Samuel II, 2

A wo David Yuda matsɛ

1 Enɛ ɔ se ɔ, David bi Yawɛ ke, “Ma kpale kɛ ya Yuda ma amɛ eko mi lo?” Yawɛ he nɔ ke, “Ee, moo ya.” David bi lɛ ekohu ke, “Jije ma ya?” Nɛ Yawɛ de lɛ ke, “Yaa Hebron.”

2 ⓒ Lɔ ɔ he ɔ, David kɛ e yi enyɔ ɔmɛ pue nɔ kɛ ho Hebron ya. Mɛ ji Ahinoam nɛ je Yezreel ɔ, kɛ Abigail nɛ ji Karmel no, Nabal yalɔyo ɔ.

3 Jehanɛ hu David ngɔ e we bi ɔmɛ tsuo pɛpɛɛpɛ, kɛ a yihi, kɛ a bimɛ kɛ ho; nɛ a ya hi Hebron ma amɛ a mi.

4 ⓓ Pee se ɔ, Yuda ma nimeli ɔmɛ ba Hebron ba pɔ David nu nɛ a wo lɛ Yuda matsɛ. Benɛ David nu kaa Yabesh Gilead bi ɔmɛ ya pu Saul ɔ,

5 e tsɔ nɛ a kɛ sɛ gbi ya ha mɛ ke, “Yawɛ maa gbaa nyɛ kaa nyɛ je nyɛ suɔmi kpo ngɔ ha Saul, nyɛ nyɔmtsɛ ɔ, nɛ nyɛ pu lɛ!

6 Yawɛ nɛ e na nyɛ mɔbɔ nɛ e je e mi mi himi kpo kɛ tsɔɔ nyɛ! Imi hu ma pee nyɛ kpakpa ngɛ nɔ́ nɛ nyɛ pee nɛ ɔ he.

7 Lɔ ɔ he ɔ, nyɛ wlua nyɛ, nɛ nyɛɛ pee kã. Nyɛ matsɛ Saul ɔ gbo, nɛ Yuda ma a pɔ mi nu nɛ a wo mi a nɔ matsɛ.”

A wo Ishboshet Israel matsɛ

8 Se Saul tatsɛ Abner, Ner binyumu ɔ ku Saul binyumu Ishboshet kɛ tu fo kɛ po Yordan pa a kɛ ho Mahanaim ya.

9 Abner ya wo lɛ matsɛ ngɛ lejɛ ɔ kɛ ha Gilead, Asher, Yezreel, Efraim, Benyamin, kɛ Israel ma amɛ nɛ piɛ ɔ tsuo.

10 Saul bi Ishboshet ye jeha nyingmi eywiɛ benɛ e bɔni Israel nɔ matsɛ yemi, nɛ e ye matsɛ jeha enyɔ. Se Yuda wɛtso ɔ lɛɛ a nyɛɛ David se.

11 Nɛ David ye matsɛ ngɛ Hebron kɛ ha Yuda wɛtso ɔ jeha kpaago kɛ nyɔhiɔ ekpa.

Israel kɛ Yuda ta a

12 Ligbi ko ɔ, Ner bi Abner, kɛ Saul bi Ishboshet tsɔli ɔmɛ hia kɛ je Mahanaim kɛ ho Gibeon ya.

13 Zeruya binyumu Yoab kɛ David tsɔli ɔmɛ hu hia kɛ je kpo nɛ a kɛ mɛ ya kpe ngɛ Gibeon taku ɔ nya. Kuu kake bua a he nya ngɛ taku ɔ hɛ mi, nɛ kuu kake hu bua a he nya ngɛ taku ɔ se.

14 Abner de Yoab ke, “Ha nɛ nihewi ɔmɛ nɛ a te si nɛ a ka a he mi kɛ je wa hɛja.” Yoab he nɔ ke, “Yoo, i kplɛɛ nɔ.”

15 Kɛkɛ nɛ a te si nɛ a kane a he. Saul bi Ishboshet, kɛ Benyamin bi ɔmɛ nɛ a hiɛmi ji nyumuhi nyɔngma kɛ enyɔ ɔ ya da he kake, nɛ a kɛ David tsɔli nyɔngma kɛ enyɔ ɔmɛ ya kpe.

16 Nɔ tsuaa nɔ nu e nyɛmi yi, nɛ e kɛ e klaate ɔ gbɔ e kasa, nɛ mɛ tsuo a nɔ si nɛ a gbo si kake too. Lɔ ɔ he nɛ a wo Gibeon lejɛ ɔ biɛ ke, “Klaate nga nɔ” ɔ nɛ.

