Matsɛmɛ II, 6

Gbiɛ ɔ nɛ Elisha je ngɛ pa mi ɔ

1 Ligbi ko ɔ, gbali a kuu ɔ nɛ Elisha ngɛ a nɔ hyɛe ɔ de lɛ ke, “Hyɛ, he nɛ wa ngɛ nɛ ɔ klee we ha wɔ hu.

2 Ha nɛ waa ya Yordan pa a nya nɛ wa ya poo tso kakaaka nɛ wa kɛ pee sihi he ha wa he.” E de mɛ ke, “Nyɛɛ ya!”

3 A ti nɔ kake kpa lɛ pɛɛ ke e kɛ mɛ nɛ ya; nɛ e kplɛɛ nɔ

4 nɛ e kɛ mɛ ho. Benɛ a ya su Yordan pa a nya a, a bɔni tso ɔmɛ hɛɛmi pue si.

5 Se benɛ a ti nɔ kake ngɛ tso ko poe ɔ, e gbiɛ yi ɔ kpɔ nɔ pa a mi. Kɛkɛ nɛ e kpa ngmlaa nɛ e de ke, “Ao, ye nyɔmtsɛ! Gbiɛ ɔ; gbiɛ nɛ a ya ba!”

6 Mawu nɔmlɔ ɔ bi lɛ ke, “Jije e nɔ?” Nyumu ɔ tsɔɔ lɛ he nɛ gbiɛ ɔ nɔ. Kɛkɛ nɛ Elisha po tso nɛ e sake kɛ fɔ lejɛ ɔ, nɛ nɔ́ nɛ ɔ ha dade ɔ ba je nyu hɛ.

7 Elisha de nyumu ɔ ke, “Yaa nɛ o ya kɛ̃!” Nɛ e juale e nine nɛ e kɛ̃ dade ɔ.

A ye Siria tabo ɔ nɔ kunimi

8 Be ko ɔ, Siria matsɛ kɛ Israel na ta, nɛ e kɛ e tsɔli ɔmɛ so kaa a ma ya bua a he nya ngɛ he ko.

9 Se Mawu nɔmlɔ ɔ tsɔ ya naa Israel matsɛ ɔ nane nɔ ke e ko ya lejɛ ɔ; ejakaa Siria bi ɔmɛ ma ya wo ka ngɛ lejɛ ɔ.

10 Lɔ ɔ he ɔ, Israel matsɛ ɔ hu tsɔ ya de ni ɔmɛ ngɛ lejɛ ɔ ke a hɛ nɛ hi a he nɔ. Nɔ́ nɛ ɔ ya nɔ si abɔ.

11 Nɔ́ nɛ ɔ hao Siria matsɛ ɔ juɛmi; lɔ ɔ he ɔ, e tsɛ e tsɔli ɔmɛ nɛ e bi mɛ ke, “Nyɛ ti mɛnɔ lɛ ngɛ Israel matsɛ ɔ se? Anɛ nyɛ be mi dee lo?”

12 E tsɔli ɔmɛ a ti nɔ kake he nɔ ke, “Ye nyɔmtsɛ matsɛ! Pi nɔ ko nɔ ko! Gbalɔ Elisha nɛ ngɛ Israel ɔ, lɛ ji nɔ nɛ ke o tu munyu ngɛ o se tsu mi po nɛ e deɔ Israel matsɛ ɔ nɛ.”

13 Matsɛ ɔ fa ke, “Nyɛɛ ya nɛ nyɛ ya hla e hi he, konɛ ma tsɔ nɛ a ya nu lɛ kɛ ba!” Benɛ a ba bɔ lɛ amaniɛ kaa Elisha ngɛ Dotan ɔ,

14 e wo ta buli babauu blɔ, kɛ okpɔngɔhi, kɛ ta zugba lɛhi kɛ ho lejɛ ɔ ya. A ya su lejɛ ɔ nyɔ mi, nɛ a sa ma a yi.

15 Makɛ mla a, Mawu nɔmlɔ Elisha tsɔlɔ ɔ te si momo. Benɛ e je kpo ɔ, e na kaa ta buli, okpɔngɔhi, kɛ ta zugba lɛhi bɔle ma a kɛ kpe. Kɛkɛ nɛ e de ke, “Akuanyɛ! Ye nyɔmtsɛ, kɛ wa maa pee kɛɛ?”

16 Elisha de lɛ ke, “Koo ye gbeye! Nimli nɛ ngɛ wa se ɔ, a hiɛ babauu pe ni nɛmɛ nɛ ngɛ mɛɛ a se ɔ.”

17 Kɛkɛ nɛ Elisha sɔle nɛ e de ke “Yawɛ, i kpa mo pɛɛ, bli e hɛngmɛ nɛ e hyɛ nɔ́.” Yawɛ bli niheyo ɔ hɛngmɛ; nɛ benɛ e ke e hyɛɛ ɔ, la okpɔngɔhi, kɛ la ta zugba lɛhi babauu ji nɛ ɔ ngɛ yoku ɔ nɔ nɛ bɔle Elisha kɛ kpe.

18 Benɛ Siria bi ɔmɛ ba tua Elisha a, e fa kue ha Yawɛ ke, “I kpa mo pɛɛ, ha nɛ nimli nɛ ɔmɛ a hɛ nɛ yu!” Yawɛ bu e kue fami ɔ tue, nɛ e ha a hɛ yu.

