Kronika II, 16

Yuda kɛ Israel ná

(<x>110 15:17-22</x>)

1 Yuda matsɛ, Asa yi nɔ jeha nɛ ji nyingmi etɛ kɛ ekpa a mi ɔ, Israel matsɛ, Baasha ba tua Yuda, nɛ e bɔni gbogbo fiami kɛ ngɛ Rama ma a he woe. E pee nɔ́ nɛ ɔ, bɔ nɛ pee nɛ nɔ ko nɔ ko kó nyɛ nɛ e je Israel kɛ ya Yuda, loo Yuda kɛ ba Israel.

2 Enɛ ɔ he je ɔ, Matsɛ Asa ya muɔ sika hiɔ, kɛ sika tsu kɛ je Yawɛ we ɔ nito he ɔ, kɛ matsɛ we ɔ nito he ɔ. E tsɔ e tsɔli ɔmɛ ekomɛ Damasko nɛ a kɛ ní ɔmɛ ya ha Siria matsɛ, Benhadad. Sɛ gbi nɛ piɛ he ji nɛ ɔ nɛ:

3 “Ha nɛ i kɛ mo waa so kaa bɔ nɛ tsaatsɛ kɛ o tsɛ so ɔ. I ngɛ mo sika hiɔ kɛ sika tsu nike ní manee. Yaa nɛ o kɛ Israel matsɛ, Baasha ya po somi nɛ o kɛ lɛ so ɔ mi, bɔ nɛ pee nɛ e je e ta buli ɔmɛ kɛ je ye zugba a nɔ kɛ ho.”

4 Benhadad kplɛɛ Asa munyu ɔ nɔ, nɛ e tsɔ e tatsɛmɛ ɔmɛ nɛ a ya tua Israel ma amɛ. A ngɔ Iyon, Dan, Abel Bet Maaka, kɛ Naftali nito he ma amɛ tsuo.

5 Benɛ Matsɛ Baasha nu sane nɛ ba a, e kpa Rama ma a dlami, nɛ e je ní tsumi ɔ he.

6 Pee se ɔ, Matsɛ Asa bua nihi a nya kɛ je Yuda tsuo, nɛ a ya muɔ tɛhi, kɛ tsohi nɛ Baasha kɛ ba ngɛ ní tsue ngɛ Rama a. Asa ngɔ ní nɛ ɔmɛ kɛ ya po Geba kɛ Mizpa ma amɛ.

Gbalɔ Hanani

7 Jamɛ a be ɔ mi ɔ, gbalɔ Hanani ba Yuda matsɛ, Asa ngɔ, nɛ e ba de lɛ ke, “Akɛnɛ o ngɔ o hɛ ngɔ fɔ Siria matsɛ ɔ nɔ, nɛ o ngɔɛ o hɛ ngɔ fɔɛ Yawɛ, o Mawu ɔ nɔ he je ɔ, Siria matsɛ tabo ɔ tu fo kɛ je o he.

8 Tse Sudan bi ɔmɛ, kɛ Libia bi ɔmɛ ngɛ ta buli, ta zugba lɛhi, kɛ okpɔngɔ ta buli babauu? Se akɛnɛ nyɛ ngɔ nyɛ hɛ ngɔ fɔ Yawɛ nɔ he je ɔ, e ha nɛ nyɛ ye a nɔ kunimi.

9 Yawɛ hɛngmɛ ngɛ je ɔ tsuo he; nihi nɛ yeɔ lɛ anɔkuale ɔ, e woɔ mɛ he wami. O je kuasia. Lɔ ɔ he ɔ, kɛ je mwɔnɛ ɔ kɛ yaa a, ta maa nyɛɛ o se daa nɛ.”

10 Nɔ́ nɛ ɔ ha Asa mi mi fu gbalɔ ɔ wawɛɛ nitsɛ, nɛ e wo lɛ tsu. Jamɛ a be ɔ mi nɔuu ɔ, Asa bɔni ma mi bi ɔmɛ ekomɛ yi mi wami.

Asa matsɛ yemi ɔ nyagbe

(<x>110 15:23-24</x>)

11 Asa he sanehi kɛ je sisije kɛ ya si nyagbe ɔ, a ngma ngɛ Yuda kɛ Israel Matsɛmɛ ɔmɛ a Blema Sanehi Womi ɔ mi.

12 Benɛ Asa ye jeha nyingmi etɛ kɛ nɛɛ ngɛ matsɛ sɛ ɔ nɔ ɔ, nane hiɔ nɛ nya wa wawɛɛ ko ba bu lɛ si. Se e kɛ e kɔmɔ ɔ yɛ Yawɛ hɛ mi; tsopa peeli mohu a ngɔ lɛ e ya.

13 Jeha enyɔ se ɔ, benɛ Asa ná jeha nyingmi eywiɛ kɛ kake ngɛ sɛ ɔ nɔ ɔ, e ba gbo,

14 nɛ a pu lɛ ngɛ David ma a mi, ngɛ tɛ sa yɔkɔ ko nɛ lɛ nitsɛ e kpɛ ngɔ to ɔ mi. A ngɔ lɛ ngɔ fɔ nɔ gbogboe sa ko nɔ. A kɛ tsopahi kɛ a he via nɛ a je blɔ futu slɔɔtoslɔɔto dla sa nɛ ɔ, nɛ a slɛ la ko nɛ ngɛ tsoe gegeege kɛ wo e hɛ mi nyami.