Kronika I, 21

David kane ma a

(<x>100 24:1-25</x>)

1 Abosiami ba te si ngɔ wo Israel, nɛ e wo David ga yaya ke e kane Israel ma a.

2 Lɔ ɔ he ɔ, David fa Yoab, kɛ asafoatsɛmɛ ɔmɛ ke, “Nyɛɛ ya nɛ nyɛ ya kane Israel ma a, kɛ je Beersheba kɛ yaa si Dan, nɛ nyɛ ba de mi. Ma suɔ nɛ ma le ma a hiɛmi.”

3 Yoab de matsɛ ɔ ke, “I ná nɛ Yawɛ ha nɛ ma a hiɛmi ba pee nimli nɛ ngɛ amlɔ nɛ ɔ a yibɔ totoe lafa! Nɛ ke e ba ja a, pi mo nɛnɛ, o tsɔli ji mɛ tsuo lo? Mɛni he je o ngɛ hlae nɛ o pee nɔ́ nɛ ɔ? O li kaa o kɛ haomi maa ba ma a tsuo nɔ lo?”

4 Se matsɛ ɔ nyɛ Yoab nɔ nɛ e bu e fami ɔ tue. Yoab ho, nɛ e ya kpa Israel zugba a tsuo nɔ; nɛ e kpale kɛ ba Yerusalem.

5 E ba bɔ Matsɛ David amaniɛ ke a ya kane nyumuhi nɛ a he wa, nɛ a su ta yami ayɔ kɛ e nya akpe lafa, ngɛ Israel, kɛ akpe lafa eywiɛ kɛ nyingmi kpaago ngɛ Yuda.

6 Se akɛnɛ matsɛ ɔ fami ɔ ngɔɛ Yoab nya he je ɔ, e kane we Levi, kɛ Benyamin wɛtso ɔmɛ.

7 Sane nɛ ɔ ngɔɛ Mawu nya; enɛ ɔ he je ɔ, e gbla Israel ma a tue.

8 David de Mawu ke, “I pee yayami agbo kaa i tsu kikɛmɛ a ní nɛ ɔ. I kpa mo pɛɛ nɛ o ngɔ kɛ pa mi. I je kuasia.”

9 Kɛkɛ nɛ Yawɛ de Gad, David gbalɔ ɔ ke,

10 “Yaa nɛ o ya de David ke i ngɔ nɔ́ etɛ kɛ ngɛ e hɛ mi fɔe. E hla kake, nɛ lɔ ɔ maa pee e tue gblami.”

11 Gad ba David ngɔ nɛ e ba bɔ lɛ amaniɛ, nɛ e bi lɛ ke, “Te nɔ́ nɛ o suɔ nɛɛ?

12 Hwɔ nɛ ba o zugba a nɔ jeha etɛ? Aloo o hi fo tue ngɛ o he nyɛli ɔmɛ a tabo ɔmɛ a nya hlami etɛ? Aloo Yawɛ nɛ ngɔ e klaate ɔ kɛ fia mo ní, nɛ e tsɔ e bɔfo ɔ nɛ e kɛ gbenɔ hiɔ nɛ ba Israel zugba a nɔ tsuo ligbi etɛ? Mɛni heto ma ngɔ kɛ ya ha nɔ nɛ tsɔ mi ɔ?”

13 David de Gad ke, “Sane nɛ ɔ he wa ha mi wawɛɛ nitsɛ! Se kɛ̃ ɔ, i be suɔe nɛ nimli adesahi nɛ a gbla ye tue. Ha nɛ Yawɛ nitsɛ nɛ gbla ye tue, ejakaa e mɔbɔ nami ɔ hiɛ babauu.”

14 Lɔ ɔ he ɔ, Yawɛ ha gbenɔ hiɔ ba Israel ma a nɔ, nɛ nihi akpe nyingmi kpaago gbo.

15 Jehanɛ, e tsɔ e bɔfo ɔ, konɛ e ya kpata Yerusalem hɛ mi. Se benɛ bɔfo ɔ miɔ nɛ e ma puɛ ní ɔ, Yawɛ tsake e yi mi tomi ɔ, nɛ e de bɔfo ɔ ke, “Mo kpa! E hiɛ!” Jamɛ a be ɔ mi ɔ, Yawɛ bɔfo ɔ daa si ngɛ Yebus no ɔ nɛ a tsɛɛ lɛ Arauna a ngma mi sami he ɔ.

16 David na Yawɛ bɔfo ɔ nɛ daa si ngɛ hiɔwe kɛ zugba a kpɛti. E hɛɛ e klaate ɔ ngɛ e dɛ mi, nɛ e miɔ nɛ e ma kpata Yerusalem hɛ mi. Kɛkɛ nɛ David kɛ ma nimeli ɔmɛ tsuo kpla si, nɛ a ngɔ a hɛ mi ngɔ bu si. Mɛ tsuo a bu kpekpe.

