Mose I, 44

Kplu nɛ laa a

1 Jehanɛ, Yosef fa tsɔlɔ ɔ nɛ hyɛɛ e we ɔ nɔ ɔ ke, “Wo nyumu ɔmɛ a kotoku ɔmɛ a mi blɛfo nɛ a hyi tɔtɔɔtɔ, bɔ nɛ a ti nɔ tsuaa nɔ ma nyɛ tloo; nɛ o ngɔ nɔ tsuaa nɔ sika kɛ wo e kotoku ɔ mi.

2 Ngɔɔ ye sika hiɔ kplu ɔ kɛ wo jokuɛyo ɔ kotoku ɔ mi kɛ piɛ sika nɛ e kɛ ba he blɛfo ɔ he.” Tsɔlɔ ɔ pee kaa bɔ nɛ Yosef fa lɛ ɔ.

3 E nɔ jena mɔtu kpla a, a wo nyɛmimɛ ɔmɛ blɔ kɛ ho kɛ a teji ɔmɛ.

4 Benɛ a je ma a mi, nɛ a sui he ko tsitsaa lolo ɔ, Yosef de tsɔlɔ ɔ nɛ hyɛɛ e we ɔ nɔ ɔ ke, “Tee si esɔ, nɛ o nyɛɛ nyumu ɔmɛ a se. Ke o ya na mɛ ɔ, bi mɛ ke, ‘Mɛni he je nyɛɛ kɛ yayami to kpakpa nɛ a pee nyɛ ɔ nane mi ɔ?

5 Mɛni he je nyɛ ju ye nyɔmtsɛ ɔ sika hiɔ kplu ɔ? Kplu pɛ nɛ e kɛ nuu nyu ji lɔ ɔ nɛ, nɛ lɔ ɔ kɛ̃ e kɛ klaa. Nyɛ pee yayami agbo!’ ”

6 Benɛ tsɔlɔ ɔ ya na mɛ ɔ, e bi mɛ munyu nɛ ɔmɛ nɔuu.

7 A he nɔ ke, “Wa nyɔmtsɛ, mɛni he je o kɛ wɔ ngɛ munyu tue kikɛ nɛ ɔ? Wa be nyɛe maa pee nɔ́ ko kaa kikɛ nɛ ɔ kɔkɔɔkɔ.

8 Sika a nɛ wa ya na ngɛ wa kotoku ɔmɛ a mi ɔ pohu wa kpale kɛ je Kanaan zugba a nɔ tɔɔ kɛ ba ha mo. Kɛ maa pee kɛɛ mɔ nɛ wa maa ju sika hiɔ, loo sika tsu ngɛ o nyɔmtsɛ ɔ we ɔ mi?

9 Ke a na nɔ́ nɛ ɔ ngɛ wa ti nɔ ko dɛ mi ɔ, a gbe lɛ, nɛ wɔ ni nɛmɛ nɛ piɛ ɔ, wa maa pee o nyɔguɛhi.”

10 E de mɛ ke, “Saminya! A pee kaa bɔ nɛ nyɛ de ɔ. Se mohu, nɔ nɛ dɛ mi nɛ a maa na kplu ɔ ngɛ ɔ, lɛ pɛ ji nɔ nɛ maa pee ye nyɔguɛ ɔ nɛ; nyɛ ni nɛmɛ nɛ piɛ ɔ, nyɛɛ lɛɛ nyɛ maa ye nyɛ he.”

11 Kɛkɛ nɛ a he sɔ kɛ je kotoku ɔmɛ ngɛ a teji ɔmɛ a nɔ kɛ ma si, nɛ a pɛne nya.

12 Yosef tsɔlɔ ɔ hyɛ kotoku ɔmɛ a mi fitsofitso, kɛ je nɔkɔtɔma a nɔ́ ɔ mi kɛ ya gbe nya ngɛ jokuɛyo ɔ nɔ́ ɔ mi. Nɛ a ya na kplu ɔ ngɛ Benyamin kotoku ɔ mi.

13 Nyɛmimɛ ɔmɛ kɛ aywilɛho hia a he tade ɔmɛ. A ti nɔ tsuaa nɔ wo e teji nɔ ní ekohu, nɛ a kpale a se kɛ ho ma a mi ya.

14 Benɛ Yuda kɛ e nyɛmimɛ ɔmɛ ba Yosef we ɔ mi ɔ, Yosef ngɛ lejɛ ɔ kɛ mwɔɔ. Kɛkɛ nɛ a kpla si, nɛ a kɛ a hɛ mi bu si ngɛ e hɛ mi.

15 Yosef bi mɛ ke, “Mɛni nyɛ pee nɛ ɔ? Anɛ nyɛ li kaa nɔmlɔ kaa imi ɔ, i klaa lo?”

16 Yuda he nɔ ke, “Wa nyɔmtsɛ, mɛni ngɛ wa nya nɛ wa ma de mo? Kɛ wa maa pee kɛ je wa nya kɛɛ? Mawu nitsɛ je wɔ kpo kaa wa tɔ. Lɔ ɔ he ɔ, piɔ lɛɛ o nyɔguɛhi ji wɔ tsuo pɛpɛɛpɛ, se pi nɔ nɛ a na kplu ɔ ngɛ e dɛ mi ɔ kɛkɛ.”

