Kronika I, 26

Yawɛ we ɔ buli

1 Levi bi nɛ buu ngɛ Yawɛ we ɔ, bɔ nɛ a dla ní tsumi ngɔ ha mɛ ji nɛ ɔ nɛ. Ngɛ Kora weku ɔ mi ɔ, a hla Kore binyumu Meshelemia kɛ je Asaf we ɔ mi.

2 Meshelemia ngɛ binyumuhi kpaago. A biɛhi ngɛ a fɔmi nya ji Zakaria, Yediael, Zebadia, Yatniel,

3 Elam, Yehohanan, kɛ Eliehoenai.

4 ⓘ A hla Obed Edom binyumuhi kpaanyɔ nɛ Mawu kɛ dloo lɛ ɔ hulɔ. A biɛhi ngɛ a fɔmi nya ji Shemaya, Yehozabad, Yoa, Sakar, Netanel,

5 Amiel, Isakar, kɛ Peuletai.

6 Obed Edom bitɛte ɔ nɛ a tsɛɛ lɛ Shemaya a, ngɛ binyumuhi ekpa. A biɛhi ji Otni, Refael, Obed, Elzabad, Elihu, kɛ Semakia. A ngɛ blɔ nya ngɛ a weku ɔ mi, ejakaa nyumuhi katsɛmɛ ji mɛ, titli nyagbe ni enyɔ ɔmɛ.

7

8 Nihi nɛ a hla kɛ je Obed Edom we ɔ mi kɛ ha ní tsumi nɛ ɔ ji nyumuhi nyingmi ekpa kɛ enyɔ. Obed Edom bimɛ, kɛ bibimɛ ji mɛ tsuo. Katsɛmɛ ji mɛ, nɛ a ngɛ he blɔ kaa a tsuɔ ní ngɛ Yawɛ we ɔ.

9 Meshelemia we ɔ ha nyumuhi katsɛmɛ nyɔngma kɛ kpaanyɔ.

10 Nyumu ko ngɛ Merari weku ɔ mi nɛ a tsɛɛ lɛ Hosa. E ngɛ binyumuhi eywiɛ; a biɛhi ji Shimri, Hilkia, Tebalia, kɛ Zakaria. Hosa wo e bi Shimri nɔkɔtɔma, pohu pi lɛ ji bitɛte. Hosa weku li tsuo nɛ buu ngɛ Yawɛ we ɔ ji nyɔngma kɛ etɛ.

11

12 A dla Yawɛ we ɔ buli ɔmɛ kɛ wo kuuhi a mi ngɛ a weku ɔmɛ a nya, nɛ a tsuɔ ní ngɛ Yawɛ we ɔ kaa bɔ nɛ Levi bi kpa amɛ peeɔ ɔ.

13 A fɔ sɔ kɛ dla agbo ɔmɛ nɛ a maa bu a he ɔ kɛ ha we puɔ nya tsuaa we puɔ nya; a hyɛ we we puɔ nya ko klemi kɛ pee nɔ́ nɛ ɔ.

14 Nɛ́ a fɔ sɔ ɔ, a kɛ agbo ɔ nɛ ngɛ beleku je ɔ ha Shelamia, nɛ a kɛ omleyi je nɔ́ ɔ ha e bi Zakaria. Zakaria nɛ ɔ, a tsɔɔ kaa e woɔ ga kpakpa.

15 A kɛ agbo ɔ nɛ ngɛ leneyi je ɔ ha Obed Edom, nɛ e bimɛ ɔmɛ lɛɛ a ngɔ nito he ɔmɛ ngɔ wo a dɛ nɛ a bu he.

16 Shupim kɛ Hosa nɔ́ ji agbo ɔ nɛ ngɛ beleku je ɔ, kɛ Shaleket agbo ɔ, ngɛ gbɛjegbɛ nɛ ngɛ yiti je ɔ he.

17 Daa ligbi ɔ, buli ekpa ya buu agbo ɔ nɛ ngɛ beleku je ɔ nya; ni eywiɛ ya buu omleyi je nɔ́ ɔ nya, nɛ ni eywiɛ hu ya buu leneyi je nɔ́ ɔ nya. Buli eywiɛ ya buu nito he ɔmɛ daa ligbi; ni enyɔ buu kake he, nɛ ni enyɔ hu buu kake he.

