1 A ngɔ Yawɛ daka a ya ma bo tsu ɔ nɛ David pee kɛ ha lɛ ɔ mi, nɛ a sã sami bɔhi, kɛ tue mi jɔmi bɔhi kɛ ha Mawu.
2 Benɛ David sã bɔ ɔmɛ gbe nya a, e gbaa ma a ngɛ Yawɛ biɛ mi,
3 nɛ e dla ní ha ma kpekpemi ɔ, nyumuhi kɛ yihi tsuo. Nɔ tsuaa nɔ ná abolo bɔbɔɛ kake, lo nɛ a sã kpɔ kake, kɛ wai yiblii gbigbli nɛ a kɛ si tatale.
4 David hla Levi bi komɛ nɛ a da ma a nya kɛ ja Yawɛ, Israel Mawu ɔ ngɛ somi daka a hɛ mi; a ní tsumi ji a tsɛ Mawu, a na Mawu si, nɛ a je Mawu yi daa.
5 Asaf ji a nyatsɛ, nɛ e he piɛlɔ ji Zakaria. Yeyel, Shemiramot, Yehiel, Metitia, Eliab, Benaya, Obed Edom, kɛ Yeyel maa fia kpa saku. Asaf maa fia ngmlɛ,
6 nɛ osɔfohi enyɔ ma kpa titimati ngɛ somi daka a hɛ mi daa. Nɔ kake biɛ ji Benaya, nɛ nɔ kake hu biɛ ji Yahaziel.
7 Jamɛ a ligbi ɔ ji kekleekle be nɛ David ngɔ he blɔ nɛ ɔ ngɔ ha Asaf, kɛ e nyɛmimɛ Levi bi ɔmɛ kaa a la nɛ a kɛ je Yawɛ yi.
Yi jemi la
(<x>230 105:1-15</x>; <x>230 96:1-13</x>; <x>230 106:1</x>, <x>230 106:47-48</x>)
8 Nyɛɛ na Yawɛ si, nyɛɛ wo e biɛ ta; nyɛ ha je ma amɛ nɛ a le e ní peemi ní ɔmɛ.
9 Nyɛ la kɛ je Yawɛ yi; nyɛɛ sɛɛ nyakpɛ níhi nɛ e pee ɔ.
10 Nyɛɛ wo Yawɛ biɛ klɔuklɔu ɔ hɛ mi nyami. Nyɛ nihi nɛ nyɛ hlaa e se blɔ ɔ, nyɛ nya kɛ nyɛ tsui tsuo!
11 Nyɛɛ ya Yawɛ ngɔ nɛ nyɛ ya bi yemi kɛ buami; nyɛ ja lɛ daa.
12 Nyɛ Mawu tsɔlɔ Yakob nina, Israel nina, nyɛ nɛ Mawu hla; nyɛ kai nyakpɛ níhi nɛ Mawu pee ɔ, kɛ bɔ nɛ e kojo je ma amɛ ha.
13
14 Yawɛ ji wa Mawu; e mlaa amɛ ngɛ kɛ ha je ɔ tsuo.
15 Nyɛ hɛ ko je Mawu somi ɔ nɔ gblegbleegble, somi nɛ ngɛ kɛ yaa neneene ɔ,
16 ⓡ somi nɛ e kɛ Abraham so, kɛ si nɛ e wo Isak ɔ.
17 ⓢ Yawɛ ma somi nɛ ɔ nɔ mi kɛ ha Yakob kaa mlaa; nɛ e pee somi nɛ ngɛ kɛ yaa neneene kɛ ha Israel.
18 Yawɛ de lɛ ke, “I kɛ Kanaan zugba a ma ha mo; e maa pee o weto ní.”
19 Yawɛ ma a, a he pi, nibwɔhi ji mɛ ngɛ Kanaan.
20 A wo lalaalo kɛ je zugba kake nɔ kɛ ya zugba kpa nɔ, kɛ je nɔ yemi he kake, kɛ ya nɔ yemi he kpa.
21 ⓣ Se Yawɛ ngmɛ́ blɔ nɛ nɔ ko nɛ wa mɛ yi mi; e bɔ matsɛmɛ ɔmɛ kɔkɔ ngɛ a he.