17 Yosef he nɔ ke, “Dɛbi! I be ja pee kɔkɔɔkɔ! Nɔ nɛ a na kplu ɔ ngɛ e dɛ ɔ, lɛ pɛ ji nɔ nɛ maa pee ye nyɔguɛ ɔ nɛ. Nyɛ ni nɛmɛ nɛ piɛ ɔ, nyɛɛ kpale kɛ ho nyɛ tsɛ ngɔ ya fiafiaafia.”

Yuda kpa pɛɛ ha Benyamin

18 Kɛkɛ nɛ Yuda hɛ lɛ kɛ su Yosef he, nɛ e de lɛ ke, “Nyɔmtsɛ, i kpa mo pɛɛ, ha nɛ ma kɛ hiami sane kake nɛ ɔ pɛ fɔ o hɛ mi. O ngɛ kaa Farao ɔ kɛ̃. O mi mi ko fu mi.

19 I kpa mo pɛɛ, o bi wɔ ke, ‘Nyɛ tsɛ ngɛ je mi lo? Nyɛ ngɛ nyɛminyumu kpa ko hu lo?’

20 Wa de mo ke, ‘Wa tsɛ ngɛ je mi se e bwɔ. Wa senɔ nɛ ji wa tsɛ nakutsomibi nɛ e fɔ ngɛ e bwɔmi si hu ngɛ. Lɛ nɔ ɔ e nyɛminyumu ɔ gbo, nɛ lɛ pɛ ji e nyɛbi nɛ piɛ; lɔ ɔ he ɔ, wa tsɛ suɔ lɛ saminya.’

21 O fa wɔ ke waa ngɔ lɛ kɛ ba nɛ o na lɛ kɛ o hɛngmɛ.

22 Wa de mo ke niheyo wayo ɔ be nyɛe maa je e tsɛ ɔ he; ke e pee ja a, e tsɛ ɔ ma gbo.

23 Se o kplɛɛ we. O de wɔ ke, ‘Ke nyɛɛ kɛ nyɛ nyɛmi wayo ɔ bɛ nɛ ma na lɛ ɔ, lɛɛ nyɛ be ye hɛ mi nae.’

24 “Benɛ wa kpale kɛ ho wa tsɛ ɔ ngɔ ya a, wa ya bɔ lɛ nɔ́ nɛ o de wɔ ɔ.

25 Pee se ɔ, e de wɔ ke waa kpale kɛ ba hiɛmɛ nɛ ɔ, nɛ wa ba he niye ní kɛ ba.

26 Wa de lɛ ke, ‘Ja wa nyɛmi wayo ɔ piɛ wa he loko wa maa ya. Ke wa nyɛmi wayo ɔ kɛ wɔ yɛ ɔ, a be wɔ blɔ ngmɛe nɛ waa na nyumu ɔ hɛ mi.’

27 Wa tsɛ de wɔ ke, ‘Nyɛ nitsɛmɛ nyɛ le kaa ye yo Rahel ɔ, binyumuhi enyɔ i kɛ lɛ fɔ.

28 Ligbi ko ɔ, a ti nɔ kake je kpo, nɛ i nɛ lɛ hu kɛ ba si piɔ; daa nɛ ɔ, i susuɔ kaa pu mi lohwehi nɛ a tsɔtslɔɔ e mi.

29 Ke nyɛ ngɔ nɔ nɛ ɔ hu kɛ je ye he, nɛ nɔ́ ko ya pee lɛ ɔ, nyɛ ma ha i kɛ aywilɛho maa ya gbeje; i bwɔ.’ ”

30 Yuda ya nɔ, nɛ e de ke, “Lɔ ɔ he ɔ, ye nyɔmtsɛ, ke i je niheyo wayo nɛ ɔ he, nɛ i kpale kɛ ho tsaatsɛ ngɔ ya, nɛ tsaatsɛ na kaa i kɛ lɛ bɛ ɔ, e ma gbo. Tsaatsɛ kɛ jokuɛyo nɛ ɔ a klaa mi kpe wawɛɛ nitsɛ, nɛ a suɔ a he saminya. Tsaatsɛ bwɔ kotokoto, nɛ aywilɛho nɛ waa kɛ maa ba e nɔ ɔ, maa gbe lɛ.

31

32 Jehanɛ se hu, i ngɔ ye wami kɛ da si ha niheyo wayo ɔ. I ka tsaatsɛ kita, nɛ i de lɛ ke ke i kpale we Benyamin kɛ ba ha we lɛ fiafiaafia a, lɛɛ i yeɔ fɔ ye wami be ɔ tsuo.

33 Enɛ ɔ he je ɔ, ye nyɔmtsɛ, ma hi hiɛmɛ nɛ ɔ kaa o nyɔguɛ ngɛ niheyo wayo ɔ nane mi; ha nɛ e kɛ e nyɛmimɛ ɔmɛ nɛ a kpale kɛ ho.

34 Kɛ ma pee kɛ kpale kɛ ya tsaatsɛ ngɔ kɛɛ, nɛ niheyo wayo ɔ piɛ we ye he kɛ yɛ? Aywilɛho nɛ maa pee tsaatsɛ ɔ, i be nyɛe ma hyɛ.”