18 Tsu nguaa a nɛ ngɛ bonyoku je ɔ, buli eywiɛ buu gbɛjegbɛ ɔ he ngɛ lejɛ ɔ, nɛ ni enyɔ buu tsu nguaa a nitsɛ he.

19 Bɔ nɛ a dla bumi ní tsumi ɔ ngɔ ha Kora kɛ Merari weku ɔmɛ ji nɛ ɔ nɛ.

Yawɛ we ɔ he ní tsumi kpa komɛ

20 Ahiya nɛ je Levi wɛtso ɔ mi ɔ hyɛɛ Mawu we ɔ nito he ɔmɛ, kɛ nito hehi he nɛ a toɔ nike níhi nɛ a gbaa nɔ ngɔ to ha Yawɛ ngɛ ɔ hu a nɔ.

21 Ladan nɛ ji Gershon bimɛ ɔmɛ a ti nɔ kake ɔ, e bi ji Yahiel. Yahiel we puɔ nya amɛ, kɛ we puɔ nya kpahi babauu a nɛ̃ ji lɛ.

22 Ladan bimɛ kpahi nɛ ji Zetam, kɛ Yoel ɔ, mɛɛ a ní tsumi ji a hyɛ Yawɛ nito he ɔ, kɛ nito he kpa amɛ a nɔ.

23 A dla ní tsumi ɔmɛ ekomɛ ngɔ ha Amram, Izhar, Hebron kɛ Uziel nina a hulɔ.

24 Yawɛ we ɔ nito he ɔ nɔ hyɛli ɔmɛ a nyatsɛ ji Shebuel. E je Mose bi Gershom weku ɔ mi.

25 Kɛ gu Gershom nyɛminyumu Eliezer nɔ ɔ, Shebuel peeɔ Shelomit nyɛmi. Eliezer bi ji Rehabia; Rehabia bi ji Yeshia; Yeshia bi ji Yoram; Yoram bi ji Zikri, nɛ Zikri bi ji Shelomit.

26 Nike ní tsuo nɛ Matsɛ David, we puɔ nya dali ɔmɛ, wɛtsoyi ɔmɛ, kɛ tatsɛmɛ ɔmɛ gbaa nɔ kɛ to ha Mawu ɔ, Shelomit kɛ e we mi bi ɔmɛ lɛ a hyɛɛ nɔ.

27 Ta yibu ní nɛ a ha ngɛ ta mi ɔ, a hla ekomɛ ngɔ to nɛ a gbaa nɔ, konɛ a ngɔ kɛ tsu ní ngɛ Yawɛ we ɔ.

28 Nɔ́ tsuaa nɔ́ nɛ a gbaa nɔ kɛ to konɛ a kɛ tsu ní ngɛ Yawɛ we ɔ, Shelomit kɛ e we mi bi ɔmɛ ji ni nɛmɛ nɛ a hyɛɛ nɔ. Ní ɔmɛ ekomɛ ji nike ní nɛ gbalɔ Samuel, Matsɛ Saul, Kish bi ɔ, Ner bi Abner, kɛ Zeruya bi Yoab ngɔ kɛ ba.

Levi bi kpa komɛ a ní tsumi

29 A hla Kenania kɛ e bimɛ ɔmɛ kɛ je Izhar nina a kpɛti, nɛ a pee mɛ Israel ma a nɔ hyɛli kɛ kojoli.

30 A hla Hashabia kɛ e nyɛminyumuhi akpe kɛ e nya lafa kpaago kɛ je Hebron bi ɔmɛ a kpɛti; katsɛmɛ ji mɛ tsuo. A ní tsumi ji a hyɛ jami, kɛ ma ní tsumi ɔmɛ a nɔ ngɛ Israel, ngɛ Yordan pa a bonyoku je.

31 Hebron nina a, a nya dalɔ ji Yeria. Matsɛ David yi nɔ jeha nɛ ji nyingmi eywiɛ ɔ mi ɔ, a ya hyɛ Hebron nina a weku kpa a mi, nɛ a na ta buli katsɛmɛ komɛ nɛ je weku nɛ ɔ mi ngɛ Yazer, ngɛ Gilead zugba a nɔ.

32 Matsɛ David hla katsɛmɛ nɛ ji we puɔ nya dali akpe enyɔ kɛ e nya lafa kpaago kɛ je Yeria nyɛmimɛ ɔmɛ a kpɛti. Mɛ ji ní nɛmɛ nɛ hyɛɛ jami, kɛ ma ní tsumi ɔmɛ a nɔ ngɛ Israel, ngɛ Yordan pa a beleku je, ngɛ Ruben, Gad, kɛ Manase wɛtso fa a a mi.