David manye la
(<x>230 18:1</x>)
1 Benɛ Yawɛ je David kɛ je Saul kɛ e he nyɛli ɔmɛ tsuo a dɛ mi ɔ, David la la nɛ ɔ kɛ ha Yawɛ:
2 Yawɛ ji ye tɛ sa nɛ baa ye yi.
3 Ye Mawu ɔ ji nɔ nɛ baa ye yi; e ngɔ nɛ i saa we ngɛ. Ye Mawu ɔ ji ye tsɛ̃i, ye wesa he, kɛ ye mɔ; lɛ nɛ e heɔ ye yi wami.
4 Ma fa kue ha Yawɛ; e ma kpɔ mi ngɛ ye he nyɛli a dɛ mi. A je Yawɛ yi.
5 Gbenɔ oslɔke ɔmɛ bɔle mi kɛ kpe; pa yayamihi hia kɛ wo mi.
6 Gbenɔ oslaa amɛ bɔle mi kɛ kpe, nɛ yɔkɔ hu tsɔ̃ mi klama.
7 Benɛ e fi mi ɔ, i fa kue ha Yawɛ; ee, i tsɛ ye Mawu ɔ. E nu ye gbi kɛ je e sɔlemi we ɔ; nɛ e bu ye kue fami ɔ tue.
8 Kɛkɛ nɛ zugba a mimiɛ nɛ e hoso; hiɔwe sisi tomi ɔmɛ hɛ a he, nɛ a mimiɛ; ejakaa Mawu mi mi fu!
9 La su ku je kpo kɛ je e gugwɔ mi; la nɛ ngɛ tsoe je e nya mi, nɛ e sã níhi.
10 E gba hiɔwe mi enyɔ; nɛ e nyɛɛ bɔku kpii ko nɔ kɛ ba zugba.
11 E hi kerub nɔ kɛ fli kɛ je; e hi kɔɔhiɔ pɛlihi a nɔ kɛ te.
12 E ngɔ diblii ngɔ ha e he; bɔku nɛ nyu hyi lɛ tɔ bɔle lɛ.
13 La nɛ pã kɛ bɔle lɛ ɔ ha je ɔ mi tsɔ heii.
14 Kɛkɛ nɛ Yawɛ si si ngɛ hiɔwe nɛ Hiɔwe No ɔ wo gbi.
15 E tsɛ̃ e kɛ̃ɛ̃ ɔmɛ, nɛ he nyɛli ɔmɛ gbɛ fĩa; oslabai pã la, nɛ a tu fo.
16 Benɛ Yawɛ mi mi fu nɛ e kuɛ wo e he nyɛli ɔmɛ ɔ, wo nyu dɔ ɔmɛ, kɛ je ɔ sisi tomi ɔmɛ je kpo.
17 Yawɛ juale e nine kɛ je hiɔwe, nɛ e pɛtɛ ye he; e gbla mi kɛ je pa nɛ mi kuɔ ɔ mi.
18 E je mi kɛ je ye he nyɛli ɔmɛ, kɛ ni nɛmɛ nɛ nyɛɔ mi ɔ a dɛ mi; ejakaa a he wa tsɔ pe mi.
19 Benɛ i ngɛ amanehlu mi ɔ, a tua mi; se Yawɛ he ye yi wami.
20 E je mi kɛ je amanehlu mi. E he ye yi wami, ejakaa e suɔ mi.
21 Ní kpakpahi nɛ i peeɔ ɔ, Yawɛ woɔ mi a he hiɔ; e gbaa mi, ejakaa i pee we nɔ ko yayami.
22 I ye Yawɛ mlaa amɛ a nɔ; i ji ye Mawu ɔ se.
23 I le e mlaa amɛ tsuo kulaa; i ye mɛ tsuo pɛpɛɛpɛ a nɔ.
24 E le kaa i da kɛ pi si; e le kaa i pee we yayami ko.
25 Yawɛ gbaa mi; ejakaa e le kaa i peeɔ nɔ́ nɛ da; ejakaa e le kaa yayami ko be ye he.
26 Nihi nɛ yeɔ mo anɔkuale ɔ, mo hu o yeɔ mɛ anɔkuale; ni nɛmɛ nɛ da a, o naa mɛ mɔbɔ.
27 Nihi nɛ a he tsɔ ɔ, o tsɔɔ mɛ kaa o he tsɔ; se ni nɛmɛ nɛ a yi mi wa lɛɛ o kɛ mɛ toɔ ní.
28 Nihi nɛ baa a he si ɔ, o heɔ a yi wami. Ni nɛmɛ nɛ woɔ a he nɔ ɔ, o baa mɛ si.
29 Yawɛ, mo ji ye kane. Ye Mawu, mo nɛ o fieɔ diblii ngɛ ye blɔ nɔ.
30 Mo lɛ o haa mi nɔmlɔ tso he wami nɛ i kɛ fiaa ye he nyɛli nɔ́ nɛ i gbee mɛ; kɛ mumi mi he wami nɛ i kɛ yeɔ a nɔ kunimi.
