Matsɛmɛ I, 21

Nabot wain ngmɔ ɔ

1 Nyumu ko nɛ a tsɛɛ lɛ Nabot ngɛ wai ngmɔ ko ngɛ Matsɛ Ahab we ɔ kasa nya haa ngɛ Yezreel.

2 Ligbi ko ɔ, Ahab de lɛ ke, “O wai ngmɔ ɔ ngɛ ye we ɔ kasa nya haa. Ngɔɔ kɛ ha mi nɛ ma kɛ pee pui ngmɔ. I kɛ wai ngmɔ kpa nɛ hi pe o nɔ́ ɔ ma tsake ha mo; aloo ke o suɔ ɔ, ma wo mo e he hiɔ bɔ nɛ sa.”

3 Se Nabot de Ahab ke, “Yawɛ ngmɛ́ blɔ kaa ma ngɔ ye nɛmɛ a gbosi ní ɔ ngɔ ha mo.”

4 Ahab je kɛ ho we mi ya kɛ mi mi la, kɛ aywilɛho; ejakaa Nabot de lɛ ke e nɛmɛ a gbosi ní ɔ, e be ngɔe kɛ ha lɛ. E ho ya hwɔ si ngɛ e sa nɔ, nɛ e plɛ e hɛ mi ngɔ kpee gbogbo, nɛ e kua ní yemi.

5 E yo Yezebel ba e ngɔ ba bi lɛ ke, “Mɛni he je o mi mi fu, nɛaywilɛho nu mo kikɛ nɛ ɔ? Mɛni he je o sume nɛ o maa ye ní ɔ?”

6 Ahab he nɔ ke, “Munyu nɛ Yezreel no, Nabot kɛ mi tu ɔ he je. I de lɛ ke e ngɔ e wai ngmɔ ɔ ngɔ ha mi nɛ ma wo lɛ hiɔ, aloo ke e suɔ ɔ, ma ngɔ wai ngmɔ kpa ngɔ tsake ha lɛ; se e de mi ke e kɛ e wai ngmɔ ɔ be mi hae.”

7 Ahab yo Yezebel bi lɛ ke, “Mo ji Israel matsɛ ɔ, aloo pi mo?” E ya nɔ de lɛ ke, “Tee si nɛ o ye ní, nɛ o ná bua jɔmi; ma ngɔ Yezreel no, Nabot wai ngmɔ ɔ kɛ ha mo!”

8 Enɛ ɔ se ɔ, Yezebel ngma womi komɛ ngɛ Ahab biɛ mi, nɛ e ngɔ Ahab womi nya sɔumi nɔ́ ɔ kɛ sɔu a nya, nɛ e kɛ womi ɔmɛ mane Ahab tsɔli, kɛ ma nimeli nɛ ngɛ Yezreel ɔ.

9 E ngma ngɛ womi ɔ mi ke, “Nyɛɛ fiɛ nɛ a ha hwɔ ligbi mluku, nɛ a bua ma a nya, nɛ a ha Nabot blɔ he nguaa ko.

10 Nyɛ ha yaka nimli enyɔ nɛ a da e hɛ mi paa nɛ a ye odase ngɔ si lɛ ke e jɛ Mawu, kɛ matsɛ ɔ. Lɔ ɔ se ɔ, nyɛɛ ngɔ lɛ kɛ je ma a mi, nɛ nyɛ ya fia lɛ tɛ nɛ nyɛɛ gbe.”

11 Tsɔli ɔmɛ, kɛ Yezreel ma nimeli ɔmɛ pee kaa bɔ nɛ Yezebel fa mɛ ɔ. Kaa bɔ nɛ a ngma ngɛ womi ɔmɛ nɛ a ngɔ kɛ mane mɛ ɔ a mi ɔ,

12 a fiɛ ke a ha hwɔ ligbi mluku, nɛ a bua ma a nya, nɛ a ha Nabot blɔ he nguaa ko.

13 Yaka nimli enyɔ ɔmɛ ba nɛ a ba po Nabot nya ngɛ ma a hɛ mi ke e jɛ Mawu, kɛ matsɛ ɔ. Lɔ ɔ he ɔ, a ngɔ lɛ kɛ je ma a mi, nɛ a ya fia lɛ tɛ nɛ a gbe.

