Kronika I, 29

Nike ní kɛ ha Yawɛ we ɔ mami

1 ⓜ Matsɛ David de ma kpekpemi ɔ tsuo ke, “Ye bi Salomo nɔ kake too nɛ Mawu hla a, jokuɛyo ji lɛ; e kpa we níhi a si lolo. Ní tsumi ɔ yi gbo; ejakaa pi nimli a mɔ nɛ a yaa mami ɔ, se Yawɛ Mawu ɔ nitsɛ e we.

2 Níhi nɛ a kɛ maa ma ye Mawu ɔ we ɔ, i bɔ mɔde bua nya: sika tsu, sika hiɔ, akɔblee, dade, tso, tɛhi nɛ a he jua wa, tɛhi nɛ kpɛɔ, tɛhi nɛ a kɛ maa níhi a mi, kɛ tɛhi nɛ a he jua wa kpa komɛ.

3 Ngɛ ní nɛ ɔmɛ kulaa a se ɔ, i ngɔ imi nitsɛ ye sika hiɔ, kɛ sika tsu ngɔ ha, ejakaa i suɔ Mawu we ɔ.

4 I ha sika tsu ngmingmiingmi nɛ jiimi pe tɔn lafa, kɛ sika hiɔ ngmingmiingmi nɛ jiimi maa su tɔn lafa enyɔ kɛ nyingmi eywiɛ nɛ a kɛ ha gbogbo ɔmɛ a he ngɛ Yawɛ we ɔ,

5 nɛ a kɛ pee níhi tsuo nɛ ga ní tsuli ɔmɛ maa pee ɔ. Lɔ ɔ he ɔ, i ngɛ bie ke nyɛ ti mɛnɔ suɔ kaa e maa je e tsui mi faa nɛ e ke Yawɛ nɔ́ ko lo?”

6 Kɛkɛ nɛ we puɔ nya dali ɔmɛ, wɛtsoyi ɔmɛ, asafoatsɛmɛ ɔmɛ, kɛ matsɛ ní tsumihi nɔ hyɛli ɔmɛ si a gugue ke a ma ha

7 ní nɛ ɔmɛ nɛ a kɛ ma Yawɛ we ɔ: sika tsu nɛ jiimi pe tɔn lafa kɛ nyingmi kpaago, sika hiɔ nɛ jiimi pe tɔn lafa etɛ kɛ nyingmi eywiɛ, akɔblee nɛ jiimi maa su tɔn lafa ekpa kɛ nyingmi enyɔ, kɛ dade nɛ jiimi pe tɔn akpe etɛ kɛ e nya lafa eywiɛ.

8 Nihi nɛ tɛhi nɛ a he jua wa ngɛ a dɛ ɔ ngɔ kɛ ba Yawɛ we ɔ nito he ɔ. Nɔ nɛ hyɛɛ lejɛ ɔ nɔ ji Yehiel nɛ je Levi we puɔ nya nɛ a tsɛɛ Gershon ɔ.

9 Ma a ke Yawɛ ní kɛ je a tsui mi faa, nɛ a nya nɛ a bua jɔ a he kaa a nyɛ pee nɔ́ ko kaa ja. Matsɛ David hu bua jɔ e he saminya, nɛ e nya.

David je Mawu yi

10 Kɛkɛ nɛ Matsɛ David je Yawɛ yi ngɛ ma kpekpemi ɔ hɛ mi, nɛ e de ke, “Yawɛ, wa nɛ̃ Yakob Mawu, a je o yi kɛ ya neneene!

11 ⓝ O kle, o ngɛ he wami, kɛ hɛ mi nyami; o yeɔ kunimi, nɛ o yeɔ matsɛ. Nɔ́ tsuaa nɔ́ nɛ ngɛ hiɔwe kɛ zugba a, o nɔ́. Matsɛ ji mo, nɛ o yeɔ nɔ́ tsuaa nɔ́ nɔ.

12 Ní nami, kɛ hɛ mi nyami tsuo jee o dɛ mi. O kɛ o he wami yeɔ nɔ́ tsuaa nɔ́ nɔ; mo lɛ o haa nɔ biɛ, kɛ he wami.

13 Lɔ ɔ he ɔ, wa Mawu, wa ngɛ mo si nae, nɛ wa ngɛ o biɛ nɛ hɛ mi ngɛ nyami ɔ yi jee.

14 “I kɛ ye ma a, mɛnɔmɛ ji wɔ nɛ wa ma nyɛ je wa tsui mi faa kɛ ke mo ní kaa kikɛ nɛ ɔ? Ejakaa nɔ́ tsuaa nɔ́ nɛ wa ngɛ ɔ, mo lɛ o ke wɔ. Lɔ ɔ he ɔ, mo nitsɛ o níhi wa ngɔ ba ha mo nɛ ɔ nɛ.

