Matsɛmɛ II, 22

Yuda matsɛ, Yosia

(<x>140 34:1-2</x>)

1 ⓣ Yosia ye jeha kpaanyɔ benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyingmi etɛ kɛ kake. E nyɛ ji Yedida, Adaya nɛ je Bozkat biyo ɔ.

2 Yosia ní peemi níhi sa Yawɛ hɛ mi. E ya wo e nɛ̃ David nane ngɛ nɔ́ tsuaa nɔ́ peemi mi, nɛ e ye Mawu mlaa amɛ tsuo a nɔ sisiisi.

A na mlaa womi ɔ

(<x>140 34:8-28</x>)

3 Matsɛ Yosia yi nɔ jeha nɛ ji nyɔngma kɛ kpaanyɔ ɔ mi ɔ, e tsɔ e womi ngmalɔ Shafan, Meshulam bi Azalia binyumu ɔ Yawɛ we ɔ; nɛ e de lɛ ke,

4 “Yaa osɔfo nɔkɔtɔma pe kulaa Hilkia ngɔ, nɛ e bu sika nɛ osɔfo ɔmɛ nɛ tsuɔ ní ngɛ Yawɛ we ɔ agbo ɔ nya a bua nya ngɛ ma a dɛ ɔ he akɔtaa ha mo.

5 De lɛ ke e ngɔ sika a kɛ ha ní tsuli ɔmɛ nɛ hyɛɛ Yawɛ we ɔ nɔ ɔ, konɛ mɛ hu a kɛ ha ní tsuli ɔmɛ nɛ ngɛ Yawɛ we ɔ dlae ɔ;

6 mɛ ji tso he ní tsuli ɔmɛ, kɛ tsu mali ɔmɛ. A ngɔ sika nɛ ɔ eko kɛ he tso kɛ tɛ nɛ a kpɛ́, nɛ a kɛ dla Yawɛ we ɔ.

7 ⓤ Ni nɛmɛ nɛ a tu sika a ngɔ wo a dɛ mi ɔ, a kɛ mɛ ko pee akɔtaa; ejakaa a yeɔ anɔkuale.”

8 Benɛ matsɛ pɛdiyo Shafan ngɔ matsɛ sɛ gbi ɔ ya ha Hilkia a, Hilkia de lɛ ke, “I na mlaa womi ɔ ngɛ Yawɛ we ɔ.” Hilkia ngɔ womi ɔ kɛ ha Shafan nɛ e kane.

9 Kɛkɛ nɛ Shafan, matsɛ pɛdiyo ɔ ho nɛ e ya bɔ Matsɛ Yosia amaniɛ ke, “O tsɔli ɔmɛ ya muɔ sika nɛ a na ngɛ we ɔ, nɛ a tu ngɔ wo ní tsuli ɔmɛ nɛ ngɛ Yawɛ we ɔ nɔ hyɛe ɔ a dɛ mi.”

10 Shafan ya nɔ nɛ e de matsɛ ɔ ke, “Osɔfo Hilkia kɛ womi nɛ ɔ ha mi.” Nɛ Shafan kane womi ɔ kɛ ha matsɛ ɔ.

11 Benɛ Matsɛ Yosia nu mlaa womi ɔ mi munyuhi nɛ a ngɛ kanee ɔ, e kɛ aywilɛho hía e tade ɔmɛ,

12 nɛ e fa osɔfo Hilkia, kɛ Ahikam, Shafan binyumu ɔ, Akbor, Mikaya binyumu ɔ, Shafan, matsɛ pɛdiyo ɔ, kɛ Asaya, matsɛ tsɔlɔ ɔ ke,

13 “Nyɛɛ ya nɛ nyɛ ya bi Yawɛ ga womi ha imi, kɛ Yuda ma a tsuo ngɛ kikɛmɛ a womi nɛ ɔ mi munyu ɔmɛ a he. Yawɛ mi mi fu wɔ wawɛɛ nitsɛ, ejakaa wa nɛmɛ ɔmɛ bui womi nɛ ɔ mi munyu ɔmɛ tue; nɛ níhi tsuo nɛ a ngma nɛ kɔɔ wa he ɔ hu a pee we.”

14 Osɔfo Hilkia, Ahikam, Akbor, Shafan, kɛ Asaya pue nɔ kɛ ho Yerusalem ma he ɔ mi ya ya bi ní ngɛ gbalɔyo Hulda ngɔ. (Hulda nɛ ɔ, sɔlemi we ɔ tadehi a nɔ hyɛlɔ Harhas binyumu Tikva hu binyumu Shalum yo ji lɛ.) Benɛ a ya bɔ gbalɔyo ɔ nɔ́ nɛ ba a,

15 e de mɛ ke a kpale kɛ ya matsɛ ɔ ngɔ, nɛ a ngɔ

16 sɛ gbi nɛ ɔ nɛ je Yawɛ ngɔ ɔ ya ha lɛ: “Ma gbla Yerusalem, kɛ ma mi bi ɔmɛ tsuo a tue kaa bɔ nɛ a ngma ngɛ womi nɛ matsɛ ɔ kane ɔ mi ɔ.

17 A kua mi, nɛ a ya sã tsopa kɛ e he via kɛ ha mawu kpahi. A kɛ níhi nɛ a pee nɛ ɔ tsuo wo ye mi mi la wawɛɛ nitsɛ, nɛ e nya be si bae.

18 Yuda matsɛ ɔ nɛ tsɔ nyɛ ke nyɛ ya bi Yawɛ ga womi ha lɛ ɔ lɛɛ bɔ nɛ imi Yawɛ, Israel Mawu ɔ, i ngɛ lɛ dee ji nɛ ɔ nɛ: o nu sane nɛ a ngma ngɛ womi ɔ mi ɔ,

19 nɛ o pia o he, nɛ o ba o he si ha mi. Benɛ o nu bɔ nɛ i to nɛ ma gbla Yerusalem, kɛ ma mi bi ɔmɛ a tue, kɛ bɔ nɛ i to nɛ ma pee ma a ma doku, nɛ a ma tsɛ ma a biɛ kɛ gbiɛ nɔ ɔ, o kɛ aywilɛho hía o tade ɔmɛ, nɛ o fo ya. Kue nɛ o fa ha mi ɔ, i nu.

20 Lɔ ɔ he ɔ, tue gblami nɛ i kɛ maa ba Yerusalem nɔ ɔ, moo lɛɛ o be nae kɛ o hɛngmɛ; ma ha nɛ o ma gbo, nɛ a maa pu mo ngɛ he jɔmi mi loko tue gblami nɛ ɔ maa ba.” Tsɔli ɔmɛ kpale a se, nɛ a kɛ sɛ gbi nɛ ɔ ya ha Matsɛ Yosia.