Matsɛmɛ II, 20

Matsɛ Hezekia ba nu hiɔ

(<x>290 38:1-8</x>, <x>290 38:21-22</x>; <x>140 32:24-26</x>)

1 Jamɛ a be ɔ mi ɔ, Hezekia ba nu hiɔ, nɛ e miɔ nɛ e ma gbo. Kɛkɛ nɛ gbalɔ Yesaya, Amoz binyumu ɔ ya nɛ e ya de lɛ ke, “Bɔ nɛ Yawɛ de ji nɛ ɔ nɛ: ‘Moo to o níhi blɔ nya ngɛ o we ɔ, ejakaa o yi be wami nae; o ma gbo.’ ”

2 Hezekia plɛ e hɛ mi ngɔ wo gbogbo nɛ e fa kue ha Yawɛ nɛ e de ke,

3 “Yawɛ lee, i kpa mo pɛɛ nɛ o kai bɔ nɛ i ba ye je mi ngɛ o hɛ mi, bɔ nɛ i ye mo anɔkuale, bɔ nɛ i sɔmɔ mo kɛ ye tsui tsuo, kɛ bɔ nɛ i pee o suɔmi nya ní.” Nɛ Hezekia fo ya kɛ he hiami.

4 Yesaya je matsɛ ɔ he. Se benɛ e na we nɛ e je kpo ngɛ matsɛ we ɔ kpɛti kue ɔ mi ɔ, Yawɛ de lɛ ke

5 e kpale e se nɛ e ya de Hezekia, Yawɛ ma a ganɔ ɔ ke, “Imi Yawɛ, o nɛ̃ David Mawu ɔ, i nu o kue fami ɔ, nɛ i na o hɛ mi vo nyu ɔ. Hyɛ, ma tsa mo, nɛ hiɛmɛ nɛ ɔ ligbi etɛ ɔ, o maa nyɛɛ kɛ ya Yawɛ we ɔ.

6 Ma ngɔ jeha nyɔngma kɛ enuɔ kɛ piɛ o wami ligbi ɔmɛ a he ha mo. Ma je o kɛ ma nɛ ɔ kɛ je Asiria matsɛ ɔ dɛ mi. Jehanɛ, ngɛ ye biɛ ɔ he, kɛ si nɛ i wo ye tsɔlɔ David he je ɔ, ma bu ma nɛ ɔ he.”

7 Enɛ ɔ se ɔ, Yesaya de matsɛ tsɔli ɔmɛ ke, “Nyɛɛ wɛɛ ngmɔkɔ, nɛ nyɛɛ ngɔ kɛ ya to e tslɔ ɔ nɔ kɛkɛ e ma na he wami.”

8 Hezekia bi Yesaya ke, “Mɛni okadi ma kɛ na kaa Yawɛ ma tsa mi niinɛ, nɛ hiɛmɛ nɛ ɔ ligbi etɛ ɔ ma nyɛɛ kɛ ya Yawɛ we ɔ?”

9 Yesaya he nɔ ke, “Yawɛ ma ha mo okadi nɛ e kɛ tsɔɔ kaa si nɛ e wo mo ɔ, e maa ye nɔ. Anɛ o suɔ kaa nini ɔ nɛ ngɛ pu ngmlɛ ɔ nɔ ɔ nɛ ya e hɛ mi nane hiami nyɔngma, aloo e ba se nane hiami nyɔngma lo?”

10 Hezekia he nɔ ke, “E wɛ kulaa kaa o ma ha nɛ nini ɔ nɛ ya e hɛ mi nane hiami nyɔngma; ha nɛ e ba se nane hiami nyɔngma.”

11 Gbalɔ Yesaya fa kue ha Yawɛ, nɛ Yawɛ ha nɛ nini ɔ nɛ ngɛ pu ngmlɛ ɔ nɛ Matsɛ Ahab pee ɔ nɔ ɔ kpale kɛ ba se nane hiami nyɔngma.

Tsɔli nɛ je Babilonia

(<x>290 39:1-8</x>)

12 Jamɛ a be ɔ mi nɔuu ɔ, Babilonia matsɛ, Merodak Baladan, Baladan binyumu ɔ nu kaa Hezekia be he wami. Lɔ ɔ he ɔ, e ngma womi ngɔ piɛ nike ní he nɛ e tsɔ ke a ngɔ ya ha lɛ.

13 Hezekia he tsɔli ɔmɛ atuu, nɛ e tsɔɔ mɛ níhi tsuo nɛ a he jua wa ngɛ e nito he ɔmɛ, sika hiɔ, sika tsu, tsopa kɛ e he via, nu nɛ he jua wa, kɛ e ta hwumi níhi a tsu ɔ. Nɔ́ ko be e we ɔ mi, aloo e nɔ yemi he ɔ tsuo nɛ e tsɔɔ we mɛ.

14 Kɛkɛ nɛ gbalɔ Yesaya ba Matsɛ Hezekia ngɔ nɛ e ba bi lɛ ke, “Nyumu ɔmɛ nɛ ba o ngɔ ɔ, jije a je, nɛ mɛni a ba de mo?” Hezekia he nɔ ke, “A je Babilonia zugba a nɔ ngɛ tsitsaa lokoo.”

15 Yesaya bi lɛ ekohu ke, “Mɛni a ba na ngɛ o we ɔ mi?” Hezekia he nɔ ke, “A ba na ye we ɔ mi nɔ́ tsuaa nɔ́; nɔ́ ko be ye nito he ɔmɛ nɛ i tsɔɔ we mɛ.”

16 Jehanɛ, Yesaya de Hezekia ke, “Yawɛ ke,

17 ⓞ be ma nɛ a ma ba muɔ o we ɔ mi nɔ́ tsuaa nɔ́, kɛ níhi tsuo nɛ o nɛmɛ bua nya ngɔ to kɛ ba si mwɔnɛ ligbi nɛ ɔ kɛ ho Babilonia ya; a be nɔ́ ko nɔ́ ko sie. Yawɛ lɛ de.

18 ⓟ A maa nuu mo nitsɛ o bimɛ ɔmɛ ekomɛ po kɛ ya Babilonia; a maa puɛ mɛ, nɛ a ma sɔmɔ ngɛ Babilonia matsɛ ɔ we ɔ mi. Yawɛ lɛ de.”

19 Se Matsɛ Hezekia susu kaa munyu nɛ ɔ tsɔɔ kaa he jɔmi kɛ tue mi jɔmi maa ba ngɛ lɛɛ e yi nɔ. Lɔ ɔ he ɔ, e de Yesaya ke, “Yawɛ sɛ gbi ɔ nɛ o ngɔ ba ha mi ɔ hi.”

Hezekia matsɛ yemi ɔ nyagbe

(<x>140 32:32-33</x>)

20 Hezekia he sane kpahi, kã nɛ e pee, kɛ taku nɛ e tsua, kɛ e he nyu dɔ nɛ e gba nɛ e kɛ tsɛ nyu kɛ ba ma a mi ɔ, a ngma ngɛ Yuda Matsɛmɛ ɔmɛ a Yi nɔ Sanehi womi ɔ mi.

21 Hezekia ba gbo, nɛ e binyumu Manase ba ye matsɛ ngɛ e se.