Matsɛmɛ I, 3

Salomo bi nile

(<x>140 1:3-12</x>)

1 Salomo ya to Egipt matsɛ ɔ ngatsɛ. E ngɔ Farao ɔ biyo, nɛ e kɛ lɛ ba hi David ma a mi kɛ ya si be nɛ e ma matsɛ we ɔ, kɛ Yawɛ we ɔ gbe nya, nɛ́ e fia gbogbo ngɔ wo Yerusalem he.

2 Jamɛ a be ɔ, a na we nɛ a ma we ha Yawɛ lolo; lɔ ɔ he ɔ, ma a ya nɔ nɛ a sã bɔ ngɛ wɔ piɛ ɔmɛ a mi.

3 Salomo suɔ Yawɛ, nɛ e ye e tsɛ David mlaa amɛ a nɔ; se e gbe lohwe, nɛ e sã tsopa kɛ e he via ngɛ wɔ piɛ ɔmɛ a mi.

4 Ligbi ko ɔ, Salomo ya Gibeon, nɛ́ e ya sã bɔ. Gibeon ji he nɛ wɔ piɛ nguaa a ngɛ; nɛ bɔ sami la tɛ ɔ nɛ ngɛ lejɛ ɔ, e nɔ Salomo sã sami bɔ akpe abɔ ngɛ ba be.

5 Jamɛ a nyɔ ɔ mi ɔ, Yawɛ je e he kpo ngɔ tsɔɔ Salomo ngɛ nlami mi, nɛ e bi lɛ ke, “Mɛni o suɔ nɛ ma ha mo?”

6 Salomo he nɔ ke, “O na tsaatsɛ David, o tsɔlɔ ɔ mɔbɔ babauu; ejakaa e ye mo anɔkuale, nɛ e pee nɔ́ nɛ da, nɛ e kɛ mo hi si saminya kɛ tsui mi faa. O mɔbɔ nami nɛ se pui nɛ ɔ tsa nɔ kɛ ba si o ha lɛ binyumu nɛ ba ngɛ tsɛ yee ngɛ e se mwɔnɛ nɛ ɔ.

7 Yawɛ ye Mawu lee, o ha nɛ i ba ngɛ tsɛ yee ngɛ tsaatsɛ David se, be mi nɛ jokuɛ bɔbɔyoo kɛkɛ ji mi, nɛ́ i li nɔ́ ko nɔ́ ko.

8 Ne mi ngɛ nimli nɛ o je blɔ hla mɛ kɛ pee mo nitsɛ o ma, nimli kpekpemi nɛ nɔ ko be nyɛe maa kane mɛɔ a kpɛti.

9 Lɔ ɔ he ɔ, i kpa mo pɛɛ, ha mi nile nɛ ma kɛ ye o ma a nɔ ngɛ dami sane yemi mi; nɛ ma le slɔɔto nɛ ngɛ nɔ́ nɛ da, kɛ nɔ́ nɛ dɛ a kpɛti. Ke pi ja a, lɛɛ kɛ ma pee kɛ ye o ma kpekpemi nɛ ɔmɛ a nɔ kɛɛ?”

10 Nɔ́ nɛ Salomo bi nɛ ɔ sa Yawɛ hɛ mi.

11 Lɔ ɔ he ɔ, Mawu de lɛ ke, “Akɛnɛ o bi nile nɛ o kɛ ye dami sane, se o bi we ke o wami se nɛ kɛ, aloo o ma na ní, aloo a gbe o he nyɛli ha mo he je ɔ,

12 nɔ́ nɛ o bi ɔ, ma pee ha mo. Ma ha mo nile, kɛ nɔ́ sisi numi babauu bɔ nɛ nɔ ko hí si hyɛ nɛ e kɛ mo sɔ, nɛ o se hu nɔ ko nɔ ko ba be nae nɛ e kɛ mo maa sɔ.

13 Jehanɛ, nɔ́ nɛ o bi we tete hu ma ha mo; o wami ligbi ɔmɛ tsuo ɔ, ma ha o ma na ní, nɛ o hɛ mi maa ba nyami bɔ nɛ matsɛmɛ ɔmɛ a ti nɔ ko nɔ ko kɛ mo be sɔe.

14 Nɛ ke o maa bu mi tue, nɛ o maa ye ye mlaa amɛ a nɔ kaa bɔ nɛ o tsɛ David pee ɔ, ma ha o wami se maa kɛ.”

15 Salomo hɛ tsɛ, nɛ e na kaa nlami lɛ e nla. E ya Yerusalem, nɛ e ya da si ngɛ Yawɛ somi daka a hɛ mi, nɛ e sã sami bɔhi, kɛ tue mi jɔmi bɔhi. Lɔ ɔ se ɔ, e ngmɛ e tsɔli ɔmɛ tsuo okplɔɔ.