31 Mawu nɛ ɔ lɛɛ e blɔ ɔmɛ tsuo da; e siwo ɔmɛ hu anɔkuale sɔuu! E ngɛ kaa tsɛ̃i kɛ ha nɔ tsuaa nɔ nɛ ba saa we ngɛ e ngɔ.
32 Yawɛ pɛ ji wa Mawu; lɛ pɛ ji wa he bulɔ.
33 Mawu nɛ ɔ ji ye mɔ ngua nɛ baa ye yi. E bli blɔ gbajaa ha mi.
34 ⓞ E haa nɛ i nyɛɛɔ yoku ɔmɛ a nɔ kɛ gɛjɛmi kaa yo nɔ apletsi, nɛ i sane we nɔɛ si.
35 E haa mi ta hwumi he nile, kɛ he wami nɛ ma kɛ tsɛ̃ akɔblee kɛ̃ɛ̃ po.
36 Yawɛ lee, o baa ye yi, nɛ o kpɔ mi; o yemi kɛ buami ɔ pee mi nɔmlɔ agbo.
37 O ha we nɛ ye he nyɛli ɔmɛ a nine nɛ su ye nɔ; i sane we nɔɛ si hyɛ.
38 I nyɛɛ ye he nyɛli ɔmɛ a se, nɛ i kpata a hɛ mi; i kpale we ye se kɛ ya si mɛ tsuo pɛpɛɛpɛ a gbo.
39 I fia mɛ ni, nɛ i gbe mɛ pue si ngɛ ye nane nya, nɛ a nyɛ we nɛ a te si hu.
40 Mo lɛ o ha mi he wami nɛ i kɛ hwu ta; mo lɛ o ha nɛ i ye ye he nyɛli ɔmɛ a nɔ kunimi.
41 Mo lɛ o ha nɛ ye he nyɛli ɔmɛ tu fo kɛ je ye he; ni nɛmɛ nɛ te si ngɔ wo mi ɔ, mo lɛ o ha nɛ i kpata a hɛ mi.
42 A hyɛ yemi kɛ buami blɔ, se kpɔlɔ ko bɛ. A fa kue ha Yawɛ, se e pui a nya mi.
43 I wɛɛ mɛ mɔnyɔmɔnyɔ nɛ a pee kaa tabo zu; i naa a nɔ, nɛ i gbɛ mɛ fĩa kaa gbɛjegbɛ nɔ mɔsɔ.
44 O je mi kɛ je ye ma mi bi atuã tsɔli a dɛ mi; o baa ye yi, nɛ i ba pee je ma amɛ a nyatsɛ. Mahi nɛ i li mɛ po ba plɛ pee ye sɔmɔli.
45 Ma je li maa ba ba kpla si ha mi; ke a nu ye he pɛ, a maa bu mi tue.
46 Sawale maa nu ma je li ɔmɛ; a kɛ he kpokpomi maa hia kɛ maa je a laami he ɔmɛ kɛ ba.
47 Yawɛ hɛ ngɛ! Tɛ sa a nɛ baa ye yi ɔ, a je e yi. Ye Mawu ɔ nɛ he ye yi wami ɔ, a wo e biɛ ta kaa e kle, nɛ e he wa.
48 Lɛ nɛ e ha i ye ye he nyɛli ɔmɛ a nɔ; nɛ e ngɔ ma amɛ ngɔ wo ye sisi,
49 nɛ e kpɔ mi kɛ je ye he nyɛli ɔmɛ a dɛ mi. Yawɛ lee, o ha nɛ i ye ye he nyɛli ɔmɛ a nɔ kunimi; o je mi kɛ je yi mi wali a dɛ mi.
50 ⓟ Yawɛ, enɛ ɔ he je ɔ, ma je o yi ngɛ je ma amɛ a kpɛti; ma la kɛ je o biɛ ɔ yi.
51 Mawu haa nɛ e matsɛ ɔ yeɔ kunimi nguahi. E jeɔ e suɔmi nɛ be nyagbe ɔ kpo kɛ tsɔɔ David, nɔ nɛ a pɔ lɛ nu ɔ, kɛ e nina kɛ yaa neneene.