Kronika I, 24

Osɔfo ɔmɛ a ní tsumi

1 Kuuhi a mi nɛ a gba Aaron nina kɛ wo ji nɛ ɔmɛ nɛ. Aaron binyumuhi ji Nadab, Abihu, Eleazar, kɛ Itamar.

2 ⓗ Nadab kɛ Abihu gbo loko a tsɛ gbo, nɛ a si we bimɛ ngɛ a se. Enɛ ɔ he je ɔ, a nyɛmimɛ Eleazar kɛ Itamar ba pee osɔfohi.

3 Matsɛ David gba Aaron nina mi kɛ wo kuuhi a mi, ngɛ ní tsumihi nɛ a tsuɔ ɔ nya. Nihi nɛ piɛ e he kɛ to blɔ nya nɛ ɔ ji Zadok, Eleazar nina a, kɛ Ahimelek, Itamar nina a.

4 A gba Eleazar nina a mi kɛ wo kuu nyɔngma kɛ ekpa mi, nɛ a gba Itamar nina a mi kɛ wo kuu kpaanyɔ mi. Nɔ́ nɛ ha nɛ e ba lɛ kikɛ nɛ ɔ ji nyumuhi nikɔtɔmahi hiɛ ngɛ Eleazar nina a a kpɛti pe Itamar nina a.

5 A fɔ sɔ kɛ gba ní tsumi ha kuu slɔɔtoslɔɔto ɔmɛ tsuo, konɛ e ko pee kaa a hyɛ nɔ ko hɛ mi; ejakaa Yawɛ we ɔ ní tsuli, kɛ Mawu ní tsuli ngɛ Eleazar nina a, kɛ Itamar nina a tsuo a kpɛti.

6 Womi ngmalɔ ɔ nɛ a tsɛɛ lɛ Shemaya, Netanel binyumu ɔ nɛ je Levi bi ɔmɛ a kpɛti ɔ ji nɔ nɛ ngma a biɛ. A pee nɔ́ nɛ ɔ ngɛ matsɛ ɔ, kɛ ganɔ nɛ ɔmɛ a hɛ mi: osɔfo Zadok, Abiatar binyumu Ahimelek, osɔfo weku ɔmɛ a nya dali ɔmɛ, kɛ Levi weku ɔmɛ a nya dali ɔmɛ. Ke a hla kuu kake kɛ je Eleazar nina a a kpɛti, kɛkɛ a hla kake hu kɛ je Itamar nina a a kpɛti.

7 Benɛ a fɔ sɔ ɔ, bɔ nɛ e ba ha kɛ je kekleekle blɔ he ɔ kɛ ya si nyagbe nɔ́ nɛ ji nyingmi enyɔ kɛ eywiɛ ɔ nɔ ji nɛ ɔ nɛ. 1. Yehoyarib 2. Yedaya 3. Harim 4. Seorim 5. Malkiya 6. Miyamin 7. Hakoz 8. Abiya 9. Yeshua 10. Shekania 11. Eliashib 12. Yakim 13. Hupa 14. Yeshebeab 15. Bilga 16. Imer 17. Hezir 18. Hapizez 19. Petahia 20. Yehezkel 21. Yakin 22. Gamul 23. Delaya 24. Maazia.

8

9

10

11

12

13

14

15

16

17

18

19 Enɛ ɔ ji ní tsumi nɛ a ha mɛ ɔ he blɔ nya tomi nɛ fɔɔ si, nɛ e nɔ a daa kɛ ya sɔmɔɔ ngɛ Yawɛ we ɔ. A nɛ̃, Aaron ji nɔ nɛ to blɔ nya nɛ ɔ kɛ fɔ si kaa bɔ nɛ Yawɛ, Israel Mawu ɔ fa lɛ ɔ.

Levi bi ɔmɛ a biɛhi

20 Levi nina nɛ piɛ ɔ ji nɛ ɔmɛ nɛ: Amram nina ji Shebuel, nɛ Shebuel nina ji Yedeya;

21 Rehabia nina ji Ishia;

22 Izhar nina ji Shelomit, nɛ Shelomit nina ji Yahat;

23 Hebron binyumuhi ji nɛ ɔmɛ ngɛ a fɔmi nya: Yeria, Amaria, Yehaziel, kɛ Yekameam;

24 Uziel nina ji Mika, nɛ Mika nina ji Shamir;

25 Mika nyɛminyumu ji Ishia; Ishia nina ji Zakaria;

26 Merari nina ji Mahli, Mushi, kɛ Yaazia.

27 Yaazia ngɛ binyumuhi etɛ. A biɛhi ji Shoham, Zakur, kɛ Ibri.

28 Mahli binyumuhi ji Eleazar, kɛ Kish. Eleazar be bi, se Kish lɛɛ e ngɛ binyumu nɛ a tsɛɛ lɛ Yerameel.

29

30 Mushi ngɛ binyumuhi etɛ. A biɛhi ji Mahli, Eder, kɛ Yeremot. Levi bi ɔmɛ a wekuhi ji nɛ ɔmɛ ɔ nɛ.

31 Kaa bɔ nɛ Levi bi ɔmɛ a nyɛmimɛ osɔfo ɔmɛ nɛ ji Aaron nina a pee ɔ, Levi bi ɔmɛ hu fɔ sɔ kɛ dla ní tsumi ɔmɛ ngɔ ha a he. Weku ɔmɛ a nya dali, kɛ a senihi ji ni nɛmɛ nɛ fɔ sɔ ɔ. A fɔ sɔ nɛ ɔ ngɛ Matsɛ David, Zadok, Ahimelek, osɔfo ɔmɛ, kɛ Levi bi ɔmɛ a nikɔtɔma amɛ a hɛ mi.