Kronika II, 25

Yuda matsɛ, Amazia

(<x>120 14:2-6</x>)

1 Amazia ba bɔni tsɛ yemi benɛ e ye jeha nyingmi enyɔ kɛ enuɔ, nɛ e hi Yerusalem kɛ ye matsɛ jeha nyingmi enyɔ kɛ nɛɛ. E nyɛ biɛ ji Yehoadin, nɛ e je Yerusalem ma a mi.

2 Amazia pee Yawɛ suɔmi nya ní, se pi kɛ e tsui tsuo.

3 Benɛ e matsɛ yemi ɔ ba da si ɔ, e gbe e tsɔli ɔmɛ nɛ gbe matsɛ ɔ nɛ ji e tsɛ ɔ.

4 ⓣ Se a bimɛ ɔmɛ lɛɛ ngɛ mlaa a nɛ Yawɛ wo ɔ nya kaa bɔ nɛ a ngma ngɛ Mose womi ɔ mi ke, “A ko gbe fɔli ngɛ yayami nɛ a bimɛ pee ɔ he, nɛ a ko gbe bimɛ hu ngɛ yayami nɛ a fɔli pee ɔ he, se ke nɔ ko pee yayami ɔ, a gbe nɔ ɔ nitsɛ ngɛ yayami nɛ e pee ɔ he ɔ, e gbi mɛ.”

Amazia kɛ Edom bi hwu ta

(<x>120 14:7</x>)

5 Matsɛ Amazia dla nyumuhi tsuo nɛ ngɛ Yuda, kɛ Benyamin wɛtso ɔmɛ a mi ɔ kɛ wo tabohi a mi we puɔ nya we puɔ nya. E ngɔ asafoatsɛmɛ ngɔ to nihi akpehi kɛ lafahi a nya, nɛ a na ta buli akpe lafa etɛ nɛ ji nyumuhi nɛ a ye jeha nyingmi enyɔɔnyɔ, kɛ ni nɛmɛ nɛ ye pe ja. Nimli nɛ ɔmɛ ɔ, ta buli nɛ a kɔni si wa ji mɛ tsuo pɛpɛɛpɛ; a le bɔ nɛ a kɛ akplɔ kɛ tsɛ̃i hwuɔ ta ha.

6 Amazia kɛ sika hiɔ nɛ jiɔmi ji kilo akpe etɛ kɛ e nya lafa eywiɛ ya bɔ ta buli akpe lafa hu apaa ngɛ Israel ba piɛ ni ɔmɛ a he.

7 Se gbalɔ ko ba e ngɔ, nɛ e ba de lɛ ke, “Nɛnɛ, o kɛ Israel tabo ɔ ko ya ta, ejakaa Yawɛ je a se; Yawɛ je Efraim bi nɛ ɔmɛ tsuo a se.

8 Ke o susu kaa ke a ba piɛ o he nɛ o he maa wa a, o sisi o he pɛ. Ejakaa ke nɔ ko maa ye kunimi ngɛ ta mi, loo a maa ye e nɔ ɔ, e je Mawu; Mawu ma ha nɛ o he nyɛli ɔmɛ maa ye o nɔ.”

9 Amazia bi gbalɔ ɔ ke, “Lɛɛ sika hiɔ nɛ jiɔmi ji kilo akpe etɛ kɛ e nya lafa eywiɛ nɛ i ngɔ kɛ ha Israel tabo ɔ, mɛni wa maa pee ngɛ he?” Gbalɔ ɔ he nɔ ke, “Yawɛ ma nyɛ ma ha mo nɔ́ nɛ hiɛ pe ja!”

10 Kɛkɛ nɛ Amazia wo tabo ɔ nɛ e ya bɔ apaa a blɔ, nɛ e de mɛ ke a kpale kɛ ho Efraim ya. A mi mi fu Yuda ma a wawɛɛ nitsɛ, nɛ a kpale kɛ ho a je he ya.

11 Jehanɛ, Amazia ba na he wami he, nɛ e nyɛɛ e ma a hɛ mi kɛ ya Ngo kɔ̃ ɔ mi. A kɛ Edom bi ɔmɛ ya hwu ta ngɛ lejɛ ɔ, nɛ a gbe Edom ta buli akpe nyɔngma,

12 nɛ a nuu a ti nihi akpe nyɔngma hu hɛ ngmengmle. A ngɔ ni nɛmɛ nɛ a nuu hɛ ngmengmle ɔ kɛ ya tɛ sa ko yi mi ngɛ Sela ma a mi, nɛ a tsitsɛɛ a yi se kɛ wo kɔ̃ ɔ mi, nɛ tɛ sa amɛ tsɔtslɔɔ a mi dukuduku.

13 Jamɛ a be ɔ mi ɔ, Israel ta buli ɔmɛ nɛ Amazia ha we nɛ a piɛ a he kɛ ya ta a ho ya tua Yuda ma amɛ nɛ ngɛ Samaria kɛ Bet Horon a kpɛti ɔ, nɛ a gbe nyumuhi akpe etɛ, nɛ a ha níhi babauu.

14 Benɛ Amazia ya ye Edom bi ɔmɛ a nɔ kunimi nɛ e kpale kɛ ma a, e ngɔ a we amaga amɛ kɛ ba. E kɛ mɛ ba ma si, nɛ e ja mɛ, nɛ e sã tsopa kɛ e he via kɛ ha mɛ.