22 E ke, “Ye tsɔli ɔmɛ nɛ i hla a, nyɛ ko pee mɛ yayami ko; nyɛ ko ta ye gbali ɔmɛ hu a he.”
23 Nyɛ la ha Yawɛ, nyɛ je ɔ tsuo! Nyɛɛ fiɛ manye sane ɔ daa ligbi kaa Yawɛ he wa yi wami.
24 Nyɛɛ sɛɛ e hɛ mi nyami ɔ he ní ha je ma amɛ. E nyakpɛ ní tsumi ɔmɛ hu, nyɛ de nɛ ma amɛ tsuo nɛ a nu.
25 Yawɛ kle, nɛ e sa yi jemi wawɛɛ nitsɛ. E sa nɛ a wo e hɛ mi nyami pe mawu ɔmɛ tsuo.
26 Je ma kpa amɛ a mawu ɔmɛ ɔ, amagahi kɛkɛ ji mɛ. Se Yawɛ lɛɛ, lɛ nɛ e bɔ hiɔwe.
27 Hɛ mi nyami, kɛ agboje bɔle lɛ kɛ kpe; he wami kɛ bua jɔmi hyi e we ɔ.
28 Nyɛ je ma amɛ tsuo, nyɛ je Yawɛ yi; nyɛ je e hɛ mi nyami, kɛ e he wami ɔ yi.
29 Nyɛɛ ngɔ hɛ mi nyami nɛ sa Yawɛ biɛ ɔ kɛ ha lɛ; nyɛɛ hɛɛ nɔke nɔ́ ko kɛ ba e hɛ mi. Nyɛɛ pee nyɛ he klɔuklɔu; nyɛ bua nyɛ he nya, nɛ nyɛ ja Yawɛ.
30 Nyɛ je ɔ tsuo, nyɛ he nɛ do ngɛ e hɛ mi! A ngɔ je ɔ ngɔ ma si ngɛ e hi he, nɛ nɔ ko be nyɛe ma mimiɛ lɛ.
31 Hiɔwe kɛ zugba, nyɛ nya! Nyɛ de je ma amɛ ke Yawɛ ngɛ matsɛ yee.
32 Wo, kɛ o mi níhi tsuo, nyɛɛ wo gbi; ngmɔhi, kɛ nyɛ nɔ ní tsuo, nyɛ nya!
33 Ke Yawɛ ma nɛ e ba kojo je ɔ, pu mi tsohi ma hwɔ lele ngɛ e hɛ mi.
34 ⓤ Nyɛɛ na Yawɛ si, ejakaa e hi; e suɔmi ɔ ngɛ kɛ yaa neneene.
35 Nyɛ de hu ke, “Mawu, wa yi wami helɔ lee, he wa yi wami. Bua wa nya ngɛ he kake; kpɔ wɔ ngɛ je ma amɛ a dɛ mi, konɛ waa na mo si nɛ wa je o biɛ klɔuklɔu ɔ yi.”
36 Nyɛ je Yawɛ yi; nyɛ je Israel Mawu ɔ yi! Nyɛ je e yi mwɔnɛ ɔ, kɛ daa! Kɛkɛ nɛ ma a tsuo he nɔ ke, “Amen”, nɛ a je Yawɛ yi.
Jami ngɛ Yerusalem kɛ Gibeon
37 David ngɔ Asaf kɛ e nyɛmimɛ Levi bi ɔmɛ ngɔ to jami ní tsumi ɔ nya ngɛ he nɛ a ngɔ somi daka a ya ma a. Daa ligbi ɔ, ní tsumi tsuaa ní tsumi nɛ hia kaa a tsu ngɛ lejɛ ɔ, a tsuɔ.
38 A he piɛli ji Yedutun binyumu Obed Edom, kɛ nyumuhi nyingmi ekpa kɛ kpaanyɔ nɛ je e weku ɔ mi. Hosa kɛ Obed Edom ji agbo nya buli.
39 Osɔfo Zadok, kɛ e nyɛmimɛ osɔfo ɔmɛ lɛɛ e ha mɛ ní tsumi ngɛ Yawɛ kpe he bo tsu ɔ nɛ ngɛ Gibeon ɔ mi.
40 Daa mɔtu kɛ gbɔkuɛ ɔ, a ní tsumi ji a sã sami bɔ ha Yawɛ ngɛ bɔ sami la tɛ ɔ nɔ kaa bɔ nɛ a ngma ngɛ mlaa a nɛ Yawɛ ngɔ ha Israel ɔ mi ɔ.
41 Ni nɛmɛ nɛ piɛɔ a he kɛ tsuɔ ní tsumi nɛ ɔ ngɛ lejɛ ɔ ji Heman, Yedutun, kɛ ni komɛ nɛ a je blɔ hla mɛ ke a la kɛ je Yawɛ yi ngɛ e suɔmi nɛ ngɛ daa a he.
42 Heman kɛ Yedutun a ní tsumi kpa hu ji a hyɛ titimati kpami, kɛ ngmlɛ kɛ saku fiami ɔ nɔ be mi nɛ a ngɛ yi jemi la amɛ lae ɔ. Agbo nya bumi ní tsumi ɔ, a kɛ ha Yedutun weku ɔ.
43 ⓥ Pee se ɔ, nɔ tsuaa nɔ je kɛ ho e we mi ya. David hu ho lɛ nitsɛ e we mi ya, nɛ e kɛ e we mi bimɛ ya hi si kɛ bua jɔmi.