Samuel II, 20

Sheba tsɔ atuã

1 ⓗ E ba mi kaa yakayaka nɔmlɔ ko nɛ a tsɛɛ lɛ Sheba ba je Gilgal. Benyamin no, Bikri bi ji lɛ. Sheba kpa titimati nɛ e de ke, “Wa be blɔ nya ko ngɛ David ngɔ; Ishai binyumu ɔ, pi e ní yeli ji wɔ. Israel bi, nɔ tsuaa nɔ nɛ ho lɛ nitsɛ e we mi ya!”

2 Nɔ́ nɛ ɔ ha Israel bi ɔmɛ tsuo pɛpɛɛpɛ gbla a he si kɛ je David he nɛ a ya nyɛɛ Bikri bi Sheba se; se Yuda bi ɔmɛ lɛɛ a mɛtɛ a matsɛ ɔ he kpɛii, nɛ a nyɛɛ e se kɛ je Yordan ɔ he kɛ ho Yerusalem ya.

3 ⓘ Benɛ Matsɛ David ba su e we ɔ mi ngɛ Yerusalem ɔ, e kɛ yihi nyɔngma amɛ, nɛ ji e plahi nɛ e si nɛ a hi we ɔ nɔ hyɛe ngɛ e se ɔ ya wo tsu mi. E hyɛɛ a nɔ pɛpɛɛpɛ, se e kɛ mɛ na we nyumu kɛ yo bɔmi. A tsi a nya nɛ a hi si kaa yalɔyihi kɛ ya si a gbenɔ ligbi.

4 Matsɛ ɔ de Amasa ke, “Yaa nɛ o ya bua Yuda bi ɔmɛ tsuo a nya, nɛ hiɛmɛ nɛ ɔ ligbi etɛ ɔ, o kɛ mɛ nɛ ba hiɛ ɔ.”

5 Amasa ho, konɛ e ya kpee Yuda bi ɔmɛ kɛ ba; se e se ya fia si bɔɔ, nɛ e bɛ be nɛ a to lɛ ɔ.

6 Kɛkɛ nɛ matsɛ ɔ de Abishai ke, “Sheba ma ba hao wɔ kulaa pe Absalom tete. Ngɔɔ ye tsɔli ɔmɛ, nɛ́ nyɛɛ nyɛɛ e se; ke pi ja a, e ma ya sɛ mahi nɛ a fia gbogbo ngɔ wo a he ɔ ekomɛ a mi, nɛ e maa hao wɔ.”

7 Lɔ ɔ he ɔ, Abishai kɛ Yoab we bi ɔmɛ, kɛ Keret bi ɔmɛ kɛ Pelet bi ɔmɛ, kɛ ta buli ɔmɛ tsuo hia kɛ je Yerusalem kɛ nyɛɛ Sheba se.

8 Benɛ a su Gibeon tɛ agbo ɔ he ɔ, a kɛ Amasa ya bua. Jamɛ a be ɔ, Yoab lɛɛ e wo ta hwumi tade kɛ mlɛ mi fimi nɔ́ nɛ a fi e klaate nɛ ngɛ kpo mi ɔ kɛ wo he. Benɛ e yaa a, klaate ɔ pɛne nɔ si.

9 Yoab de Amasa ke, “Ye nyɛmi, kɛ o ngɛ kɛɛ?” Yoab kɛ e hiɔ nine nu Amasa kpɛni, konɛ e fiɔ e nya he.

10 Nɛ pee ja a, Amasa nɛ́ klaate ɔ nɛ Yoab hɛɛ ngɛ e muɔ nine mi ɔ; kɛkɛ nɛ Yoab kɛ klaate ɔ gbɔ e muklii mi, nɛ e pã e mi ní kɛ pue zugba. E gbo amlɔ nɔuu nɛ e he hia we kaa Yoab nɛ fia lɛ nɔ́ si enyɔne hu. Lɔ ɔ se ɔ, Yoab kɛ e nyɛmi Abishai pue nɔ kɛ nyɛɛ Bikri bi Sheba a se.

11 Yoab we bi ɔmɛ a ti nɔ kake ho ya da si ngɛ Amasa he, nɛ e de ke, “Nɔ tsuaa nɔ nɛ ngɛ Yoab, kɛ David blɔ fa mi ɔ, e ba nɛ e ba nyɛɛ Yoab se.”

