Mose I, 11

Babilon mɔ ɔ

1 Sisije ɔ, gbi kake pɛ lɛ a tuɔ ngɛ je ɔ mi tsuo.

2 Benɛ nihi bɔni blɔ hiami kɛ je beleku je ɔ, a ba su nga kplanaa ko nɔ ngɛ Babilonia zugba a nɔ, nɛ a hi lejɛ ɔ.

3 A de a he ke, “Nyɛ ha nɛ waa po bliikisi nɛ waa sã ngɛ la mi nɛ e he nɛ wa.” A po bliikisi ɔ, nɛ a hla zu nɛ ngɛ kaa amã nɛ a kɛ maa nu bliikisi ɔ kɛ bla kɛ ma tsu.

4 A de ke, “Nyɛ ha nɛ waa po ma ngua ko ngɔ ha wa he, nɛ waa ma mɔ nɛ e yi mi nɛ ya su hiɔwe. Ke wa pee ja a, wa ma na biɛ, nɛ wa be gbɛe ngɔ fia zugba a nɔ tsuo.”

5 Kɛkɛ nɛ Yawɛ kple si nɛ e ba hyɛ ma a, kɛ mɔ ɔ nɛ jamɛ a ni ɔmɛ ma a,

6 nɛ e de ke, “Ɛhɛɛ, nimli nɛ ɔmɛ ɔ, nimli kake ji mɛ, nɛ gbi kake a tuɔ; nɔ́ nɛ a nyɛ tsu momo ji nɛ ɔ nɛ. E be kɛe nɛ nɔ́ tsuaa nɔ́ nɛ a suɔ ɔ, a maa pee.

7 Nyɛ ha nɛ wa kple si nɛ wa ya tsaka a gbi ɔ; konɛ ke nɔ ko tu munyu ɔ, e nyɛmi nɛ ko nu sisi hu.”

8 Kɛkɛ nɛ Yawɛ gbɛ mɛ ngɔ fĩa zugba a nɔ tsuo, nɛ a kpa ma a pomi.

9 A wo ma a biɛ ke Babilon,[7] ejakaa lejɛ ɔ Yawɛ tsaka ni ɔmɛ a gbi ɔ ngɛ, nɛ e gbɛ mɛ ngɔ fĩa je ɔ mi tsuo.

Shem nina

(<x>130 1:24-27</x>)

10 Shem nina ji nɛ ɔmɛ nɛ. Nyu kpekpemi ɔ se jeha enyɔ benɛ Shem ye jeha 100 a, e fɔ binyumu nɛ e biɛ ji Arpakshad.

11 Lɔ ɔ se ɔ, e hi si jeha 500, nɛ e fɔ bimɛ kpahi.

12 Benɛ Arpakshad ye jeha 35 ɔ, e fɔ binyumu nɛ e biɛ ji Shela.

13 Lɔ ɔ se ɔ, e hi si jeha 403; nɛ e fɔ bimɛ kpahi.

14 Benɛ Shela ye jeha 30 ɔ, e fɔ binyumu nɛ e biɛ ji Eber.

15 Lɔ ɔ se ɔ, e hi si jeha 403; nɛ e fɔ bimɛ kpahi.

16 Benɛ Eber ye jeha 34 ɔ, e fɔ binyumu nɛ e biɛ ji Peleg.

17 Lɔ ɔ se ɔ, e hi si jeha 430; nɛ e fɔ bimɛ kpahi.

18 Benɛ Peleg ye jeha 30 ɔ, e fɔ binyumu nɛ e biɛ ji Reu.

19 Lɔ ɔ se ɔ, e hi si jeha 209; nɛ e fɔ bimɛ kpahi.

20 Benɛ Reu ye jeha 32 ɔ, e fɔ binyumu nɛ e biɛ ji Serug.

21 Lɔ ɔ se ɔ, e hi si jeha 207; nɛ e fɔ bimɛ kpahi.

22 Benɛ Serug ye jeha 30 ɔ, e fɔ binyumu nɛ e biɛ ji Nahor.

23 Lɔ ɔ se ɔ, e hi si jeha 200; nɛ e fɔ bimɛ kpahi.

24 Benɛ Nahor ye jeha 29 ɔ, e fɔ binyumu nɛ e biɛ ji Tera.

25 Lɔ ɔ se ɔ, e hi si jeha 119; nɛ e fɔ bimɛ kpahi.

26 Benɛ Tera ye jeha 70 ɔ, e fɔ binyumuhi etɛ: Abram, Nahor, kɛ Haran.

Tera nina

27 Tera nina ji nɛ ɔmɛ nɛ. Tera fɔ binyumuhi etɛ: Abram, Nahor, kɛ Haran. Haran fɔ binyumu nɛ e biɛ ji Lot.

28 Haran gbo ngɛ Ur, ma mi he nɛ a fɔ lɛ ngɛ ɔ, ngɛ Babilonia zugba a nɔ, be mi nɛ e tsɛ ngɛ je mi kɛ mwɔɔ.

29 Abram ngɔ Sarai, nɛ Nahor ngɔ Milka, Haran biyo ɔ. Haran ji Milka kɛ Iska tsuo a tsɛ.

30 Se Sarai lɛɛ yosa ji lɛ; e fɔ we.

31 Tera ngɔ e binyumu Abram, kɛ e bibi Lot, Haran binyumu ɔ, kɛ e nganyɛ Sarai, Abram yo ɔ, nɛ e kɛ mɛ je Ur ngɛ Babilonia kɛ yaa Kanaan. Se benɛ a su ma a nɛ a tsɛɛ Haran ɔ, a ya to lejɛ ɔ.

32 Tera gbo ngɛ Haran benɛ e ye jeha lafa enyɔ kɛ enuɔ.