Mose I, 26

Isak ya hi Gerar

1 Hwɔ ba zugba a nɔ; slo hwɔ nɛ ba ngɛ Abraham yi nɔ ɔ; nɛ Isak ho Filisti bi ɔmɛ, a Matsɛ Abimelek ngɔ ya ngɛ Gerar.

2 Yawɛ je e he kpo kɛ tsɔɔ Isak, nɛ e de lɛ ke, “Koo ya Egipt, hii si ngɛ zugba a nɛ ma tsɔɔ mo ɔ nɔ.

3 ⓨ Hii si ngɛ hiɛ ɔ; i kɛ mo maa hi si, nɛ ma gbaa mo. Ma ngɔ zugba nɛ ɔ tsuo kɛ ha mo, kɛ o nina; nɛ si nɛ i wo o tsɛ Abraham ɔ, ma ye nɔ.

4 Ma ha o nina maa hiɛ babauu kaa dodoehi ngɛ hiɔwe, nɛ i kɛ zugba nɛ ɔ tsuo ma ha mɛ. O nina nɔ a maa gu kɛ gbaa je ma amɛ tsuo.

5 Ma gbaa mo, ejakaa Abraham bu mi tue, nɛ e ye ye mlaa amɛ, kɛ ye fami ɔmɛ tsuo a nɔ.”

6 Lɔ ɔ he ɔ, Isak hi Gerar.

7 ⓩ Benɛ nyumu ɔmɛ nɛ ngɛ lejɛ ɔ bi lɛ e yo ɔ he sane ɔ, e de mɛ ke e nyɛmiyo ji yo ɔ nɛ. E ye gbeye kaa ke e de ke e yo ji Rebeka a, nyumu ɔmɛ nɛ ngɛ lejɛ ɔ maa gbe lɛ, konɛ a na Rebeka he blɔ; ejakaa Rebeka he ngɛ fɛu saminya.

8 Benɛ Isak hi lejɛ ɔ be saii ɔ, ligbi ko ɔ, Filisti matsɛ, Abimelek ya buu si ngɛ saflɛ tue ngɛ nɔ́ hyɛe. Kɛkɛ nɛ e na Isak nɛ e ngɛ e yo Rebeka he fiɛe.

9 Abimelek tsɔ ya tsɛ Isak kɛ ba, nɛ e bi lɛ ke, “Mamoo o yo ji yo ɔ! Mɛni he je mɔ nɛ o de ke o nyɛmiyo ji lɛ ɔ?” Isak he nɔ ke, “I susu kaa ke i de ke ye yo ji lɛ ɔ, a maa gbe mi.”

10 Abimelek ya nɔ bi lɛ ke, “Mɛni o pee wɔ nɛ ɔ? Kaa ye ma mi bi ɔmɛ a ti nɔ ko kɛ o yo ɔ ya na bɔmi jinɛ tse o kɛ musu ba wa nɔ?”

11 Abimelek wo ma a tsuo mlaa ke, “Nɔ tsuaa nɔ nɛ maa pee nyumu nɛ ɔ, aloo e yo ɔ yayami ko ɔ, a gbe lɛ.”

12 Isak du ní ngɛ jamɛ a zugba a nɔ, nɛ jamɛ a jeha a, e kpa nɔ́ nɛ e du ɔ yi totoe lafa, ejakaa Yawɛ gbaa lɛ.

13 E na ní, nɛ níhi a mi hi ha lɛ hluu kɛ ya si e pee niatsɛ.

14 E ngɛ to, kɛ na, kɛ tsɔli babauu; nɛ nɔ́ nɛ ɔ ha nɛ Filisti bi ɔmɛ a hɛ kɔ̃ e nɔ.

15 Lɔ ɔ he ɔ, vuhi tsuo nɛ e tsɛ Abraham tsɔli ɔmɛ tsua, benɛ Abraham ngɛ je mi ɔ, Filisti bi ɔmɛ tsɛ̃ zu kɛ wo a mi, nɛ a tsi mɛ tsuo pɛpɛɛpɛ.

16 Jehanɛ, Abimelek de Isak ke, “Jee wa zugba a nɔ kɛ ho; o he ba wa tsɔ pe wɔ.”

17 Kɛkɛ nɛ Isak je lejɛ ɔ, nɛ e ya ma e bo tsu ɔmɛ ngɛ Gerar kɔ̃ ɔ mi, nɛ e hi lejɛ ɔ.

18 Vu ɔmɛ nɛ a tsua ngɛ Isak tsɛ Abraham yi nɔ, nɛ Filisti bi ɔmɛ tsi benɛ Abraham gbo se ɔ, Isak kpale tsua ekohu. Isak wo vu ɔmɛ biɛhi nɛ e tsɛ wo mɛ ɔ kɛ̃.

