Kronika I, 10

Matsɛ Saul gbenɔ

(<x>90 31:1-13</x>)

1 Ligbi ko ɔ, Filisti bi ɔmɛ kɛ Israel bi ɔmɛ hwu ta ngɛ Gilboa yo ɔ nɔ. A gbe Israel bi ɔmɛ babauu nitsɛ ngɛ lejɛ ɔ, nɛ ni nɛmɛ nɛ piɛ ɔ tu fo.

2 Se Filisti bi ɔmɛ ya na mɛ, nɛ a gbe Saul binyumuhi etɛ: Yonatan, Abinadab, kɛ Malkishua.

3 Ta a ba na Saul, nɛ e yi fi wawɛɛ nitsɛ. Kɛ̃ɛ̃ tsɛ̃li ɔmɛ a nine su e nɔ, nɛ a plaa lɛ wawɛɛ.

4 Kɛkɛ nɛ Saul de e ta hwumi ní hɛɛlɔ ɔ ke, “Moo hia o klaate ɔ nɛ o kɛ gbe mi, nɛ́ mɔmlɔtɔtsɛmɛ nɛ ɔmɛ ko ba gbe mi nɛ a bɔ mi ahlua.” Se niheyo ɔ ye gbeye, nɛ e sume kaa e maa pee ja. Lɔ ɔ he ɔ, Saul nitsɛ ngɔ e klaate ɔ nɛ e kɛ gbe e he.

5 Benɛ Saul ta hwumi ní hɛɛlɔ ɔ na kaa Saul gbo ɔ, lɛ hu e kɛ lɛ nitsɛ e klaate ɔ gbe e he.

6 Bɔ nɛ Saul kɛ e binyumu etɛ ɔmɛ tsuo gbo si kake too, nɛ e we ɔ hɛ mi kpata ji nɛ ɔ nɛ.

7 Benɛ Israel bi ɔmɛ nɛ ngɛ Yezreel kɔ̃ ɔ mi ɔ nu kaa Israel ta a gbɛ, nɛ jehanɛ hu, Saul kɛ e binyumu ɔmɛ gbo ɔ, a tu fo kɛ je a ma amɛ a mi; nɛ Filisti bi ɔmɛ ba nɛ a ba hi lejɛ ɔmɛ.

8 Enɔ jena benɛ Filisti bi ɔmɛ ba nɛ a ba ha ni gbogboe ɔmɛ a he níhi ɔ, a na Saul kɛ e binyumu etɛ ɔmɛ nɛ a gbo kɛ pueɔ si ngɛ Gilboa yo ɔ nɔ.

9 A po Saul yi, nɛ a je ta hwumi ní ɔmɛ ngɛ e he, nɛ a kɛ tsɔ nihi ke a ya kpa Filistia tsuo, nɛ́ a sɛɛ manye munyu nɛ ɔ ha amaga amɛ, kɛ ma a tsuo.

10 A ngɔ e ta hwumi ní ɔmɛ ya to a mawu ɔmɛ a jami he ɔ, nɛ a kɛ e yi koklodo ɔ ya bɛle si ngɛ Dagon jami he ɔ.

11 Benɛ Yabesh Gilead bi ɔmɛ nu nɔ́ nɛ Filisti bi ɔmɛ pee Saul ɔ,

12 ta buli katsɛmɛ ɔmɛ tsuo ya nɛ a ya ngɔ Saul gbogboe ɔ, kɛ e binyumu ɔmɛ a ní ɔmɛ kɛ ba Yabesh ba pu ngɛ tso ngua a sisi. Nɛ a ha hwɔ ligbi kpaago.

13 ⓚ Saul gbo, ejakaa e yi Yawɛ anɔkuale. E tɔ Yawɛ mlaa amɛ a nɔ; jehanɛ hu, e ya ní peelɔ ngɔ nɛ e ya tsɛ kpade nɛ e bi lɛ ga womi,

14 se Yawɛ mohu lɛɛ e bi we lɛ ga womi. Enɛ ɔ he je ɔ, Yawɛ gbe lɛ, nɛ e ngɔ e matsɛ yemi ɔ ngɔ ha Ishai bi David.