15 Nɔ́ nɛ ɔ ha nɛ Yawɛ mi mi fu Amazia, nɛ e tsɔ gbalɔ ko kɛ ba e ngɔ. Gbalɔ ɔ ba bi lɛ ke, “Ma se mawuhi nɛ a nyɛ we nɛ a je mɛ nitsɛmɛ a ma mi bi kɛ je o dɛ mi ɔ, mɛni he je o ngɛ mɛ jae?”

16 Se benɛ gbalɔ ɔ ngɛ munyu tue kɛ mwɔɔ ɔ, Amazia po munyu ngɛ e nya, nɛ e bi lɛ ke, “Kɛ je mɛni be lɛ wa wo mo matsɛ ga wolɔ? Jɔɔ mo; ke pi ja a, ma ha a gbe mo piɔ!” Kɛkɛ nɛ gbalɔ ɔ kpa. Se loko e maa pee dii ɔ, e de matsɛ ɔ ke, “Jehanɛ lɛɛ i le kaa Mawu to e yi mi kaa e ma kpata o hɛ mi; ejakaa o bui ye ga womi ɔ tue, nɛ o ya tsu nɔ́ nɛ ɔ.”

Amazia kɛ Israel bi hwu ta

(<x>120 14:8-20</x>)

17 Yuda matsɛ, Amazia kɛ e ga woli ɔmɛ so kɛ wo Israel he. Ligbi ko ɔ, e tsɔ ya de Israel matsɛ, Yehoash, Yehu bi Yehoahaz bi ɔ ke, “Ba nɛ o kɛ mi ba kpe hɛ mi kɛ hɛ mi!”

18 Israel matsɛ, Yehoash hu tsɔ ya de Yuda matsɛ, Amazia ke, “Be ko ɔ, Lebanon mio tso tsɔ ke a ya de Lebanon seda ke, ‘Ngɔɔ o biyo ɔ ngɔ ha ye binyumu ɔ nɛ e kɛ lɛ nɛ hi si!’ Kɛkɛ nɛ Lebanon pu mi lohwe ko ba be, nɛ e naa mio tso ɔ nɔ.

19 Mo Amazia, nɛ o gbe Edom bi ɔmɛ he je ɔ, o ngɛ o he nɔ woe. I ngɛ mo ga woe ke o hi si ngɛ o we mi. Mɛni sane o ngɛ hlae nɛ o je ɔ? Anɛ o li kaa nɔ́ nɛ ɔ kɛ haomi maa ba o kɛ o ma Yuda tsuo nyɛ nɔ lo?”

20 Se Amazia tsi e tue. Mamoo Mawu suɔmi nya ji kaa a ye Amazia nɔ kunimi, ejakaa e ya ja Edom amaga amɛ.

21 Lɔ ɔ he ɔ, Israel matsɛ, Yehoash hia nɛ e kɛ Yuda matsɛ Amazia ya bua ngɛ ta nga nɔ, ngɛ Yuda ma a nɛ a tsɛɛ Bet Shemesh ɔ.

22 Israel ye Yuda nɔ kunimi, nɛ Yuda ta buli ɔmɛ tsuo tu fo kɛ ho a wehi a mi ya.

23 Israel matsɛ, Yehoash nu Yuda matsɛ Amazia, nɛ e kɛ lɛ ba Yerusalem. Benɛ a ba su Yerusalem ɔ, Yehoash ha nɛ a ku Yerusalem gbogbo ɔ gugue lafa ngɔ pue si kɛ je Efraim agbo ɔ nya, kɛ ya si kɔ nya agbo ɔ nya.

24 Benɛ e kpale e se kɛ yaa Samaria a, e muɔ ta yibu ní nɛ ɔmɛ kɛ ho: sika tsu, sika hiɔ tsuo nɛ ngɛ Yawɛ we ɔ, ní kpahi tsuo nɛ ngɛ Yawɛ we ɔ nɛ Obed Edom nina a hyɛɛ a nɔ ɔ, kɛ june ngɛ matsɛ we ɔ. Yehoash nuu ni komɛ hu kaa ta nyɔguɛhi kɛ je.

25 Se kɛ̃ ɔ, Israel matsɛ, Yehoash gbo kekle, nɛ e gbenɔ se jeha nyɔngma kɛ enuɔ loko Yuda matsɛ, Amazia ba gbo.

26 Amazia he sane kpahi kɛ je sisije kɛ ya si e matsɛ yemi ɔ nyagbe ɔ, a ngma lɛ tsuo pɛpɛɛpɛ ngɛ Yuda Matsɛmɛ ɔmɛ, kɛ Israel Matsɛmɛ ɔmɛ a Blema Sanehi Womi ɔ mi.

27 Kɛ je be mi nɛ Amazia je Yawɛ se ɔ, e ma mi bi ɔmɛ so ngɔ wo e he ngɛ Yerusalem. Nyagbenyagbe ɔ, e tu fo kɛ ho Lakish ma a mi ya; se e he nyɛli ɔmɛ nyɛɛ e se, nɛ a ya gbe lɛ ngɛ lejɛ ɔ.

28 A kɛ e flɔ̃ ɔ fɔ okpɔngɔ nɔ kɛ ba Yerusalem, nɛ a ba pu lɛ ngɛ matsɛmɛ ɔmɛ a pu he ɔ ngɛ David ma a mi.