Mose I, 50

1 Yosef wo ya ngɔ pue e tsɛ ɔ nɔ, nɛ e fiɔ e nya he.

2 E fa e tsɔli nɛ peeɔ tsopa a ke a wo e tsɛ ɔ tsopa konɛ e ko puɛ; nɛ a pee ja.

3 A ngɔ ligbi nyingmi eywiɛ kɛ wo lɛ tsopa kaa bɔ nɛ a pɔɔ peemi ɔ; nɛ Egipt bi ɔmɛ nyɛ ya ha lɛ ligbi nyingmi kpaago.

4 Benɛ a pee ya gbe nya a, Yosef de matsɛ tsɔli ɔmɛ ke, “I kpa nyɛ pɛɛ nɛ nyɛ ya na Farao ɔ ha mi.

5 ⓨ Nyɛ de lɛ ke, benɛ tsaatsɛ miɔ nɛ e ma gbo ɔ, e ha nɛ i ka lɛ kita kaa ke e gbo ɔ, ma ya pu lɛ ngɛ Kanaan zugba a nɔ, ngɛ yɔkɔ ɔ nɛ lɛ nitsɛ e tsua ngɔ fɔ si ɔ mi. Nyɛ de lɛ ke, i kpa lɛ pɛɛ nɛ e ha mi blɔ nɛ ma ya pu tsaatsɛ, nɛ ma kpale kɛ ba.”

6 Matsɛ ɔ he nɔ ke, “Yaa nɛ o ya pu o tsɛ ɔ kaa bɔ nɛ o ka lɛ kita ke o maa pee ɔ.”

7 Kɛkɛ nɛ Yosef ho nɛ e ya pu e tsɛ ɔ. Matsɛ tsɔli ɔmɛ, matsɛ we mi nikɔtɔma amɛ, Egipt ma nimeli ɔmɛ,

8 Yosef we mi bi ɔmɛ, e nyɛmimɛ ɔmɛ, kɛ e tsɛ we mi bi ɔmɛ tsuo pɛpɛɛpɛ kɛ lɛ ho. A bimɛ tsɔwitsɔwi ɔmɛ, kɛ a to ɔmɛ, kɛ a na amɛ pɛ nɛ piɛ ngɛ Goshen zugba a nɔ.

9 Zugba lɛhi, kɛ okpɔngɔhi a nɔ hili hu kɛ lɛ ho. Nihi babauu nitsɛ lɛ ho ɔ nɛ.

10 Benɛ a su ngma mi sami he ɔ ngɛ Atad, ngɛ Yordan pa a beleku je ɔ, a wo yana wawɛɛ ngɛ lejɛ ɔ be saii; nɛ Yosef pee kusumi kɛ nyɛ ya ligbi kpaago.

11 Benɛ Kanaan zugba a nɔ bi ɔmɛ na ni ɔmɛ nɛ a ngɛ ya pee ngɛ ngma mi sami he ɔ ngɛ Atad ɔ, a de ke, “Egipt bi tsa pee we ya mɔbɔmɔbɔ kikɛ nɛ ɔ.” Enɛ ɔ he je ɔ, a wo lejɛ ɔ biɛ ke Abel Egipt.[52] E ngɛ Yordan pa a beleku je.

12 Yakob bimɛ ɔmɛ pee kaa bɔ nɛ e fa mɛ ɔ.

13 ⓩ A ngɔ lɛ kɛ ya Kanaan nɛ a ya pu lɛ ngɛ tɛ puɔ ɔ nɛ ngɛ Makpela zugba a nɔ ɔ mi, ngɛ Mamre kasa nya. Abraham ji nɔ nɛ he zugba nɛ ɔ ngɛ Hit no ɔ nɛ a tsɛɛ lɛ Efron ɔ dɛ, nɛ e kɛ pee gɔ.

14 Benɛ Yosef pu e tsɛ gbe nya a, e kɛ e nyɛmimɛ ɔmɛ, kɛ nihi tsuo nɛ kɛ lɛ ya e tsɛ pumi ɔ kpale kɛ ba Egipt ekohu.

Yosef wo e nyɛmimɛ ɔmɛ bua

15 Benɛ Yakob gbo se ɔ, Yosef nyɛmimɛ ɔmɛ de ke, “Eko piɔ, wa he dɔmi ngɛ Yosef mi kɛ mwɔɔ, nɛ e maa to wɔ yayami tsuo nɛ wa pee lɛ ɔ nane mi.”

16 Enɛ ɔ he je ɔ, a ngɔ sɛ gbi ngɔ mane Yosef ke, “Loko tsaatsɛ gbo ɔ,

17 e ke wa de mo ke, ‘I kpa mo pɛɛ nɛ o kɛ o nyɛmimɛ ɔmɛ a yayami nɛ a pee mo ɔ ngɔ pa mɛ.’ Lɔ ɔ he ɔ, wa kpa mo pɛɛ nɛ o ngɔ wa yayami ɔ ngɔ pa wɔ; ejakaa wɔ hu o tsɛmɛ a Mawu ɔ lɛ wa jaa.” Benɛ a ya bɔ Yosef amaniɛ nɛ ɔ, e wo ya.

18 Jehanɛ, e nyɛmimɛ ɔmɛ nitsɛmɛ ba, nɛ a ba kpla si ngɛ e hɛ mi, nɛ a de lɛ ke, “Wɔ o nyɔguɛ ɔmɛ ji nɛ ɔmɛ nɛ.”

19 Se Yosef de mɛ ke, “Nyɛ ko ye gbeye. Nyɛ susu kaa Mawu ji mi lo?

20 Nyɛɛ lɛɛ nyɛ so kaa nyɛ maa pee mi yayami, se Mawu tsake nyɛ yi mi tomi ɔ kɛ pee nɔ́ kpakpa; bɔ nɛ pee nɛ e kɛ he nihi babauu a yi wami, kaa bɔ nɛ e ba mi mwɔnɛ nɛ ɔ.

21 Lɔ ɔ he ɔ, nyɛ ko ye gbeye. Ma lɛ nyɛ, kɛ nyɛ bimɛ ɔmɛ.” Bɔ nɛ Yosef pee nɛ e kɛ munyu ngɔngɔɛhi wo e nyɛmimɛ ɔmɛ bua ji nɛ ɔ nɛ.

Yosef gbo

22 Yosef kɛ e tsɛ we mi bi ɔmɛ hi Egipt. E ye jeha lafa kɛ nyɔngma benɛ e gbo ɔ.

23 E he bibimɛ kɛ gu Efraim nɔ. Jehanɛ, Manase binyumu Makir hu fɔ bimɛ kɛ wo weku ɔ mi.

24 Yosef de e nyɛmimɛ ɔmɛ ke, “E be kɛe nɛ ma gbo. Se Mawu maa hyɛ nyɛ nɔ kɛ̃, nɛ e ma kpaka nyɛ kɛ je zugba nɛ ɔ nɔ kɛ ya zugba a nɛ e wo Abraham, kɛ Isak, kɛ Yakob he si ɔ nɔ.”

25 ⓐ Kɛkɛ nɛ Yosef ha nɛ e we bi ɔmɛ ka lɛ kita. E de mɛ ke, “Nyɛɛ wo mi si kaa ke Mawu ba kpaka nyɛ kɛ yaa jamɛ a zugba a nɔ ɔ, nyɛ maa ngɔ ye flɔ̃ ɔ kɛ ho.”

26 Yosef gbo ngɛ Egipt benɛ e ye jeha lafa kɛ nyɔngma; nɛ a wo lɛ tsopa, nɛ a kɛ lɛ wo daka mi.