19 Kɛkɛ nɛ Elisha de mɛ ke, “Ma a nɛ nyɛ yaa mi ɔ, pi lɛ ji nɛ ɔ; nyɛ tla blɔ. Nyɛɛ nyɛɛ ye se, nɛ i kɛ nyɛ maa ya nyumu ɔ nɛ nyɛ ngɛ hlae ɔ ngɔ!” Nɛ e kpaka mɛ kɛ ho Samaria ya.

20 Benɛ a su Samaria a, Elisha sɔle nɛ e de ke, “Yawɛ, bli nimli nɛ ɔmɛ a hɛngmɛ, nɛ a hyɛ nɔ́!” Yawɛ bli a hɛngmɛ nɛ a na kaa a ngɛ Samaria ma a mi.

21 Benɛ Israel matsɛ ɔ na mɛ ɔ, e bi Elisha ke, “Tsaatsɛ, ma gbe mɛ lo? Ma gbe mɛ lo?”

22 E he nɔ ke, “Dɛbi! Koo gbe mɛ! Nimli nɛ o ya nuu nyɔguɛ kɛ o klaate kɛ o kɛ̃ɛ̃ po, anɛ o maa gbe mɛ lo? Ha mɛ nɔ́ ko nɛ a ye, nɛ o ha mɛ nyu nɛ a nu, nɛ a kpale kɛ ho a nyɔmtsɛ ɔ ngɔ ya.”

23 Kɛkɛ nɛ Israel matsɛ ɔ ngmɛ mɛ okplɔɔ agbo. Benɛ a ye ní nɛ a nu nɔ́ ko ɔ, e wo mɛ blɔ; nɛ a kpale kɛ ho Siria matsɛ ɔ ngɔ ya. Kɛ je lɔ ɔ se ɔ, Siria bi ɔmɛ ya tua we Israel zugba a hu.

A sa Samaria yi

24 Pee se ɔ, Siria matsɛ, Benhadad bua e tabo ɔ nya, nɛ e ya sa Samaria yi.

25 Enɛ ɔ he je ɔ, hwɔ nɛ nya wa ba Samaria hluu kɛ ya si a jua teji yi tɔ kake sika hiɔ yi nyingmi kpaanyɔ. Lahuɛ fĩ[1] hu he jua ji sika hiɔ yi enuɔ.

26 Ligbi ko, benɛ Israel matsɛ ɔ ngɛ nyɛɛe ngɛ gbogbo nɛ a fia kɛ bɔle ma a nɔ ɔ, yo ko kpa ngmlaa nɛ e de lɛ ke, “Ye nyɔmtsɛ matsɛ, mo wa mi!”

27 Matsɛ ɔ he nɔ ke, “Ke Yawɛ nitsɛ wa we mo ɔ, kɛ imi lɛɛ ma pee kɛ wa mo kɛɛ? Anɛ i ngɛ ngma, aloo wai?

28 Mɛni ji o sane ɔ?” E he nɔ ke, “Ligbi ko ɔ, yo nɛ ɔ de mi ke ma ngɔ ye binyumuyo ɔ kɛ ba nɛ waa ye, konɛ e nɔ jena nɛ waa ye lɛ hu e binyumuyo ɔ.

29 ⓗ Kɛkɛ nɛ wa hoo ye binyumuyo ɔ nɛ wa ye. E nɔ jena a, i de lɛ ke e ngɔ e binyumuyo ɔ kɛ ba nɛ waa ye; se e ngɔ lɛ kɛ laa.”

30 Benɛ matsɛ ɔ nu nɔ́ nɛ yo ɔ de ɔ, e hao nɛ e hía e tade ɔmɛ. Nɛ benɛ e ngɛ nyɛɛe ngɛ gbogbo ɔ nɔ ɔ, ma a na lɛ; nɛ a yɔse kaa e bu kpekpe ngɛ e tade ɔmɛ a sisi.

31 Kɛkɛ nɛ e kpa ngmlaa nɛ e de ke, “Ke i ha we nɛ a po Shafat binyumu Elisha yi mwɔnɛ ligbi nɛ ɔ fii, Mawu nɛ gbe mi!”

32 Nɛ e tsɔ nyumu ko ke e ya tsɛ Elisha kɛ ba. Jamɛ a be ɔ mi ɔ, Elisha kɛ ma nimeli komɛ nɛ ma lɛ slaami ɔ hii si ngɛ e we ɔ mi. Benɛ tsɔlɔ ɔ na we nɛ e su we ɔ mi ɔ, Elisha de ma nimeli ɔmɛ ke, “Tse nyɛ na kaa nɔmlɔ gbelɔ nɛ ɔ tsɔ nɛ́ a ba po ye yi! Nyɛ le piɔ, ke tsɔlɔ ɔ ba a, nyɛ nga sinya a, nɛ nyɛ ko ngmɛ lɛ blɔ nɛ e sɛ tsu ɔ mi. Matsɛ ɔ nitsɛ nyɛɛ e se kɛ ma.”

33 Benɛ e kɛ mɛ ngɛ munyu tue, nɛ e nya na we nɛ e nɔ si ɔ, matsɛ ɔ ba hia kpo; nɛ e de ke, “Haomi nɛ ɔ, Yawɛ ngɔ e je! Lɛɛ mɛni he i pa ngɛ Yawɛ mlɛe ma pee mɔ?”