19 Isak nyɔguɛ ɔmɛ tsua vu ko ngɛ Gerar kɔ̃ ɔ mi nɛ a ya na nyu.

20 Se Gerar to hyɛli ɔmɛ, kɛ Isak to hyɛli ɔmɛ pɛ, nɛ a de mɛ ke, “Nyu nɛ ɔ, wa nɔ́.” Enɛ ɔ he je ɔ, Isak wo vu ɔ biɛ ke Esek,[22] ejakaa a kɛ lɛ pɛ ngɛ he.

21 Isak nyɔguɛ ɔmɛ tsua vu kpa, nɛ pɛ ba lɔ ɔ hu he. Lɔ ɔ he ɔ, Isak wo vu ɔ biɛ ke Sitna.[23]

22 Isak hia kɛ je lejɛ ɔ nɛ e ya tsua vu kpa. Lɔ ɔ lɛɛ pɛ ko ti si ngɛ he; lɔ ɔ he ɔ, e wo jamɛ a vu ɔ biɛ ke Rehobot,[24] nɛ e de ke, “Jehanɛ lɛɛ Yawɛ ha wɔ blɔ; wa maa hi zugba nɛ ɔ nɔ, nɛ wa ma plɔke ngɛ hiɛ ɔ.”

23 Isak je lejɛ ɔ kɛ ho Beersheba ya.

24 Jamɛ a nyɔ ɔ mi ɔ, Yawɛ je e he kpo ngɔ tsɔɔ lɛ, nɛ e de lɛ ke, “Imi ji o tsɛ Abraham Mawu ɔ nɛ. Koo ye gbeye, ejakaa i kɛ mo ngɛ. Ma gbaa mo, nɛ ye tsɔlɔ Abraham he je ɔ, ma ha mo nina babauu.”

25 Isak ma bɔ sami la tɛ ngɛ lejɛ ɔ, nɛ e ja Yawɛ. Lɔ ɔ se ɔ, e ma e bo tsu ɔ, nɛ e nyɔguɛ ɔmɛ tsua vu kpa ngɛ lejɛ ɔ.

Isak kɛ Abimelek so

26 ⓐ Ligbi ko ɔ, Abimelek, kɛ e ga wolɔ Ahuzat, kɛ e tatsɛ Fikol je Gerar kɛ ba Isak ngɔ.

27 Isak bi mɛ ke, “Nyɛ nɛ nyɛ nyɛ mi, nɛ nyɛ fie mi kɛ je nyɛ zugba a nɔ ɔ, jehanɛ lɛɛ mɛni nyɛ ma peemi ngɛ ye ngɔ?”

28 A he nɔ ke, “Jehanɛ lɛɛ wa yɔse kaa Yawɛ kɛ mo ngɛ, nɛ wa susu kaa e sa kaa somi ko nɛ hi wa kpɛti. Wa ngɛ hlae nɛ o wo wɔ si

29 kaa o be wɔ yayami ko pee, kaa bɔ nɛ wɔ hu wa pee we mo yayami ko ɔ. Wa na mo mɔbɔ, nɛ benɛ o yaa hu wa wo mo blɔ ngɛ tue mi jɔmi mi. Nɔ́ jemi ko be kulaa kaa piɔ lɛɛ Yawɛ gbaa mo.”

30 Isak tsɛ mɛ ní yemi nɛ a ye ní, nɛ a nu nɔ́ ko.

31 A te si mɔtu kpla, nɛ a ka a he kita. Lɔ ɔ se ɔ, Isak wo mɛ blɔ nɛ a mi gba ngɛ bua jɔmi mi.

32 Jamɛ a ligbi ɔ nɔuu ɔ, Isak nyɔguɛ ɔmɛ ba bɔ lɛ amaniɛ ngɛ vu ɔ nɛ a tsua a he. A de lɛ ke, “Wa na nyu.”

33 Isak wo vu ɔ biɛ ke “Sheba.” Bɔ nɛ ba nɛ Beersheba ma a na e biɛ ji nɛ ɔ nɛ.

Esau ma se yi ɔmɛ

34 Benɛ Esau ye jeha nyingmi eywiɛ ɔ, e ngɔ Hit yihewi enyɔ. Mɛ ji Beeri biyo Yudit, kɛ Elon biyo Basemat.

35 Yi nɛ ɔmɛ kɛ haomi nɛ nya wa ba Isak kɛ Rebeka a nɔ.