12 Amasa hwɔɔ si ngɛ muɔ ɔ mi ngɛ gbɛjegbɛ ɔ kpɛti tutuutu; nɛ nɔ tsuaa nɔ nɛ ma ba be nɛ na lɛ ɔ, kɛkɛ e da si. Lɔ ɔ he ɔ, benɛ niheyo ɔ na kaa ni ɔmɛ tsuo ba ngɛ si dae ɔ, e gbla Amasa kɛ je gbɛjegbɛ ɔ nɔ kɛ sɛ nga a mi, nɛ e ngɔ bo ngɔ ha e nɔ.

13 Benɛ e je lɛ kɛ je gbɛjegbɛ ɔ nɔ ɔ, ni ɔmɛ tsuo ya piɛ Yoab he nɛ a kɛ nyɛɛ Sheba se.

14 Sheba ya kpa Israel wɛtso ɔmɛ tsuo a nɔ kɛ ya si Abel ngɛ Bet Maaka, nɛ Bikri bi ɔmɛ tsuo bua a he nya nɛ a nyɛɛ e se kɛ ho ma a mi ya.

15 Benɛ Yoab we bi ɔmɛ nu kaa Sheba ngɛ Abel ngɛ Bet Maaka a, a ya sa ma a yi. A kɛ zu fia kpoku wo ma a he kɛ ya su gbogbo nɛ bɔle ma a yi mi tɔɔ, nɛ a bɔni gbogbo ɔ nɔ́ fiami, konɛ a hule lɛ.

16 Kɛkɛ nɛ yo ní lelɔ ko kpa bubuubui kɛ je ma a mi, nɛ e de ke, “Nyɛɛ bu tue! Nyɛɛ bu tue! Nyɛ ya de Yoab ke e ba hiɛ ɔ nɛ i kɛ lɛ waa tu munyu.”

17 Benɛ Yoab ba a, yo ɔ bi lɛ ke, “Mo ji Yoab ɔ lo?” E he nɔ ke, “Ee, imi.” Kɛkɛ nɛ yo ɔ de lɛ ke, “Moo bu imi, o mawayo ɔ munyu ɔmɛ tue.” Nɛ lɛ hu e he nɔ ke, “I ngɛ mo tue bue.”

18 Yo ɔ ya nɔ nɛ e de ke, “A pɔɔ demi blema be ɔ mi ke, ‘Ha nɛ a ya Abel nɛ a ya bi ga womi ngɛ lejɛ ɔ’; ke a pee ja kɛkɛ sane ɔ he jɔ.

19 Wa ma nɛ ɔ, ma nguaa ji lɛ; tue mi jɔmi ngɛ mi, nɛ e ji mahi nɛ yeɔ Israel anɔkuale ɔ a kpɛti kake. Nɛ moo o ngɛ hlae nɛ o kpata ma a hɛ mi! Mɛni he je o ngɛ hlae nɛ o puɛ Yawɛ nitsɛ blɔ fa mi nɔ́ ɔ?”

20 Yoab he nɔ ke, “Kpaoo! Kpaoo! I bɛ nyɛ ma a puɛmi, aloo e hɛ mi kpatami.

21 Tsa pi ja ji sane ɔ. Nyumu ko nɛ a tsɛɛ lɛ ke Sheba, nɛ ji Bikri binyumu ɔ nɛ je Efraim yo ɔ nɔ ɔ, lɛ nɛ e te si ngɔ wo Matsɛ David. Nyɛ je nyumu nɛ ɔ pɛ ngɔ wo ye dɛ mi, kɛkɛ ma kpale ye se!” Yo ɔ de Yoab ke, “Hyɛ, wa maa fɔ e yi kɛ gu gbogbo ɔ nɔ kɛ mane mo.”

22 Kɛkɛ nɛ yo ɔ ho nɛ e ya wo ma mi bi ɔmɛ ga; nɛ a po Sheba yi nɛ a fɔ ngɔ mane Yoab. Yoab kpa titimati, nɛ e we bi ɔmɛ gbɛ kɛ je ma a he; nɛ nɔ tsuaa nɔ ho e ma mi ya. Yoab kpale kɛ ba matsɛ ɔ ngɔ ngɛ Yerusalem.

David ma ní tsuli

23 Yoab ji Israel tatsɛ nɔkɔtɔma; Yehoyada bi Benaya ji Keret bi ɔmɛ, kɛ Pelet bi ɔmɛ a nyatsɛ.

24 Ni nɛmɛ nɛ a nyɛɔ a nɔ nɛ a tsuɔ ní kɛ haa ma nɛ a wui mɛ hiɔ ɔ, mɛɛ a nyatsɛ ji Adoniram.

25 Ahilud bi Yehoshafat ji sanehi ngmalɔ; Sheva ji pɛdiyo; Zadok kɛ Abiatar ji osɔfohi,

26 nɛ Ira, Yair no ɔ, lɛ hu David osɔfo ji lɛ.