17 David sɔle ke, “Mawu lee, imi lɛ i pee yayami ɔ nɛ; imi lɛ i tɔ̃. Imi ji nɔ nɛ fa ke a kane ma a nɛ. Nimli nɛ ɔmɛ nɛ a ngɛ kaa jijɔhi ɔ lɛɛ mɛni a pee? Yawɛ, ye Mawu, i kpa mo pɛɛ nɛ o gbla i kɛ ye tsɛ we ɔ kɛkɛ wa tue; o ma a lɛɛ ha nɛ a ye a he.”

18 Enɛ ɔ se ɔ, Yawɛ bɔfo ɔ de Gad ke e fa David nɛ e ya ma bɔ sami la tɛ ha Yawɛ ngɛ Arauna ngma mi sami he ɔ.

19 David bu Yawɛ fami ɔ tue, nɛ e ho kaa bɔ nɛ Gad de lɛ ɔ.

20 Arauna kɛ e binyumu eywiɛ ɔmɛ ngɛ ngma mi sae ngɛ ngma mi sami he ɔ jamɛ a be ɔ. Benɛ a na Yawɛ bɔfo ɔ, Arauna bimɛ ɔmɛ tu fo ya laa a he, se Arauna nitsɛ lɛɛ e ya nɔ nɛ e sa ngma a mi.

21 Benɛ Arauna na Matsɛ David nɛ ma ngɛ blɔ ɔ nɔ ɔ, e je ngma mi sami he ɔ nɛ e ya kpla si nɛ e kɛ e hɛ mi bu si.

22 David de lɛ ke, “Moo jua o ngma mi sami he ɔ ha mi nɛ ma ma bɔ sami la tɛ ngɛ nɔ kɛ ha Yawɛ konɛ gbenɔ hiɔ ɔ se nɛ po. Ma wo mo hiɔ sisiisi.”

23 Arauna de David ke, “Nɛnɛ, ngɔɔ nɛ o kɛ pee nɔ́ tsuaa nɔ́ nɛ o suɔ. Nahi nɛ o kɛ maa sã sami bɔ ɔ ji nɛ ɔmɛ nɛ. Jehanɛ, tsohi nɛ a saa ngma mi ngɛ a nɔ ɔ ji nɛ ɔmɛ, nɛ o kɛ pee lɛ́. Ngma hu ji nɛ ɔ nɛ o kɛ pee niye ní bɔ. I ngɔ ní nɛ ɔmɛ tsuo kɛ ke mo.”

24 Se matsɛ ɔ de Arauna ke, “Dɛbi, ma wo mo hiɔ sisiisi. I be níhi ngɔe ngɛ o dɛ gu kɛ ha Yawɛ. Jehanɛ se hu, i kɛ níhi nɛ i ná yaka be sami bɔ sãe ha Yawɛ, ye Mawu ɔ.”

25 Lɔ ɔ he ɔ, David ngɔ sika tsu yi lafa ekpa kɛ he ngma mi sami he ɔ.

26 E ma bɔ sami la tɛ kɛ ha Yawɛ ngɛ lejɛ ɔ, nɛ e sã sami bɔhi, kɛ tue mi jɔmi bɔhi. E fa kue ha Yawɛ, nɛ Yawɛ bu e kue fami ɔ tue. Yawɛ ha nɛ la je hiɔwe ba sã ní ɔmɛ ngɛ bɔ sami la tɛ ɔ nɔ.

27 Enɛ ɔ se ɔ, Yawɛ fa e bɔfo ɔ ke e ngɔ e klaate ɔ kɛ wo kpo ɔ mi; nɛ e pee ja.

28 Jamɛ a be ɔ mi ɔ, David na faii kaa Yawɛ bu kue nɛ e fa ha lɛ ɔ tue; lɔ ɔ he ɔ, e sã bɔhi ha lɛ ngɛ bɔ sami la tɛ ɔ nɔ ngɛ Arauna ngma mi sami he ɔ.

29 Yawɛ kpe he bo tsu ɔ nɛ Mose pee ngɛ nga a nɔ ɔ, kɛ bɔ sami la tɛ ɔ ngɛ jami he ɔ ngɛ Gibeon jamɛ be ɔ mi kɛ mwɔɔ.

30 Se David nyɛ we nɛ e ya bi Mawu ga womi ngɛ lejɛ ɔ, ejakaa e ngɛ Yawɛ bɔfo ɔ klaate ɔ gbeye yee.