Kronika II, 19

Gbalɔ ko ba ka Yehoshafat hɛ mi

1 Yuda matsɛ, Yehoshafat kpale kɛ ba e we ɔ ngɛ Yerusalem fiafiaafia.

2 Gbalɔ Yehu, Hanani binyumu ɔ ba kpee matsɛ ɔ, nɛ e de lɛ ke, “Anɛ e da ha mo kaa o ya piɛ yiwutsotsɛmɛ a he, nɛ o kɛ ni nɛmɛ nɛ a sume Yawɛ nɛ bɔ lo? Nɔ́ nɛ o pee nɛ ɔ ha nɛ Yawɛ mi mi fu mo.

3 Se kɛ̃ ɔ, su kpakpa komɛ ngɛ o mi; o je yo mawu Ashera amaga amɛ tsuo kɛ je zugba a nɔ, nɛ o bɔ mɔde kaa o maa pee Mawu suɔmi nya ní.”

Yehoshafat tsake níhi

4 Matsɛ Yehoshafat hi Yerusalem, se e pɔɔ blɔ hiami kɛ ya slaa e ma mi bi ɔmɛ, kɛ je Beersheba ngɛ leneyi je kɛ ya si Efraim yo ɔmɛ a nɔ ngɛ omleyi je. Ke e ya a, e kɛ ni ɔmɛ tuɔ munyu, bɔ nɛ pee nɛ a kpale ba nyɛɛ Yawɛ, a nɛmɛ a Mawu ɔ se ekohu.

5 E to kojoli ngɛ Yuda mahi tsuo nɛ a fia gbogbo ngɔ wo a he ɔ a mi,

6 nɛ e de mɛ ke, “Nyɛɛ hyɛ saminya loko nyɛɛ bu nɔ ko fɔ, loo bemi. Tsa pi nɔmlɔ adesa nɛ nyɛ ngɛ ní ɔ tsue ha, se mohu Mawu. Ke nyɛ maa buá sane ko he ɔ, Yawɛ maa piɛ nyɛ he.

7 Nyɛɛ ye Yawɛ gbeye, nɛ nyɛɛ pee nyɛ níhi ngɛ blɔ nɛ da nɔ; ejakaa Yawɛ, wa Mawu ɔ sume kaa a plɛ dami sane hɛ mi ngɔ bu si, aloo a hyɛ nɔ hɛ mi, aloo a he nyɔ mi ní.”

8 Yehoshafat wo Levi bi ɔmɛ, osɔfo ɔmɛ, kɛ Israel ma nimeli ɔmɛ a ti ni komɛ kojoli ngɛ Yerusalem hulɔ. Mɛɛ a ní tsumi ji a kojo sanehi nɛ kɔɔ Yawɛ mlaa a nɔ tɔmi he, nɛ a hyɛ ma mi bi ɔmɛ a kpɛti sanehi a mi. Yerusalem ji he nɛ a kojoɔ ngɛ.

9 E wo mɛ mlaa ke, “Nyɛɛ kɛ Mawu gbeye yemi, anɔkuale yemi, kɛ nyɛ tsui tsuo nɛ tsu ní.

10 Ke nyɛ nyɛmimɛ kojoli ɔmɛ nɛ ngɛ ma amɛ a mi ɔ ngɔ sane ba ha nyɛ nɛ nyɛɛ hyɛ mi ɔ, muɔ si puemi sane jio, Mawu mlaa amɛ, aloo blɔ nya tomi ɔmɛ eko nɔ tɔmi sane jio, nyɛɛ tsɔɔ mɛ bɔ nɛ a ma plɛ kɛ ye sane ɔ ha, nɛ nyɛɛ piɛ a he kɛ ye sane ɔ ngɛ blɔ nɛ da nɔ. Ke nyɛ pee ja a, a be fɔ yee ngɛ Yawɛ hɛ mi; Yawɛ mi mi fumi be nyɛɛ kɛ nyɛ nyɛmimɛ ɔmɛ a nɔ bae. Bɔ nɛ nyɛ maa pee nɛ sɔ̃ be nyɛ tlooe ji nɛ ɔ nɛ.

11 Sanehi tsuo nɛ kɔɔ Yawɛ jami he ɔ, ke Amaria, osɔfo nɔkɔtɔma pe kulaa a ngɔ e nya ngɔ wo mi pɛ, a po sisi; nɔ kpa ko be he blɔ nɛ e deɔ nɔ́ ko hu. Ma mi sanehi lɛɛ, nɔkɔtɔma pe kulaa nɛ maa to blɔ nya ji Ishmael binyumu Zebadia, amlaalo ɔ nɛ ngɛ Yuda a. Ke lɛɛ e tu munyu ɔ, nɔ kpa ko be he blɔ nɛ e deɔ nɔ́ ko hu. Ke a ye sane ko gbe nya nɛ a buá he ɔ, Levi bi ɔmɛ a blɔ nya ní tsumi ji kaa a hyɛ konɛ blɔ nya nɛ kojomi he ɔ to ɔ, a ye nɔ. Nyɛɛ pee kã, nɛ nyɛɛ ye mlaa nɛ ɔmɛ a nɔ. Yawɛ nɛ piɛ nɔ nɛ peeɔ nɔ́ nɛ da a he!”