Asahel gbenɔ

17 Enɛ ɔ se ɔ, a hwu ta nguaa ko jamɛ a ligbi ɔ, nɛ David kɛ e tsɔli ɔmɛ ye Abner kɛ Israel bi ɔmɛ a nɔ.

18 Zeruya binyumu etɛ ɔmɛ hu ngɛ lejɛ ɔ. Mɛ ji Yoab, Abishai, kɛ Asahel. Asahel nane nya sɔɔ kaa alɔngɔ.

19 Asahel kɛ hɛdɔ tu fo kɛ nyɛɛ Abner se. Benɛ e nyɛɛ e se ɔ tsuo e gba we hiɔ nɔ, loo muɔ nɔ.

20 Kɛkɛ nɛ Abner plɛ kɛ hyɛ e se nɛ e bi ke, “Asahel, mo lo?” Nɛ e he nɔ ke, “Ee, imi.”

21 Abner de lɛ ke, “Jɔɔ ye se nyɛɛmi! Tuu fo ya na nihewi ɔmɛ, nɛ o nu a ti nɔ kake, nɛ o kpɔ e ta yibu ní ɔ ngɛ e dɛ.” Se loloolo ɔ, Asahel nyɛɛ e se.

22 Abner de lɛ ekohu ke, “Kpale ngɛ ye se nɛ o ko ha ma fia mo nɔ́ nɛ ma gbe. Ke i pee ja a, kɛ ma plɛ kɛ hyɛ o nyɛmi Yoab hɛ mi kɛɛ?”

23 Se loloolo ɔ, Asahel kplɛɛ we. Lɔ ɔ he ɔ, Abner kɛ e we akplɔ ɔ se je ɔ gbɔ Asahel muklii mi, nɛ akplɔ ɔ nya ya hia kpo ngɛ Asahel se mi. Asahel nɔ si nɛ e gbo ngɛ lejɛ ɔ nɔuu, nɛ nɔ tsuaa nɔ nɛ ba su he nɛ e fɔɔ si ngɛ ɔ, ba da si dii.

24 Jehanɛ, Yoab kɛ Abishai nyɛɛ Abner se, nɛ benɛ pu maa ho si nɔmi ya a, a ya su Ama yoku ɔ he, ngɛ Giya kasa nya, kɛ yaa Gibeon nga a nɔ.

25 Abner kɛ e we bi ɔmɛ nɛ je Benyamin wɛtso ɔ mi ɔ ya bua a he nya ekohu ngɛ yoku ko yi mi.

26 Abner kpa ngmlaa kɛ tsɛ Yoab nɛ e de lɛ ke, “Anɛ waa ya nɔ waa hi wa he gbee kɛ mwɔɔ lo? Anɛ o li kaa nyagbenyagbe ɔ, wɔ tsuo wa hɛ mi ma kpata lo? Mɛni be o ngɛ mlɛe loko o fa o we bi ɔmɛ nɛ a jɔɔ mɛ nitsɛmɛ a nyɛmimɛ a se nyɛɛmi lo?”

27 Yoab he nɔ ke, “I na Mawu hɛ kalɔ ɔ, jinɛ kaa o tu we munyu po ɔ, kɛ yaa si hwɔɔ mɔtu ɔ, ye we bi ɔmɛ ma kpa nyɛ se nyɛɛmi!”

28 Kɛkɛ nɛ Yoab kpa titimati nɛ e we bi ɔmɛ tsuo jɔɔ Israel bi ɔmɛ a se nyɛɛmi; nɛ ta a se po.

29 Jamɛ a nyɔ ɔ mi ɔ, Abner kɛ e we bi ɔmɛ kpale a se kɛ ya gu Yordan kɔ̃ ɔ mi. A po Yordan pa a, nɛ e nɔ jena a, a nyɛɛ mɔtu ɔ tsuo kɛ ya si a su Mahanaim.

30 Benɛ Yoab jɔɔ Abner se nyɛɛmi ɔ, e bua e we bi ɔmɛ tsuo a nya, nɛ e na kaa David tsɔli ɔmɛ a ti nimli nyɔngma kɛ nɛɛ be a kpɛti kɛ piɛ Asahel he.

31 Se David tsɔli ɔmɛ gbe Abner we bi ɔmɛ nɛ je Benyamin wɛtso ɔ mi ɔ a kpɛti nimli lafa kɛ nyingmi ekpa.

32 Yoab kɛ e we bi ɔmɛ ngɔ Asahel nɛ a ya pu lɛ ngɛ e tsɛ yɔkɔ ɔ mi ngɛ Betlehem. Lɔ ɔ se ɔ, a nyɛɛ nyɔnyɔɔnyɔ, nɛ je ba na mɛ heii ngɛ Hebron.