Salomo kojo sane ko nɛ he wa

16 Ligbi ko ɔ, yi ajuamahi enyɔ ba Matsɛ Salomo ngɔ kɛ sane ko.

17 Nɔ kake de lɛ ke, “Nɛnɛ, i kɛ yo nɛ ɔ tsuo ngɛ we kake mi; nɛ i ba fɔ binyumu ngɛ we ɔ mi ngɛ e hɛ mi.

18 Nɛ́ i fɔ se ɔ, ligbi etɛne ɔ, yo nɛ ɔ hu ba fɔ binyumu. Wɔ ni enyɔ nɛ ɔmɛ pɛ lɛ wa ngɛ we ɔ mi lejɛ ɔ; nɔ kpa ko piɛ we wa he.

19 Ligbi ko nyɔ mi ɔ, yo nɛ ɔ hwɔ e binyumu ɔ nɔ, nɛ jokuɛ ɔ gbo.

20 Nyɔ mi kɔ̃kɔ̃ɔ̃kɔ̃ benɛ i hwɔ mahe ɔ, yo nɛ ɔ te si nɛ e ba wo ye binyumuyo ngɛ ye kasa nya, nɛ e kɛ lɛ ya hɔ e mi si; nɛ e wo lɛɛ e binyumuyo ɔ nɛ gbo ɔ kɛ ba hɔ ye mi si.

21 Mɔtu benɛ i te si nɛ ma ha ye bi ɔ nyɔ ɔ, i na kaa e gbo. Se benɛ i hyɛ lɛ saminya a, i na kaa pi ye bi ɔ.”

22 Se yo kaketsɛ ɔ de ke, “Dɛbi! Ye bi ji nɔ nɛ hɛ ngɛ ɔ nɛ; o bi ji nɔ nɛ gbo ɔ nɛ!” Nɔ kake ɔ hu de ke, “Dɛbi! O bi ji nɔ nɛ gbo ɔ, nɛ ye bi ji nɔ nɛ hɛ ngɛ ɔ nɛ!” Bɔ nɛ a hua sane ɔ he kɛ ya kɛ ba ngɛ matsɛ ɔ hɛ mi ji nɛ ɔ nɛ.

23 Kɛkɛ nɛ Matsɛ Salomo de ke, “Nɔ kake ke, ‘Ye bi ji nɔ nɛ hɛ ngɛ ɔ, nɛ moo o bi ji nɔ nɛ gbo ɔ nɛ;’ nɛ nɔ kake hu ke, ‘Dɛbi, mo mohu o bi ji nɔ nɛ gbo ɔ, nɛ ye nɔ́ ji nɔ nɛ hɛ ngɛ ɔ nɛ.’ ”

24 Matsɛ ɔ ya nɔ nɛ e de ke, “Saminya, nyɛ ha mi klaate!” Benɛ a kɛ klaate ɔ ba a,

25 e de ke, “Nyɛɛ dla bi nɛ hɛ ngɛ ɔ mi enyɔ, nɛ nyɛɛ ngɔ fa ngɔ ha nɔ kake, nɛ nyɛɛ ngɔ fa hu ngɔ ha nɔ kake.”

26 Kɛkɛ nɛ nɔ tutuutu nɛ ji bi nɛ hɛ ngɛ ɔ nyɛ ɔ tsui mi sã lɛ ngɛ e bi ɔ he, nɛ e de matsɛ ɔ ke, “Nɛnɛ, i kpa mo pɛɛ, koo gbe jokuɛ ɔ. Ngɔɔ lɛ ngɔ ha yo ɔ kɛkɛ.” Se yo kaketsɛ ɔ de ke, “Dɛbi! E be ye nɔ́ pee, nɛ e be mo hu o nɔ́ pee; a dla e mi enyɔ.”

27 Jehanɛ Salomo de ke, “Koo gbe jokuɛ ɔ! Ngɔɔ lɛ kɛ ha kekleekle yo ɔ; ejakaa lɛ ji bi ɔ nyɛ nitsɛnitsɛ.”

28 Benɛ Israel ma a tsuo nu bɔ nɛ Matsɛ Salomo buá sane ɔ he ha a, a bu lɛ wawɛɛ nitsɛ; ejakaa a yɔse kaa Mawu ha lɛ nile nɛ e kɛ kojo ngɛ dami sane yemi nya.