14 Nɛ a tsɔ ya de Yezebel ke, “A gbe Nabot.”

15 Benɛ Yezebel nu kaa Nabot gbo ɔ, e de Ahab ke, “Nabot gbo, lɔ ɔ he ɔ, tee si nɛ o ya ngɔ e wai ngmɔ ɔ nɛ e kua juami ha mo ɔ.”

16 Amlɔ nɔuu ɔ, Ahab ho nɛ e ya ngɔ wai ngmɔ ɔ.

17 Kɛkɛ nɛ Yawɛ de gbalɔ Eliya nɛ je Tishbe ɔ ke,

18 “Tee si nɛ o ya Matsɛ Ahab ngɔ ngɛ Samaria. O maa na lɛ ngɛ Nabot wai ngmɔ ɔ mi; e ho lejɛ ɔ ya, konɛ e ya ngɔ ngmɔ ɔ.

19 ⓠ De lɛ ke imi Yawɛ, i ngɛ lɛ bie ke, ‘Nɛ o gbe nyumu ɔ, o ma pa ngɔ e weto ní ɔ kɛ pee o nɔ lo?’ De lɛ ke bɔ nɛ i de ji nɛ ɔ nɛ: ‘He nɛ gbe ɔmɛ lɔ Nabot muɔ ngɛ ɔ, lejɛ ɔ nɔuu a ma lɔ mo hu o muɔ ngɛ!’ ”

20 Benɛ Ahab na Eliya a, e bi lɛ ke, “Ye he nyɛlɔ, pe o nuu mi nɛ ɔ?” Eliya he nɔ ke, “Ee, i nuu mo. O ngɔ o he ngɔ ha yayami peemi, nɛ o pee nɔ́ nɛ dɛ ngɛ Yawɛ hɛ mi.

21 Lɔ ɔ he ɔ, Yawɛ ngɛ mo dee ke, ‘I kɛ haomi maa ba o nɔ. Ma kpata o hɛ mi, nɛ ma gbe nyumu tsuaa nyumu ngɛ o we ɔ mi, nyɔguɛ jio, odehe jio.

22 Ma pee o we ɔ kaa bɔ nɛ i pee Nebat binyumu Yeroboam, kɛ Abiya binyumu Baasha a we ɔmɛ ɔ, ejakaa o wo ye mi mi la kaa o ha Israel ya pee yayami.’

23 ⓡ Jehanɛ Yezebel hu, bɔ nɛ Yawɛ de ngɛ e he ji nɛ ɔ nɛ: ‘Gbehi maa ye Yezebel ngɛ Yezreel ma a mi.’

24 Ke o he nɔ ko gbo ngɛ ma a mi ɔ, gbehi maa ye lɛ; nɛ ke o he nɔ ko gbo ngɛ nga a nɔ ɔ, lohwe pɛlitsɛmɛ maa ye lɛ.”

25 (Nɔ ko nɔ ko be nɛ ngɔ e he tsuo ngɔ ha yayami peemi ngɛ Yawɛ hɛ mi kaa Ahab, ejakaa e yo Yezebel ji nɔ nɛ tsitsɛɛ e kuɛ se mi.

26 E pee ní hiemi níhi babauu; e ja amagahi kaa bɔ nɛ Amor bi ɔmɛ nɛ Yawɛ fie kɛ je Israel bi ɔmɛ a blɔ mi ɔ pee ɔ pɛpɛɛpɛ.)

27 Benɛ Ahab nu munyu nɛ ɔmɛ ɔ, e hía e tade ɔmɛ, nɛ e bu kpekpe ya bo. E ha hwɔ, nɛ e kɛ kpekpe ya bo ɔ hwɔɔ si; nɛ ke e ngɛ nyɛɛe ɔ, e peeɔ kaa nɔ ko nɛ e nini je e nɔ.

28 Yawɛ de gbalɔ Eliya ke,

29 “O na bɔ nɛ Ahab ba e he si ha mi ɔ? Akɛnɛ e pee nɔ́ nɛ ɔ he je ɔ, i be hae nɛ haomi ɔ nɛ ba e nɔ ngɛ e wami be mi; e binyumu ɔ yi nɔ nɛ ma ngɔ haomi kɛ ba Ahab we ɔ nɔ!”