

11 Jehanɛ lɛɛ Salomo ma Yawɛ we ɔ, kɛ matsɛ we ɔ gbe nya; nɔ́ tsuaa nɔ́ nɛ e to ke e maa pee ngɛ Yawɛ we ɔ, kɛ lɛ nitsɛ e we ɔ mi ɔ, e pee lɛ tsuo pɛpɛɛpɛ.

12 Kɛkɛ nɛ Yawɛ je e he kpo ngɔ tsɔɔ Salomo nyɔ mi, nɛ e de lɛ ke, “I nu o kue fami ɔ, nɛ i ngɔ we nɛ ɔ kaa he nɛ a maa sã bɔhi ngɛ kɛ ha mi.

13 Ke e ba mi kaa i tsi hiɔmi nya, aloo i ha nɛ baalɛ ba ye ní ngɛ zugba a nɔ, aloo i ha nɛ gbenɔ hiɔ ba sɛ ye ma mi bi ɔmɛ a kpɛti,

14 nɛ a pia a he, nɛ a fa kue ha mi, nɛ a kpa yayami ɔ nɛ a ngɛ pee ɔ, ma nu a kue fami ɔ ngɛ hiɔwe. Kɛkɛ ɔ, ma ngɔ a yayami ɔmɛ ngɔ pa mɛ, nɛ ma ha kplɔkɔtɔ maa ba a zugba a nɔ ekohu.

15 Ma bu we nɛ ɔ he daa, nɛ kue nɛ a maa fa ha mi ngɛ hiɛmɛ nɛ ɔ, ma nu,

16 ejakaa imi lɛ i hla we nɛ ɔ, nɛ i tsukɔ he, konɛ a ja mi ngɛ hiɛ ɔ kɛ ya neneene. Ma hyɛ we ɔ nɔ, nɛ ma bu he daa.

17 Ke o ma sɔmɔ mi kɛ o tsui tsuo, nɛ o maa ye mi anɔkuale kaa bɔ nɛ o tsɛ David pee ɔ, ke o maa ye ye mlaa amɛ a nɔ, nɛ o maa pee nɔ́ tsuaa nɔ́ nɛ i fa mo ke o pee ɔ,

18 ⓐ lɛɛ si ko nɛ i wo o tsɛ David ɔ, ma ye nɔ. Imi lɛ i de lɛ ke ma ha e nina maa ye tsɛ ngɛ Israel kɛ maa ya neneene ɔ nɛ.

19 Se ke mo, loo o nina jɔɔ ye se nyɛɛmi; ke nyɛ yi mlaa amɛ nɛ i wo nyɛ, kɛ blɔ nya tomi ɔmɛ a nɔ, nɛ nyɛ ya sɔmɔ mawu kpahi ɔ,

20 lɛɛ ma je ye ma, Israel kɛ maa je zugba a nɛ i ha mɛ ɔ nɔ. We nɛ ɔ nɛ i pee lɛ klɔuklɔu nɛ a ja mi ngɛ mi ɔ, ma je ye nine ngɛ he. Je ma amɛ tsuo pɛpɛɛpɛ maa ye e he fɛu, nɛ a maa hie lɛ.

21 “Amlɔ nɛ ɔ, bu ngɛ we nɛ ɔ he wawɛɛ nitsɛ. Se jamɛ a be ɔ mi ɔ, we nɛ ɔ maa pee we doku, nɛ nɔ tsuaa nɔ nɛ bee ɔ, e he mi ma jɔ̃, nɛ e nya maa kpɛ e he, nɛ e ma bi ke, ‘Mɛni he je nɛ Yawɛ pee zugba nɛ ɔ, kɛ we nɛ ɔ kikɛ nɛ ɔ?’

22 Nɛ nihi ma he nɔ ke, ‘Ejakaa Israel ma a kua Yawɛ, a Mawu ɔ nɛ je mɛ kɛ je Egipt zugba a nɔ ɔ. A ngɔ a he ya mɛtɛ mawu kpahi a he; a ja mɛ, nɛ a sɔmɔ mɛ. Enɛ ɔ he je nɛ Yawɛ kɛ haomi nɛ ɔ ba a nɔ ɔ nɛ.’ ”