15 Yawɛ lee, o le kaa wa ngɛ kaa nibwɔhi, kɛ blɔ nyɛɛli kaa wa nɛmɛ ɔmɛ pɛ. Wa wami ligbi ɔmɛ bee kɛ yaa kaa hɔ̃, nɛ wa be nyɛe maa tu gbenɔ nya fo.

16 Yawɛ, wa Mawu lee, níhi babauu nɛ wa ngɔ kɛ ba nɛ a kɛ po we ha mo, konɛ a kɛ wo o biɛ klɔuklɔu ɔ hɛ mi nyami ɔ, o dɛ mi a je, o níhi ji tsuo kulaa.

17 Ye Mawu, i le kaa moo lɛɛ o hyɛɛ nɔ tsui mi nɛ o kɛ leɔ ni nɛmɛ nɛ hi, ejakaa o naa ni kpakpahi a he bua jɔmi. I ngɔ ní nɛ ɔmɛ tsuo ngɔ ke mo kɛ je ye tsui mi faa, nɛ i na kaa o ma nɛ ba pue si ngɛ hiɛmɛ nɛ ɔ, mɛ hu a je a tsui mi faa ba ke mo ní.

18 Yawɛ, wa nɛmɛ Abraham, Isak, kɛ Yakob a Mawu lee, ha nɛ suɔmi nɛ o ma a ngɛ kɛ ha mo ɔ nɛ tsa nɔ; ha nɛ a bu mo tue kɛ ya neneene.

19 Ha nɛ ye bi Salomo nɛ ye o mlaa amɛ, o fami ɔmɛ, kɛ blɔ nya tomi ɔmɛ tsuo pɛpɛɛpɛ a nɔ, konɛ e po we ɔ nɛ i dla e he níhi kɛ to ɔ ha mo.”

A wo Salomo matsɛ

20 Jehanɛ, David de ma kpekpemi ɔ ke, “Nyɛ je Yawɛ, nyɛ Mawu ɔ yi!” Kɛkɛ nɛ ma kpekpemi ɔ tsuo je Yawɛ a nɛmɛ a Mawu ɔ yi. A kpla si nɛ a ja Yawɛ, nɛ a wo matsɛ ɔ hu hɛ mi nyami.

21 E nɔ jena a, a ngɔ na ku akpe, agbosu akpe, kɛ jijɔ akpe kɛ sã sami bɔ ha Yawɛ. A sã bɔ kpahi babauu hulɔ, nɛ a sã wai bɔ kɛ ha Israel ma kpekpemi ɔ tsuo.

22 Jamɛ a ligbi ɔ, ma a bua jɔ a he wawɛɛ nitsɛ, ejakaa a ye ní, nɛ a nu ní ngɛ Yawɛ hɛ mi. Kɛkɛ nɛ a wo Salomo matsɛ si enyɔne. A pɔ lɛ nu ngɛ Yawɛ biɛ mi kaa ganɔ, nɛ a pɔ Zadok hu nu kaa osɔfo.

23 ⓞ Lɔ ɔ he ɔ, Salomo ba hi matsɛ sɛ ɔ nɛ Yawɛ nitsɛ to sisi ɔ nɔ ngɛ e tsɛ David nane mi. E matsɛ yemi ɔ ya nɔ wawɛɛ nitsɛ, nɛ Israel ma a tsuo buɔ lɛ tue.

24 Ma nikɔtɔma a mɛ, ta buli ɔmɛ tsuo, kɛ Matsɛ David nitsɛ bimɛ ɔmɛ tsuo wo si kaa a kɛ Matsɛ Salomo maa hi si saminya.

25 Yawɛ wo Salomo nɔ gojoo; e ha nɛ e na biɛ ngɛ Israel tsuo, nɛ e hɛ mi ba nyami pe Israel matsɛmɛ ɔmɛ tsuo nɛ sɛ e hlami ɔ.

David matsɛ yemi he sane kpiti

26 David, Ishai bi ɔ ye Israel tsuo nɔ matsɛ

27 ⓟ jeha nyingmi eywiɛ. E hi Hebron kɛ ye matsɛ jeha kpaago, nɛ e hi Yerusalem hu kɛ ye matsɛ jeha nyingmi etɛ kɛ etɛ.

28 E na ní babauu, nɛ a buu lɛ hulɔ. E bwɔ kotokoto loko e gbo, nɛ e bi Salomo ba ye matsɛ ngɛ e se.

29 Matsɛ David he sane kɛ je sisije kɛ ya si nyagbe ɔ, a ngma ngɛ gbali etɛ nɛ ɔmɛ a blema sanehi a mi: Samuel, Natan, kɛ Gad.

30 Níhi nɛ ngɛ sane nɛ ɔmɛ a mi ji Matsɛ David tsɛ yemi, e he wami, kɛ níhi tsuo nɛ ba lɛ David ɔ, Israel ma a, kɛ mahi nɛ bɔle mɛ ɔ a nɔ.